Mahabharata · Chapter 12.264

vinīya duḥkhamabalā sā'tmanaivāyatekṣaṇā /
uvāca prāñjalirbhūtvā tamevāvarjitā tadā //

tvayā sṛṣṭā kathaṃ nārī mādṛśī vadatāṃ vara /
raudrakarmābhijāyeta sarvaprāṇibhayankarī //

vibhemyahamadharmasya dharmyamādiśa karma me /
tvaṃ māṃ bhītāmavekṣasva śiveneśvaracakṣuṣā //

bālānvṛddhānvayasthāṃśca na hareyamanāgasaḥ /
prāṇinaḥ prāṇināmīśa namaste'stu prasīda me //

priyānputrānvayasyāṃśca bhrātṝnmātṝḥ pitṛnapi /
apadhyāsyanti yadyevaṃ mṛtāstebhyo vibhemyaham //

kṛpaṇāśruparikledo dahenmāṃ śāśvatīḥ samāḥ /
tebhyo'haṃ balavadbhītā śaraṇaṃ tvāmupāgatā //

yamasya bhavane deva pātyante pāpakarmiṇaḥ /
prasādaye tvāṃ varada prasādaṃ kuru me prabho //

etadicchāmyahaṃ kāmaṃ tvatto lokapitāmaha /
iccheyaṃ tvatprasādācca tapastaptuṃ maheśvara //
pitāmaha uvāca /

tvaṃ hiṃ saṃhārabuddhyā me cintitā ruṣitena ca /
tasmātsaṃhara sarvāstvaṃ prajā mā ca vicāraya //

etadevamavaśyaṃ hi bhavitā naitadanyathā /
kriyatāmanavadyāṅgi yathoktaṃ madvaco'naghe //

evamuktā mahābāho mṛtyuḥ parapurañjaya /
na vyājahāra tasthau ca prahvā bhagavadunmukhī //

punaḥ punarathoktā sā gatasattveva bhāminī /
tūṣṇīmāsīttato devo lokānāmīśvareśvaraḥ //

prasasāda kila brahmā svayamevātmanā'tmani /
smayamānaśca lokeśo lokānsarvānavaikṣata //

nivṛttaroṣe tasmiṃstu bhagavatyaparājite /
sā kanyā'tha jagāmāsya samīpāditi naḥśrutam //

apasṛtyāpratiśrutya prajāsaṃharaṇaṃ tadā /
tvaramāṇeva rājendra mṛtyurdhenukamabhyagāt //

sā tatra paramaṃ devī tapo'carata duścaram /
samā hyekapade tasthau daśapadmāni pañca ca //

tāṃ tathā kurvatīṃ tatra tapaḥ paramaduścaram /
punareva mahātejā brahmā vacanamabravīt //

kuruṣva me vaco mṛtyo tadanādṛtya satvarā /
tathaivaikapade tāta punaranyāni sapta sā //

tasthau padmāni ṣaṭ caiva pañca dve caiva mānada /
bhūyaḥ padmāyutaṃ tāta mṛgaiḥ saha cacāra sā //

dve cāyute naraśreṣṭha vāyvāhārā mahāmate /
punareva tato rājanmaunamātiṣṭhaduttamam //

apsu varṣasahasrāṇi sapta caikaṃ ca pārthiva /
tato jagāma sā kanyā kauśikīṃ nṛpasattama //

tatra vāyujalāhārā cacāra niyamaṃ punaḥ /
tato yayau mahābhāgā gaṅgāṃ meruṃ ca kevalam //

tasthau dārviva niśceṣṭā prajānāṃ hitakāmyayā /
tato himavato mūrdhniṃ yatra devāḥ samījire //

tatrāṅguṣṭhena rājendra nikharvamacarattapaḥ /
tasthau pitāmahaṃ caiva toṣayāmāsa yatnataḥ //

tatastāmabravīttatra lokānāṃ prapitāmahaḥ /
kimidaṃ vartase putri kriyatāṃ mama tadvacaḥ //

tato'bravītpunarmṛtyurbhagavantaṃ pitāmaham /
na hareyaṃ prajā deva punastvā'haṃ prasādaye //

tāmadharmabhayādbhītāṃ punareva prayācatīm /
tadā'bravīddevadevo nigṛhyedaṃ vacastataḥ //

adharmo nāsti te mṛtyo saṃyacchemāḥ prajāḥ śubhe /
mayā'pyuktaṃ mṛṣā bhadre bhavitā neha kiñcana //

dharmaḥ sanātanaśca tvāmihaivānupravekṣyati /
ahaṃ ca vibudhāścaiva tvaddhite niratāḥ sadā //

imanyaṃ ca te kāmaṃ dadāni manasepsitam /
na tvāṃ doṣeṇa yāsyanti vyādhisampīḍitāḥ prajāḥ //

puruṣeṣu ca rūpeṇa puruṣastvaṃ bhaviṣyasi /
strīṣu strīrūpiṇī caiva tṛtīyeṣu napuṃsakam //

saivamuktā mahārāja kṛtāñjaliruvāca ha /
punareva mahātmānaṃ neti deveśamavyayam //

tāmabravīttadā devo mṛtyo saṃhara mānavān /
adharmaste na bhavitā yathā dhyāsyāmyahaṃ śubhe //

tvaṃ hi śaktā ca yuktā ca pūrvotpannā ca bhāmini /
anuśiṣṭā ca nirdoṣā tasmāttvaṃ kuru me matam //

yānaśrubindūnpatitānapaśyaṃ ye pāṇibhyāṃ dhāritāste purastāt /
te vyādhayo mānavānghorarūpāḥ prāpte kāle pīḍayiṣyanti mṛtyo //

sarveṣāṃ tvaṃ prāṇināmantakāle kāmakrodhau sahitau yojayethāḥ /
evaṃ dharmastvāmupaiṣyatyamogho na cādharmaṃ lapsyase tulyavṛttiḥ //

evaṃ dharmaṃ pālayiṣyasyatho tvaṃ na cātmānaṃ mañjayiṣyasyadharme /
tasmātkāmaṃ rocayābhyāgataṃ tvaṃ sā tvaṃ sādho saṃharasveha jantūn //

sā vai tadā mṛtyusañjñā kṛtāstrī śāpādbhītā bāḍhamityabravīttam /
atho prāṇānprāṇināmantakāle kāmakrodhau prāpya nityaṃ nihanti //

mṛtyorye te vyādhayaścāścupātā manuṣyāṇāṃ yujyate yaiḥ śarīram /
sarveṣāṃ vai prāṇināṃ prāṇanānte tasmācchokaṃ mā kṛthā buddhya buddhyā //

sarve devāḥ prāṇināṃ prāṇanānte gatvā vṛttāḥ sannivṛttāstathaiva /
evaṃ sarve mānavāḥ prāṇanānte gatvā vṛttā devavadrājasiṃha //

vāyurbhīmo bhīmanādo mahaujāḥ sarveṣāṃ ca prāṇināṃ prāṇabhūtaḥ /
anāvṛttirdehināṃ dehapāte tasmādvāyurdevadevo viśiṣṭaḥ //

sarve devā martyasañjñāviśiṣṭāḥ sarve martyā devasañjñāviśiṣṭāḥ /
tasmātputraṃ mā śuco rājasiṃha putraḥ svargaṃ prāpyate modate he //

evaṃ mṛtyurdevasṛṣṭā prajānāṃ prāpte kāle saṃharantī yathāvat /
tasyāścaiva vyādhayaste'śrupātāḥ prāpte kāle saṃharantīha jantūn //