Mahabharata · Chapter 12.22

asminnevāntare vākyaṃ punarevārjuno'bravīt /
nirviṇṇamanasaṃ jyeṣṭhamidaṃ bhrātaramacyutam //

kṣatradharmeṇa dharmajña prāpya rājyaṃ sudurlabham /
jitvā cārīnnaraśreṣṭha tapyate kiṃ bhṛśaṃ bhavān //

kṣatriyāṇāṃ mahārāja sangrāme nidhanaṃ matam /
viśiṣṭaṃ bahubhiryajñaiḥ kṣatradharmamanusmara //

brāhmaṇānāṃ tapastyāgaḥ pretya dharmavidhiḥ smṛtaḥ /
kṣatriyāṇāṃ ca nidhanaṃ sangrāme vihitaṃ prabho //

kṣātradharmo mahāraudraḥ śastranitya iti smṛtaḥ /
vadhaśca bharataśreṣṭha kāle śastreṇa saṃyuge //

brāhmaṇasyāpi cedrājankṣatradharmeṇa vartataḥ /
praśastaṃ jīvitaṃ loke kṣatraṃ hi brahmasambhavam //

na tyāgo na punaryajño na tapo manujeśvara /
kṣatriyasya vidhīyante na parasvopajīvanam //

sa bhavānsarvadharmajño dharmātmā bharatarṣabha /
rājā manīṣī nipuṇo loke dṛṣṭaparāvaraḥ //

tyaktvā santāpajaṃ śokaṃ daṃśito bhava karmaṇi /
kṣatriyasya viśeṣeṇa hṛdayaṃ vajrasannibham //

jitvā'rīnkṣatradharmeṇa prāpya rājyamakaṇṭakam /
vijitātmā manuṣyendra yajñadānaparo bhava //

indro vai brahmaṇaḥ putraḥ kṣatriyaḥ karmaṇā'bhavat /
jñātīnāṃ pāpavṛttīnāṃ jaghāna navatīrnava //

taccāsya karma pūjyaṃ ca praśasyaṃ ca viśāmpate /
tenendratvaṃ samāpede devānāmiti naḥ śrutam //

sa tvaṃ yajñairmahārāja yajasva bahudakṣiṇaiḥ /
yathaivendro manuṣyendra cirāya vigatajvaraḥ //

mā tvamevaṃ gate kiñcicchocethāḥ kṣatriyarṣabha /
gatāste kṣatradharmeṇa śastrapūtāḥ parāṃ gatim //

bhavitavyaṃ tathā tacca yadvṛttaṃ bharatarṣabha /
diṣṭaṃ hi rājaśārdūla na śakyamativartitum //