Mahabharata · Chapter 12.215

rajasā sādhyate mohastamaśca bharatarṣabha /
krodhalobhau bhayaṃ darpa eteṣāṃ sādanācchuciḥ //

paramaṃ paramātmānaṃ devamakṣayamavyayam /
viṣṇumavyaktasaṃsthānaṃ vidustaṃ devasattamam //

tasya māyāpinaddhāṅgā jñāna bhraṣṭā nirāśiṣaḥ /
mānavā jñānasammohāttataḥ kāmaṃ prayānti vai //

kāmātkrodhamavāpyātha lobhamohau ca mānavāḥ /
mānadarpāvahankāramahankārāttataḥ kriyāḥ //

kriyābhiḥ snehasambandhaḥ snehācchokamanantaram /
atha duḥkhasamārambhā jarājanmakṛtakṣaṇāḥ //

janmato garbhavāsaṃ tu śukraśoṇitasambhavam /
purīṣamūtravikledaṃ śoṇitaprabhavāvilam //

tṛṣṇābhibhūtastairvaddhastānevābhipariplavan / tathā narakagartasthastṛṣṇārajjubhirācitaḥ /
puṇyapāpapraṇunnāṅgo jāyate sa yathā kṛmiḥ //

maśakairmatkuṇairdaṣṭastathā citravadhārditaḥ /
nānāvyādhibhirākīrṇaḥ kathañcidyauvanaṃ gataḥ //

kūrmotsṛjati bhūyaśca rajjuḥ svasvamukhepsayā /
yoṣitaṃ narakaṃ gṛhya janmakarmavaśānugaḥ //

purakṣetranimittaṃ yadduḥkhaṃ vaktuṃ na śakyate /
kastatra nindakaścaiva narake pacyate bhṛśam //

vārdhakyamanulaṅgheta tatra karmārabhetpunaḥ /
bhagavānsaṃstutaḥ paścātkiṃ pravakṣyāmi te bhṛśam //

saṃsāratantravāhinyastatra buddhyeta yoṣitaḥ / prakṛtyāḥ kṣetrabhūtāstā narāḥ kṣetrajñalakṣaṇāḥ /
tasmādevāviśeṣeṇa naro'tīyādviśeṣataḥ //

kṛtyā hyetā ghorarūpā mohayantyavicakṣaṇān /
rajasyantarhitā mūrtirindriyāṇāṃ sanātanī //

tasmāttarṣātmakādrāgādbījājjāyanti jantavaḥ / svadehajānasvasañjñānyadvadaṅgātkṛmīṃstyajet /
svasañjñānasvakāṃstadvatsutasañjñānkṛmīṃstyajet //

śukrato rasataścaiva dehājjāyanti jantavaḥ /
svabhāvātkarmayogādvā tānupekṣeta buddhimān //

rajastamasi paryastaṃ satvaṃ ca rajasi sthitam /
jñānādhiṣṭhānamajñānaṃ buddhyaṃhankāralakṣaṇam //

tadbījaṃ dehināmāddustadbījaṃ jīvasañjñitam /
karmaṇā kālayuktena saṃsāraparivartanam //

ramatyayaṃ yathā svapne manasā dehavāniva /
karmagarbhairguṇairdehī garbhe tadupalabhyate //

karmaṇā bījabhūtena codyate yadyadindriyam /
jāyate tadahankārādrāgayuktena cetasā //

śabdarāgācchrotramasya jāyate bhāvitātmanaḥ /
rūparāgāttathā cakṣurghrāṇaṃ gandhajighṛkṣayā //

saṃsparśebhyastathā vāyuḥ prāṇāpānavyapāśrayaḥ /
vyānodānau samānaśca pañcadhā dehayāpanam //

sañjātairjāyate gātraiḥ karmajairbrahmaṇā vṛtaḥ /
duḥkhādyantairduḥkhamadhyairnaraḥ śārīramānasaiḥ //

duḥkhaṃ vidyādupādānādabhimānācca vardhate /
tyāgāttebhyo nirodhaḥ syānnirodhajño vimucyate //

indriyāṇāṃ rajasyeva pralayaprabhavāvubhau /
parīkṣya sañcaredvidvānyathāvacchāstracakṣuṣā //

jñānendriyāṇīndriyārthānnopasarpantyatarṣulam /
jñānaiśca karaṇairdehī na dehaṃ punanarhati //