Mahabharata · Chapter 12.220

kena vṛttena vṛttajño janako mithilādhipaḥ /
jagāma mokṣaṃ dharmajño bhogānutsṛjya buddhimān //
bhīṣma uvāca /

atrāpyudāharantīmamitihāsaṃ purātanam /
yena vṛttena dharmajñaḥ sa jagāma mahatsukham //

janako janadevastu mithilāyāṃ janādhipa /
aurdhvadehikadharmāṇāmāsīdyukto vicintane //

tasya sma śatamācāryā vasanti satataṃ gṛhe /
darśayantaḥ pṛthagdharmānnānāpāṣaṇḍavādinaḥ //

sa teṣāṃ pretyabhāvena pretya gātau viniścaye /
āgamasthaḥ sa bhūyiṣṭhamātmatattvena tuṣyanti //

tatra pañcaśikho nāma kāpileyo mahāmuniḥ /
paridhāvanmahīṃ kṛtsnāṃ jagāma yalāmatha //

sarvasannyāsadharmāṇāṃ tattvajñānaniścaye /
suparyavasitārthaśca nirdvandvo naṣṭagaśayaḥ //

ṛṣīṇāmāhurekaṃ yaṃ kāmāda-----nṛṣu /
śāśvataṃ sukhamatyantamanvi---sudurlabham //

yamāhuḥ kapilaṃ sāṅkhyāḥ paramarṣi prajāpatim /
sametya tena rūpeṇa vismāpayati hi svayam //

āsureḥ prathamaṃ śiṣyaṃ yamāhuścirajīvinam /
pañcasrotasi yaḥ satramāste varṣasahasrikam //

tamāsīnaṃ samāgamya kāpilaṃ maṇḍalaṃ mahat / [pañcasrotasi niṣṇātaḥ pañcarātraviśāradaḥ /

pañcajñaḥ pañcakṛtpañcaguṇaḥ pañcaśikhaḥ smṛtaḥ.] puruṣāvasthamavyaktaṃ paramārthaṃ nyavedayat //

iṣṭvā satreṇa sampṛṣṭo bhūyaśca tapasā'suriḥ /
kṣetrakṣetrajñayorvyaktiṃ bubudhe devadarśanāt //

yattadekākṣaraṃ brahma nānārūpaṃ pradṛśyate / bodhāyanaparānviprānṛṣibhāvamupāgataḥ /
āsurirmaṇḍale tasminpratipede tadavyayam //

tasya pañcaśikhaḥ śiṣyo mānuṣyāḥ payasā bhṛtaḥ /
brāhmaṇī kapilā nāma kācidāsītkuṭumbinī //

tasyāḥ putratvamāgamya striyāḥ sa pibati stanau /
tataḥ sa kāpileyatvaṃ lebhe buddhiṃ ca naiṣṭhikīm //

etanme bhagavānāha kāpileyasya sambhavam /
tasya tatkāpileyatvaṃ sarvavittvamanuttamam //

sāmānyaṃ janakaṃ jñātvā dharmajñānāmanuttamam /
upetya śatamācāryānmohayāmāsa hetubhiḥ //

nirākariṣṇustānsarvāṃsteṣāṃ hetuguṇānvahūn / śrāvayāmāsa matimānmuniḥ pañcaśikho nṛpa //

janakastvabhisaṃraktaḥ kāpileyānudarśanāt /
utsṛjya śatamācāryānpṛṣṭhato'nujagāma tam //

tasmai paramakalyāya praṇatāya ca dharmataḥ /
abravītparamaṃ mokṣaṃ yataḥ sāṅkhyaṃ vidhīyate //

jātinirvedamuktvā sa karmanirvedamabravīt /
karmanirvedamuktvā ca sarvanirvedamabravīt //

yadarthaṃ dharmasaṃsargaḥ karmaṇāṃ ca phalodayaḥ /
tamanāśvāsikaṃ mohaṃ vināśi calamadhruvam //

dṛśyamāne vināśe ca pratyakṣe lokasākṣike /
āgamātparamastīti bruvannapi parājitaḥ //

ātmanā hyātmano nityaṃ kleśamṛtyujarāmayam /
ātmānaṃ manyate mohāttadasamyakparaṃ matam //

atha cedevamapyasti yalloke nopapadyate /
ajaro'yamamṛtyuśca rājā'sau manyate tathā //

asti nāstīti cāpyetattasminnasati lakṣaṇe /
kimadhiṣṭhāya tadbrūyāllokayātrāviniścayam //

pratyakṣaṃ hyetayormūlaṃ kṛtāntaitihyayorapi /
pratyakṣeṇāgamo bhinnaḥ kṛtānto vā na kaścana //

yatratatrānumāne'sminkṛtaṃ bhāvayato'pi ca /
nānyo jīvaḥ śarīrasya nāstikānāṃ mate smṛtaḥ //

reto vaṭakaṇīkāyāṃ ghṛtapākādhivāsanam /
jātiḥ smṛtirayaskāntaḥ sūryakānto'mbubhakṣaṇam //

pretya bhūtāpyayaścaiva devatābhyupayācanam /
mṛte karmanivṛttiśca pramāṇamiti niścayaḥ //

na tvete hetavaḥ santi ye kecinmūrtisaṃsthitāḥ /
amūrtasya hi mūrtena sāmānyaṃ nopapadyate //

avidyākarmaceṣṭānāṃ kecidāhuḥ punarbhave /
kāraṇaṃ lobhamohau tu doṣāṇāṃ ca niṣevaṇam //

avidyāṃ kṣetramāhurhi karmabījaṃ tathā kṛtam /
tṛṣṇāsañjananaṃ sneha eṣa teṣāṃ punarbhavaḥ //

tasminmūḍhe ca jagdhe ca dehe maraṇadharmiṇi /
anyo'sau jāyate pretastadāhustatvamakṣayam //

yadā svarūpataścānyo jātitaḥ śrutito'rthataḥ /
kathamasminsa ityevaṃ sambodhaḥ syādasaṃhitaḥ //

evaṃ sati ca kā prītirdānavidyātapobalaiḥ /
yadyadācaritaṃ karma sarvamanyatprapadyate //

yadi hyayamihaivānyaiḥ prākṛtairduḥkhito bhavet /
sukhito duḥkhitairvā'pi dṛśyo hyasyavinirṇayaḥ //

yadā hi musalairhanyuḥ śarīraṃ na punarbhavet /
pṛthagjñānaṃ yadanyacca yenaitannopapadyate //

ṛtusaṃvatsarau tithyaḥ śītoṣṇe'tha priyāpriye /
yathā'tītā na dṛśyante tādṛśaḥ satvasankṣayaḥ //

jarayā'bhiparītasya mṛtyunā na vināśinā /
durbalaṃ durbalaṃ pūrvaṃ gṛhasyeva vinaśyati //

indriyāṇī mano vāyuḥ śoṇitaṃ māṃsamasthi ca /
ānupūrvyā vinaśyanti svaṃ dhātumupayānti ca //

lokayātrāvidhānaṃ ca dānadharmaphalāgamaḥ /
tadarthaṃ vedaśabdāśca vyavahārāśca laukikāḥ //

iti samyaṅbhanasyete bahavaḥ santi hetavaḥ /
etadāsīnmamāstīti na kaścitpratipadyate //

teṣāṃ vimṛśatāmevaṃ tattatsamabhidhāvatām /
kvacinniviśate buddhistatra jīryati vṛkṣavat //

evamarthairanarthaiśca duḥkhitāḥ sarvajantavaḥ /
āgamairapakṛṣyante hastipairhastino yathā //

na jātu kāmaḥ kāmānāmupabhogena śāmyati / haviṣā kṛṣṇavartmeva bhūya evābhivardhate //

arthāṃstathā'tyantamukhāvahāṃśca lipsanta ete bahavo viśuṣkāḥ /
mahattaraṃ duḥkhamanuprapannā hitvā sukhaṃ mṛtyuvaśaṃ prayānti //

vināśino hyadhnuvajīvitasya kiṃ bandhubhirmitraparigrahaiśca /
vihāya yo gacchati sarvameva kṣaṇena gatvā na nivartate ca //

bhūvyomatoyānalavāyavo'pi sadā śarīraṃ pratipālayanti /
itīdamālakṣya ratiḥ kuto bhave dvināśino hyasya na karma vidyate //

idamanupadhivākyamacchalaṃ paramanirāmayamātmasākṣikam /
narapatirabhivīkṣya vismitaḥ punaranuyoktumidaṃ pracakrame //