Mahabharata · Chapter 12.232

śatakraturathāpaśyadbalerdīptāṃ mahātmanaḥ /
svarūpiṇīṃ śarīrāddhi niṣkrāmantīṃ tadā śriyam //

tāṃ dṛṣṭvā prabhayā dīptāṃ bhagavānpākakaśāsanaḥ /
vismayotphullanayano baliṃ papraccha vāsavaḥ //

bale keyamapakrāntā rocamānā śikhaṇḍinī /
tvattaḥ sthitā sakeyūrā dīpyamānā svatejasā //
baliruvāca /

na hīmāmāsurīṃ vedmi na daivīṃ ca na mānuṣīm /
tvamenāṃ pṛccha vā mā vā yatheṣṭaṃ kuru vāsava //
śakra uvāca /

kā tvaṃ balerapakrāntā rocamānā śikhaṇḍinī /
ajānato mamācakṣva nāmadheyaṃ śucismite //

kā tvaṃ tiṣṭhasi māmevaṃ dīpyamānā svatejasā /
hitvā daityavaraṃ subhru tanmamācakṣva pṛcchataḥ //
śrīruvāca /

na māṃ virocano veda nāyaṃ vairocano baliḥ /
āhurmāṃ duḥsahetyevaṃ vidhitseti ca māṃ viduḥ //

bhūtirlakṣmīti māmāhuḥ śrīrityeva ca vāsava /
tvaṃ māṃ śakra na jānīṣe sarve devā na māṃ viduḥ //
śakra uvāca /

kimidaṃ tvaṃ mama kṛte utāho balinaḥ kṛte /
duḥsahe vijahāsyenaṃ cirasaṃvāsinī satī //
śrīruvāca /

no dhātā na vidhātā māṃ vidadhāti kathañcana /
kālastu śakra paryāgānmaivaṃ śakrāvamanyathāḥ //
śakra uvāca /

kathaṃ tvayā balistyaktaḥ kimarthaṃ vā śikhaṇḍini /
kathaṃ ca māṃ na jahyāstvaṃ tanme brūhi śucismite //
śrīruvāca /

satye sthitā'smi dāne ca vrate tapasi caiva hi /
parākrame ca dharme ca parācīnastato baliḥ //

brahmaṇyo'yaṃ purā bhūtvā satyavādī jitendriyaḥ /
abhyasūyanbrāhmaṇānvai ucchiṣṭaścāspṛśaddhṛtam //

yajñaśīlaḥ sadā bhūtvā māmeva yajate svayam /
tataḥ prahāya mūḍhātmā kālenopanipīḍitaḥ //

apakrāntā tataḥ śakra tvayi vatsyāmi vāsava /
apramattena dhāryā'smi tapasā vikrameṇa ca //
śakra uvāca /

ko'sti devamanuṣyeṣu sarvabhūteṣu vā pumān /
yastvāmeko viṣahituṃ śaknuyātkamalālaye //
śrīruvāca /

naiva devo na gandharvo nāsuro naṃ ca nrākṣasaḥ /
yo māmeko viṣahituṃ śaktaḥ kaścitpurandara //
śakra uvāca /

tiṣṭhethā mayi nityaṃ tvaṃ yathā tadbrūhi me śubhe /
tatkariṣyāmi te vākyamṛtaṃ tadvaktumarhasi //
śakra uvāca /

sthāsyāmi nityaṃ devendra yathā tvayi nibodha tat /
vidhinā vedadṛṣṭena caturdhā vibhajasva mām //
śakra uvāca /

ahaṃ vai tvāṃ nidhāsyāmi yathāśakti yathābalam /
na tu me'tikramaḥ syādvai sadā lakṣmi tavāntike //

bhūmireva manuṣyeṣu dhāriṇī bhūtabhāvinī /
sā te pādaṃ titikṣeta samarthā hīti me matiḥ //
śrīruvāca /

eṣa me nihitaḥ pādo yo'yaṃ bhūmau pratiṣṭhitaḥ /
dvitīyaṃ śakra pādaṃ me tasmātsunihitaṃ kuru //
śakra uvāca /

āpa eva manuṣyeṣu dravantyaḥ paridhāraṇe /
tāste pādaṃ titikṣantāmalamāpastitikṣitum //
śrīruvāca /

eṣa me nihitaḥ pādo yo'yamapsu pratiṣṭhitaḥ /
tṛtīyaṃ śakra pādaṃ me tasmātsunihitaṃ kuru //
śakra uvāca /

yasminvedāśca yajñāśca yasmindevāḥ pratiṣṭhitāḥ /
tṛtīyaṃ pādamagniste sudhṛtaṃ dhārayiṣyati //
śrīruvāca /

eṣa me nihitaḥ pādo yo'yamagnau pratiṣṭhitaḥ /
caturthaṃ śakra pādaṃ me tasmātsunihitaṃ kuru //
śakra uvāca /

ye vai santo manuṣyeṣu brahmaṇyāḥ satyavādinaḥ /
tete pādaṃ titikṣantāmalaṃ santastitikṣitum //
śrīruvāca /

eṣa me nihitaḥ pādo yo'yaṃ satsu pratiṣṭhitaḥ /
evaṃ hi nihitāṃ śakra bhūteṣu paridhatsva mām //
śakra uvāca /

bhūmiśuddhiṃ tataḥ kṛtvā adbhiḥ santarpayanti ye /
bhūtāni ca yajantyagnau teṣāṃ tvamanapāyinī //

ye kriyābhiḥ suraktābhirhetuyuktāḥ samāhitāḥ / jñānavanto vivatsāyāṃ labdhā mādyanti yoginaḥ //

bhūtānāmiha yo vai tvāṃ mayā vinihitāṃ satīm /
upahanyātsa me dveṣyastathā śṛṇvantu me vacaḥ //
bhīṣma uvāca /

tatheti coktvā sā bhraṣṭā sarvalokanamaskṛtā / vāsavaṃ pālayāmāsa sā devī kamalālayā //

tatastyaktaḥ śriyā rājā daityānāṃ balirabravīt //

yāvatpurastātpratapettāvadvai dakṣiṇāṃ diśam /
paścimāṃ tāvadevāpi tathodīcīṃ divākaraḥ //

tathā madhyandine sūryo nāstameti yadā tadā /
punardevāsuraṃ yuddhaṃ bhāvi jetā'smi vastadā //

sarvalokānyadā'dityo madhyasthastāpayiṣyati /
tadā devāsure yuddhe jetā'haṃ tvāṃ śatakrato //
śakra uvāca /

brahmaṇā'smi samādiṣṭo na hantavyo bhavāniti /
tena te'haṃ bale vajraṃ na vimuñjāmi mūrdhani //

yatheṣṭaṃ gaccha daityendra svasti te'stu mahāsura //

ādityo naiva tapitā kadācinmadhyataḥ sthitaḥ /
sthāpito hyasya samayaḥ pūrvameva svayambhuvā //

ajasraṃ pariyātyeṣa satyenāvatapanprajāḥ / ayanaṃ tasya ṣaṇmāsā uttaraṃ dakṣiṇaṃ tathā /
yena saṃyāti lokeṣu śītoṣṇe visṛjanraviḥ //
bhīṣma uvāca /

evamuktastu daityendro balirindreṇa bhārata /
jagāma dakṣiṇāmāśāmudīcīṃ tu purandaraḥ //

ityetadbalinā gītamanahankārasañjñitam /
vākyaṃ śrutvā sahasrākṣaḥ svamevāruruhe tadā //