Mahabharata · Chapter 12.216

atropāyaṃ pravakṣyāmi yathāvacchāstracakṣuṣā /
tattvajñānāccaranrājanprāpnuyātparamāṃ gatim //

sarveṣāmeva bhūtānāṃ puruṣaḥ śreṣṭha ucyate /
puruṣebhyo dvijānāhurdvijebhyo mantradarśinaḥ //

sarvabhūtātmabhūtāste sarvajñāḥ sarvadarśinaḥ /
brāhmaṇā vedaśāstrajñāstattvārthagataniścayāḥ //

netrahīno yathā hyekaḥ kṛcchrāṇi labhate'dhvani /
jñānahīnastathā loke tasmājjñānavido'dhikāḥ //

tāṃstānupāsate dharmāndharmakāmā yathāgamam /
na tveṣāmarthasāmānyamantareṇa guṇānimān //

vāgdehamanasāṃ śaucaṃ kṣamā satyaṃ dhṛtiḥ smṛtiḥ /
sarvadharmeṣu dharmajñā jñāpayanti guṇāñchubhān //

yadidaṃ brahmaṇo rūpaṃ brahmañcaryamiti smṛtam /
paraṃ tatsarvadharmebhyastena yānti parāṃ gatim //

liṅgasaṃyogahīnaṃ yacchabdasparśavivarjitam /
śrotreṇa śravaṇaṃ caiva cakṣuṣā caiva darśanam //

vāksambhāṣāpravṛttaṃ yattanmanaḥ parivarjitam /
buddhyā cādhyavasīyīta brahmacaryamakalmaṣam //

samyagvṛttirbrahmalokaṃ prāpnuyānmadhyamaḥ surān /
dvijāgryo jāyate vidvānkanyasīṃ vṛttimāsthitaḥ //

suduṣkaraṃ brahmacaryamupāyaṃ tatra me śṛṇu /
sampradīptamudīrṇaṃ ca nigṛhṇīyāddvijo manaḥ //

yoṣitāṃ na kathā śrāvyā na nirīkṣyā nirambarāḥ /
kathañciddarśanādāsāṃ durbalānāṃ viśedrajaḥ //

rāgotpannaśceratkṛcchramahnastriḥ praviśedapaḥ /
magnastvapsveva manasā trirjapedaghamarṣaṇam //

pāpmānaṃ nirdahedevamantarbhūtarajomayam /
jñānayuktena manasā santatena vicakṣaṇaḥ //

kuṇapāmedhyasaṃyuktaṃ yadvadacchidrabandhanam /
tadvaddehagataṃ vidyādātmānaṃ dehabandhanam //

amedhyapūrṇaṃ yadbhāṇḍaṃ śleṣmāntakalilāvṛtam /
necchate vīkṣituṃ bhāṇḍaṃ kutaḥ spraṣṭuṃ pravartate //

dehabhāṇḍaṃ malaiḥ pūrṇaṃ bahiḥ svedajalāvṛtam /
bībhatsaṃ naranārīṇāṃ jñānināṃ narakaṃ matam //

chidrakumbho yathā srāvaṃ sṛjate tadgataṃ dṛḍham /
antasyaṃ sraṃsate tadvajjalaṃ deheṣu dehinām //

śleṣmāśrumūtrakalilaṃ purīṣaṃ śuklameva ca / kaphajālaviniryāsaḥ sarasaścitta muñcaya //

vātapittakaphānraktaṃ tvaṅbhāṃsaṃ snāyumasthi ca /
majjāṃ dehaṃ sirājālaistarpayanti rasā nṛṇām //

daśa vidyāddhamanyo'tra pañcendriyaguṇāvahāḥ /
yābhiḥ sūkṣmāḥ prajāyante dhamanyo'nyāḥ sahasraśaḥ //

evametāḥ sirā nadyo rasodā dehasāgaram /
tarpayanti yathākālamāpagā iva sāgaram //

madhye ca hṛdayasyaikā sirā tatra manovahā /
śukraṃ sankalpajaṃ nṝṇāṃ sarvagātrairvimuñcati //

sarvagātrapratāyinyastasyā hyanugatāḥ sirāḥ /
netrayoḥ pratipadyante vahantyastaijasaṃ guṇam //

payasyantarhitaṃ sarpiryadvannirmathyate khajaiḥ /
śukraṃ nirmathyate tadvaddehasankalpajaiḥ khajaiḥ //

svapne'pyevaṃ yathā'bhyeti manaḥ sankalpajaṃ rajaḥ /
śukramasparśajaṃ dehātsṛjantyasya manovahāḥ //

maharṣirbhagavānatrirveda tacchrukrasambhavam /
nṛbījamindradaivatyaṃ tasmādindriyamucyate //

ye vai śukragatiṃ vidyurbhūtasankarakārikām /
virāgā dagdhadoṣāste nāpnuyurdehasambhavam //

guṇānāṃ sāmyamāgamya manasaiva manovaham /
dehakarma nudanprāṇānantakāle vimucyate //

bhavitā manaso jñānaṃ mana eva prajāyate /
jyotiṣmadvirajo nityaṃ mantrasiddhaṃ mahātmanām //

tasmāttadabhighātāya karma kuryādakalmaṣam /
dehabījaṃ samutpannamasmitkarmaṇi vidyate //

na smarenna prayuñjīta jñānī tatkarma buddhimān /
rajastamaśca hitveha na tiryaggatimāpnuyāt //

taruṇādhigataṃ jñānaṃ jarādurbalatāṃ gatam /
vipakvabuddhiḥ kālena ādatte mānasaṃ balam //

eva putrakalatreṣu jñātisambandhibandhuṣu /
ādatte hṛdaye kāmaṃ vyādhyādibhirabhiplutaḥ //

yatastataḥ paripatannavindansukhamaṇvapi / bahuduḥkhasamāpannaḥ paścānnirvedamāsthitaḥ /
jñānavṛkṣaṃ samāśritya paścānnirvṛtimaśnute //

sudurgamiva panthānamatītya guṇabandhanam /
yathā paśyettathā doṣānatītyāmṛtamaśnute //