Mahabharata · Chapter 12.230

yayā buddhyā mahīpālo bhraṣṭaśrīrvicarenmahīm /
kāladaṇḍaviniṣpiṣṭastanme brūhi pitāmaha //
bhīṣma uvāca /

atrāpyudāharantīmamitihāsaṃ purātanam /
vāsavasya ca saṃvādaṃ balervairocanasya ca //

pitāmahamupāgamya praṇipatya kṛtāñjaliḥ /
sarvānevāsurāñjitvā baliṃ papraccha vāsavaḥ //

yasya sma dadato vittaṃ na kadācana hīyate /
taṃ baliṃ nādhigacchāmi brahmannācakṣva me balim //

sa vāyurvaruṇaścaiva sa raviḥ sa ca candramāḥ /
so'gnistapati bhūtāni jalaṃ ca sa bhavatyuta //

taṃ baliṃ nādhigacchāmi brahmannācakṣva me balim /
sa eva hyastamayate sa sma vidyotate diśaḥ //

sa varṣati sma varṣāṇi yathākālamatandritaḥ /
taṃ baliṃ nādhigacchāmi brahmannācakṣva me balim //
brahmovāca /

naitatte sādhu maghavanyadenamanupṛcchasi /
pṛṣṭastu nānṛtaṃ brūyāttasmādvakṣyāmi te balim //

uṣṭreṣu yadi vā goṣu khareṣvaśveṣu vā punaḥ /
variṣṭho bhavitā jantuḥ śūnyāgāre śacīpate //
śakra uvāca /

yadi sma balinā brahmañśūnyāgāre sameyivān /
hanyāmenaṃ na vā hanyāṃ tadbrahmannanuśādhi mām //
brahmovāca /

mā sma śakra baliṃ hiṃsīrna balirvadhamarhati /
nyāyastu śakra praṣṭavyastvayā vāsava kāmyayā //
bhīṣma uvāca /

evamukto bhagavatā mahendraḥ pṛthivīṃ tadā /
cacārairāvataskandhamadhiruhya śriyā vṛtaḥ //

tato dadarśa sa baliṃ kharaveṣeṇa saṃvṛtam /
yathākhyātaṃ bhagavatā śūnyāgārakṛtālayam //
śakra uvāca /

kharayonimanuprāptastupabhakṣo'si dānava /
idaṃ te yonirasamā śocasyāho na śocasi //

adṛṣṭaṃ vata paśyāmi dviṣatāṃ vaśamāgatam /
śriyā vihīnaṃ mitraiśca bhraṣṭaiśvaryaparākramam //

yattadyānasahasraistvaṃ jñātibhiḥ parivāritaḥ /
lokānpratāpayansarvānyāsyasmānavitarkayan //

tvanmukhāścaiva daiteya vyatiṣṭhaṃstava śāsane /
akṛṣṭapacyā pṛthivī tavaiśvarye babhūva ha //

idaṃ ca te'dya vyasanaṃ śocasyāho na śocasi /
yadā'tiṣṭhaḥ samudrasya pūrvakūle vilelikhan //

jñātibhyo vibhajanvittaṃ tadāsītte manaḥ katham /
yatte sahasrasamitā nanuturdevasoṣitaḥ //

bahūni varṣapūgāni vihāre dīpyataḥ śriyā /
sarvāḥ puṣkaramālinyaḥ sarvāḥ kāñcanasaprabhāḥ //

kathamadya tadā caiva manaste dānaveśvara /
chatraṃ tavāsītsumahatsauvarṇaṃ ratnabhūṣitam //

nanṛtustatra gandharvāḥ ṣaṭ्sahasrāṇi saptacā /
yūpastavāsītsumahānyajataḥ sarvakāñcanaḥ //

yatrādadaḥ sahasrāṇi ayutānāṃ gavāṃ daśa /
anantaraṃ sahasreṇa tadā'sīddaityā kā matiḥ //

yadā ca pṛthivīṃ sarvāṃ yajamāno'nuparyagāḥ /
śamyākṣepeṇa vidhinā tadā'sītkintu te hṛdi //

na te paśyāmi bhṛṅgāraṃ na cchatraṃ vyajanaṃ na ca /
brahmadattāṃ ca te mālāṃ na paśyāmyasurādhipa //
bhīṣma uvāca /

tataḥ prahasya sa balirvāsavena samīritam /
niśamya mānagambhīraṃ surarājamathābravīt //

aho hi tava bāliśyamiha devagaṇādhipa / ayuktaṃ devarājasya tava kaṣṭamidaṃ vacaḥ //

na tvaṃ paśyasi bhṛṅgāraṃ na cchannaṃ vyajanaṃ na ca /
brahmadattāṃ ca me mālāṃ na tvaṃ drakṣyasi vāsava //

guhāyāṃ nihitāni tvaṃ mama ratnāni pṛcchasi /
yadā me bhavitā kālastadā tvaṃ tāni drakṣyasi //

na jānīṣe bhavānsiddhiṃ śubhāṅgasvarūparūpiṇīm / kālena bhavitā sarvo nātra gacchati vāsava //

na tvetadanurūpaṃ te yaśaso vā kulasya ca /
samṛddhārtho'samṛddhārthaṃ yanmāṃ katthitumicchasi //

na hi duḥkheṣu śocante na prahṛṣyanti carddhiṣu /
kṛtaprajñāḥ jñānatṛptāḥ kṣāntāḥ santo manīṣiṇaḥ //

tvaṃ tu prākṛtayā buddhyā purandara vikatthase /
yadā'hamiva bhāvī syāstadā naivaṃ vadiṣyasi //

aiśvaryamadamatto māṃ sa tvaṃ kiñcinna buddhyase / rājyādvinipatānena sohaṃ na tvaparājitaḥ //