Mahabharata · Chapter 12.270

sadbhirvā yadi vā'sadbhiḥ panthānamimamāśritaḥ /
pratyakṣaṃ kriyatāṃ sādhu tato jñāsyasi tadyathā //

ete śakuntā bahavaḥ samantādvicaranti ha /
tavottamāṅge sambhūtāḥ śyenāścānyāśca jātayaḥ //

āhūyainānmahābrahmanviśamānāṃstatastataḥ /
paśyemānhastapādaiśca śliṣṭāndeheṣu sarvaśaḥ //

sambhāvayanti pitaraṃ tvayā sambhāvitāḥ svagāḥ /
asaṃśayaṃ pitā vai tvaṃ putrānāhvaya jājale //
bhīṣma uvāca /

tato jājalinā tena samāhūtāḥ patatriṇaḥ /
vācamuccārayanti sma dharmasya vacanātkila //
tulādhāra uvāca /

ahiṃsādi kṛtaṃ karma iha caiva paratra ca /
śraddhāṃ nihanti vai brahmansā hatā hanti taṃ naram //

samānāṃ śraddadhānānāṃ saṃyatānāṃ sucetasām /
kurvatāṃ yajña ityeva na yajño jātu neṣyate //

śraddhā vai sātvikī devī sūryasya duhitā dvija /
sāvitrī prasavitrī ca havirvāṅbhanasī tataḥ //

vāgvṛddhaṃ trāyate śraddhā manovṛddhaṃ ca jājale /
śraddhāvṛddhaṃ vāṅbhanasī na yajñastrātumarhati //

atra gāthā brahmagītāḥ kīrtayanti purāvidaḥ /
śuceraśraddadhānasya śraddadhānasyara cāśuceḥ //

devā vittamamanyanta sadṛśaṃ yajñakarmaṇi /
śrotriyasya kadaryasya vadānyasya ca vārdhuṣeḥ //

mīmāṃsitvobhayaṃ devāḥ samamannamakalpayan /
prajāpatistānuvāca viṣamaṃ kṛtamityuta //

śraddhāpūtaṃ vadānyasya hatamaśraddhayetarat /
bhojyamannaṃ vadānyasya kadaryasya na vārdhuṣeḥ //

aśraddadhāna evaiko devānāṃ nārhate haviḥ /
tasyaivānnaṃ na bhoktavyamiti dharmavido viduḥ //

aśraddhā paramaṃ pāpaṃ śraddhā pāpapramocanī /
jahāti pāpaṃ śraddhāvānsarpo jīrṇāmiva tvacam //

jyāyasī yā pavitrāṇāṃ nivṛttiḥ śraddhayā saha /
nivṛttaśīladoṣo yaḥ śraddhāvānpūta eva saḥ //

kiṃ tasya tapasā kāryaṃ kiṃ vṛttena kimātmanā /
śraddhāmayo'yaṃ puruṣo yo yacchraddhaḥ sa eva saḥ //

iti dharmaḥ samākhyātaḥ sadbhirdharmārthadarśibhiḥ /
vayaṃ jijñāsamānāstu samprāptā dharmadarśanāt //

śraddhāṃ kuru mahāprājña tataḥ prāpsyasi yatparam //
jājaliruvāca /

na vai munīnāṃ śṛṇumaśca tatvaṃ pṛcchāmi te vāṇija tatvametat /
pūrve hi pūrve'pyanavekṣamāṇā nātaḥ paraṃ te ṛṣayaḥ sthāpayanti //

yasminnevānutīrthena paśavaḥ prāpnuyuḥ sukham / patnīvratena vidhinā prakaroti niyojayan /
śraddhāvāñśraddadhānaśca dharmaścaiva hi vāṇija //
tulādhāra uvāca /

svavartmani sthitaścaiva garīyāneva jājale //
bhīṣma uvāca /

tato'cireṇa kālena tulādhāraḥ sa eva ca / divaṃ gatvā mahāprājñau viharetāṃ yathāsukham /
svaṃsvaṃ sthānamupāgamya svakarmaphalanirmitam //

evaṃ bahuvidhārthaṃ ca tulādhāreṇa bhāpitam /
samyakcaivamupālabdho dharmaścoktaḥ sanātanaḥ //

tasya vikhyātavīryasya śrutvā vākyāni jājaliḥ /
tulādhārasya kaunteya śāntimevānvapadyata //

samānāṃ śraddadhānānāṃ yuktānāṃ ca yathābalam / kurvatāṃ yajña ityeva nāyajño jātu neṣyate //

evaṃ bahumatārthaṃ ca tulādhāreṇa bhāṣitam /
yathaupamyopadeśena kiṃ bhūyaḥ śrotumicchasi //