Mahabharata · Chapter 12.26

abhimanyau hate bāle draupadyāstanayeṣu ca /
dhṛṣṭadyumne virāṭe ca drupade ca mahīpatau //

vṛṣasene ca dharmajñe dhṛṣṭaketau tu pārthive /
tathā'nyeṣu narendreṣu nānādeśyeṣu saṃyuge //

na ca muñcati māṃ śoko jñātighātinamāturam /
rājyakāmukamatyugraṃ svavaṃśocchedakāriṇam //

yasyāṅke krīḍamānena mayā viparivartitam /
sa mayā rājyalubdhena gāṅgeyo yudhi pātitaḥ //

yadā hyenaṃ vighūrṇantaṃ madarthaṃ pārthasāyakaiḥ /
takṣyamāṇaṃ yathā vajraiḥ prekṣamāṇaṃ śikhaṇḍinam //

jīrṇasiṃhamiva prājñaṃ narasiṃhaṃ pitāmaham /
kīryamāṇaṃ śarairdīptairdṛṣṭvā me vyathitaṃ manaḥ //

prāḍbhukhaṃ sīdamānaṃ ca rathātpararathārujam /
ghūrṇamānaṃ yathā śailaṃ tadā me kaśmalo'bhavat //

yaḥ savāṇadhanuṣpāṇiryodhayāmāsa bhārgavam /
bahūnyahāni kauravyaḥ kurukṣetre mahāmṛdhe //

sametaṃ pārthivaṃ kṣatraṃ vārāṇasyāṃ nadīsutaḥ /
kanyārthamāhvayadvīro rathenaikena saṃyuge //

yena cogrāyudho rājā cakravartī durāsadaḥ /
dagdhaścāstrapratāpena sa mayā yudhi pātitaḥ //

svayaṃ mṛtyuṃ rakṣamāṇaḥ pāñcālyaṃ yaḥ śikhaṇḍinam /
na bāṇaiḥ pātayāmāsa so'rjunena nipātitaḥ //

yadainaṃ patitaṃ bhūmāvapaśyaṃ rudhirokṣitam /
tadaivāviśadanyugro jvaro māṃ munisattama //

yena saṃvardhitā bālā yena sma parirakṣitāḥ / sa mayā rājyalubdhena pāpena gurudhātinā /
alpakālasya rājyasya kṛte mūḍhena pātitaḥ //

ācāryaśca maheṣvāsaḥ sarvapārthivapūjitaḥ /
abhigamya raṇe mithyā pāpenoktaḥ sutaṃ prati //

tanme dahati gātrāṇi yanmāṃ gururabhāṣata /
satyamākhyāhi rājaṃstvaṃ yadi jīvati me sutaḥ //

satyamāmarśayanvipro mayi tatparipṛṣṭavān /
kuñjaraṃ cāntaraṃ kṛtvā mithyopacarito mayā //

subhṛśaṃ rājyalubdhena pāpena gurughātinā /
satyakañcukamunmucya mayā sa gururāhave //

aśvatthāmā hata iti niruktaḥ kuñjare hate /
kām̐llokāṃstu gamiṣyāmi kṛtvā karma suduṣkaram //

aghātayaṃ ca yatkarṇaṃ samareṣvapalāyinam /
jyeṣṭhabhrātaramatyugraḥ ko mattaḥ pāpakṛttamaḥ //

abhimanyuṃ ca yadvālaṃ jātaṃ siṃhamivādriṣu /
prāveśayamahaṃ lubdho vāhinīṃ droṇapālitām //

tadāprabhṛti vībhatsuṃ na śaknomi nirīkṣitum /
kṛṣṇaṃ ca puṇḍarīkākṣaṃ kilviṣī bhrūṇahā yathā //

draupadīṃ cāpyaduḥkhārhāṃ pañcaputrairvinākṛtām /
śocāmi pṛthivīṃ hīnāṃ pañcabhiḥ parvatairiva //

so'hamāgaskaraḥ pāpaḥ pṛthivīnāśakārakaḥ /
āsīna evamevedaṃ śoṣayiṣye kalevaram //

prāyopaviṣṭaṃ jānīdhvamatha māṃ gurughātinam /
jātiṣvanyāsvapi yathā na bhaveyaṃ kulāntakṛt //

na bhokṣye na ca pānīyamupayokṣye kathañcana /
śoṣayiṣye priyānprāṇānihastho'haṃ tapodhanāḥ //

yatheṣṭaṃ gamyatāṃ kāmamanujāne prasādya vaḥ /
sarve māmanujānīta tyakṣyāmīdaṃ kalevaram //
vaiśampāyana uvacā /

tamevaṃvādinaṃ pārthaṃ bandhuśokena vihvalam /
maivamityabravīdvyāso nigṛhya munisattamaḥ //
vyāsa uvāca /

ativelaṃ mahārāja na śokaṃ kartumarhasi /
punaruktaṃ tu vakṣyāmi diṣṭametaditi prabho //

saṃyogā viprayogāśca jātānāṃ prāṇināṃ dhruvam /
buddhudā iva toyeṣu bhavanti na bhavanti ca //

sarve kṣayāntā nicayāḥ patanāntāḥ samucchrayāḥ /
saṃyogā viprayogāntā maraṇāntaṃ hi jīvitam //

sukhaṃ duḥkhāntamālasyaṃ dākṣyaṃ duḥkhaṃ sukhodayam /
bhūtiḥ śrīrhrīrdhṛtiḥ kīrtirdakṣe vasati nālase //

nālaṃ sukhāya suhṛdo nāle duḥkhāya śatravaḥ /
na ca prajñālamarthebhyo na sukhebhyo'pyalaṃ dhanam //

yathā sṛṣṭo'si kaunteya dhātrā karmasu tatkraru /
ata eva hi siddhiste neśastvaṃ hyātmano nṛpa //