Mahabharata · Chapter 12.198

kimuttaraṃ tadā tau sma cakratustasya bhāṣite /
brāhmaṇo vā'thavā rājā tanme brūhi pitāmaha //

athavā tau gatau tatra yadetatkīrtitaṃ tvayā /
saṃvādo vā tayoḥ ko'bhūtkiṃ vā tau tatra cakratuḥ //
bhīṣma uvāca /

tathetyevaṃ pratiśrutya dharmaṃ sampūjya jāpakaḥ /
yamaṃ kālaṃ ca mṛtyuṃ ca svargaṃ sampūjya cārhataḥ //

pūrvaṃ ye cāpare tatra sametā brāhmaṇarṣabhāḥ /
sarvānsampūjya śirasā rājānaṃ so'bravīddvijaḥ //

phalenānena saṃyukto rājarṣe gaccha mukhyatām /
bhavatā cābhyanujñāto japeyaṃ bhūya eva ha //

varaśca mama pūrvaṃ hi datto devyā mahābala /
śraddhā te japato nityaṃ bhavatviti viśāmpate //
rājovāca /

yadyevaṃ saphalā siddhiḥ śraddhā ca japituṃ tava /
gaccha vipra mayā sārdhaṃ jāpakaṃ phalamāpnuhi //
brāhmaṇa uvāca /

kṛtaḥ prayatnaḥ sumahānsarveṣāṃ sannidhāviha /
saha tulyaphalāvāvāṃ gacchāvo yatra nau gatiḥ //
bhīṣma uvāca /

vyavasāyaṃ tayostatra viditvā tridaśeśvaraḥ /
saha devairupayayau lokapālaistathaiva ca //

sādhyāśca viśve maruto vākyāni sumahānti ca /
nadyaḥ śailāḥ samudrāśca tīrthāni vividhāni ca //

tapāṃsi saṃyogavidhirvedāstobhāḥ sarasvatī /
nāradaḥ parvataścaiva viśvāvasurhahāhuhūḥ //

gandharvaścitrasenaśca parivāragaṇairyutaḥ /
nāgāḥ siddhāśca munayo devadevaḥ prajāpatiḥ //

ājagāma ca deveśo brahmā vedamayo'vyayaḥ / viṣṇuḥ sahasraśīrṣaśca devo'cintyaḥ samāgamat /
avādyantāntarikṣe ca bheryastūryāṇi vā vibho //

puṣpavarṣāṇi divyāni tatra teṣāṃ mahātmanām /
nanṛtuścāpsaraḥ saṅghāstatratatra samantataḥ //

atha svargastathā rūpī brāhmaṇaṃ vākyamabravīt /
saṃsiddhastvaṃ mahābhāga tvaṃ ca siddhastathā nṛpa //
bhīṣma uvāca /

atha tau sahitau rājannanyonyasya vidhānataḥ /
viṣayapratisaṃhāramubhāveva pracakratuḥ //

prāṇāpānau tathodānaṃ samānaṃ vyānameva ca /
evaṃ tau manasi sthāpya dadhatuḥ prāṇayormanaḥ //

upasthitakṛtau tau ca nāsikāgramadho bhruvoḥ /
bhrukuṭyākṣṇośca manasā śanairdhārayatastadā //

niśceṣṭābhyāṃ śarīrābhyāṃ sthiradṛṣṭī samāhitau /
jitāsanau samādhāya rmūrdhanyātmānameva ca //

tāludeśamathoddālya brāhmaṇasya mahātmanaḥ /
jyotirjvālā sumahatī jagāma tridivaṃ tadā //

hāhākārastathā dikṣu sarvāsu sumahānabhūt /
tajjyotiḥ stūyamānaṃ sma brahmāṇaṃ prāviśattadā //

tataḥ svāgatamityāha tattejaḥ prapitāmahaḥ /
prādeśamātraṃ puruṣaṃ pratyudgamya viśāmpate //

bhūyaścaivāparaṃ prāha vacanaṃ madhuraṃ smayan /
jāpakaistulyaphalatā yogānāṃ nātra saṃśayaḥ //

yogasya tāvadetebhyaḥ pratyakṣaṃ phaladarśanam /
jāpakānāṃ viśiṣṭaṃ tu pratyutthānaṃ samāhitam //

uṣyatāṃ mayi cetyuktvā vyādade sa tato mukham /
athāsyaṃ praviveśāsya brāhmaṇo vigatajvaraḥ //

rājā'pyetena vidhinā bhagavantaṃ pitāmaham /
yathaiva dvijaśārdūlastathaiva prāviśattadā //

svayambhuvamatho devā abhivādya tato'bruvan //

jāpakārthamayaṃ yatno yadarthaṃ vayamāgatāḥ /
kṛtapūjāvimau tulyau tvayā tulyaphalānvitau //

yogajāpakayostulyaṃ phalaṃ sumahadadya vai /
sarvāṃllokānatikramya gacchetāṃ yatra vāñchitam //
brahmovāca /

mahāsmṛtiṃ paṭhedyastu tathaivānusmṛtiṃ śubhām /
tāvapyetena vidhinā gacchetāṃ matsalokatām //

yaśca yoge bhavedbhaktaḥ so'pi nāstyatra saṃśayaḥ / vidhinānena dehānte mama lokānavāpnuyāt /
sādhaye gamyatāṃ caiva yathā sthānāni siddhaye //
bhīṣma uvāca /

ityuktvā sa tadā devastatraivāntaradhīyata /
āmantrya ca tato devā yayuḥ svaṃsvaṃ niveśanam //

te ca sarve mahātmāno dharmaṃ satkṛtya tatra vai /
pṛṣṭhato'nuyayū rājansarve suprītacetasaḥ //

etatphalaṃ jāpakānāṃ gatiścaiṣā prakīrtitā /
yathāśrutaṃ mahārāja kiṃ bhūyaḥ śrotumicchasi //