મહાભારત · અધ્યાય 12.198

કિમુત્તરં તદા તૌ સ્મ ચક્રતુસ્તસ્ય ભાષિતે ।
બ્રાહ્મણો વાઽથવા રાજા તન્મે બ્રૂહિ પિતામહ ॥

અથવા તૌ ગતૌ તત્ર યદેતત્કીર્તિતં ત્વયા ।
સંવાદો વા તયોઃ કોઽભૂત્કિં વા તૌ તત્ર ચક્રતુઃ ॥
ભીષ્મ ઉવાચ ।

તથેત્યેવં પ્રતિશ્રુત્ય ધર્મં સમ્પૂજ્ય જાપકઃ ।
યમં કાલં ચ મૃત્યું ચ સ્વર્ગં સમ્પૂજ્ય ચાર્હતઃ ॥

પૂર્વં યે ચાપરે તત્ર સમેતા બ્રાહ્મણર્ષભાઃ ।
સર્વાન્સમ્પૂજ્ય શિરસા રાજાનં સોઽબ્રવીદ્દ્વિજઃ ॥

ફલેનાનેન સંયુક્તો રાજર્ષે ગચ્છ મુખ્યતામ્ ।
ભવતા ચાભ્યનુજ્ઞાતો જપેયં ભૂય એવ હ ॥

વરશ્ચ મમ પૂર્વં હિ દત્તો દેવ્યા મહાબલ ।
શ્રદ્ધા તે જપતો નિત્યં ભવત્વિતિ વિશામ્પતે ॥
રાજોવાચ ।

યદ્યેવં સફલા સિદ્ધિઃ શ્રદ્ધા ચ જપિતું તવ ।
ગચ્છ વિપ્ર મયા સાર્ધં જાપકં ફલમાપ્નુહિ ॥
બ્રાહ્મણ ઉવાચ ।

કૃતઃ પ્રયત્નઃ સુમહાન્સર્વેષાં સન્નિધાવિહ ।
સહ તુલ્યફલાવાવાં ગચ્છાવો યત્ર નૌ ગતિઃ ॥
ભીષ્મ ઉવાચ ।

વ્યવસાયં તયોસ્તત્ર વિદિત્વા ત્રિદશેશ્વરઃ ।
સહ દેવૈરુપયયૌ લોકપાલૈસ્તથૈવ ચ ॥

સાધ્યાશ્ચ વિશ્વે મરુતો વાક્યાનિ સુમહાન્તિ ચ ।
નદ્યઃ શૈલાઃ સમુદ્રાશ્ચ તીર્થાનિ વિવિધાનિ ચ ॥

તપાંસિ સંયોગવિધિર્વેદાસ્તોભાઃ સરસ્વતી ।
નારદઃ પર્વતશ્ચૈવ વિશ્વાવસુર્હહાહુહૂઃ ॥

ગન્ધર્વશ્ચિત્રસેનશ્ચ પરિવારગણૈર્યુતઃ ।
નાગાઃ સિદ્ધાશ્ચ મુનયો દેવદેવઃ પ્રજાપતિઃ ॥

આજગામ ચ દેવેશો બ્રહ્મા વેદમયોઽવ્યયઃ । વિષ્ણુઃ સહસ્રશીર્ષશ્ચ દેવોઽચિન્ત્યઃ સમાગમત્ ।
અવાદ્યન્તાન્તરિક્ષે ચ ભેર્યસ્તૂર્યાણિ વા વિભો ॥

પુષ્પવર્ષાણિ દિવ્યાનિ તત્ર તેષાં મહાત્મનામ્ ।
નનૃતુશ્ચાપ્સરઃ સઙ્ઘાસ્તત્રતત્ર સમન્તતઃ ॥

અથ સ્વર્ગસ્તથા રૂપી બ્રાહ્મણં વાક્યમબ્રવીત્ ।
સંસિદ્ધસ્ત્વં મહાભાગ ત્વં ચ સિદ્ધસ્તથા નૃપ ॥
ભીષ્મ ઉવાચ ।

અથ તૌ સહિતૌ રાજન્નન્યોન્યસ્ય વિધાનતઃ ।
વિષયપ્રતિસંહારમુભાવેવ પ્રચક્રતુઃ ॥

પ્રાણાપાનૌ તથોદાનં સમાનં વ્યાનમેવ ચ ।
એવં તૌ મનસિ સ્થાપ્ય દધતુઃ પ્રાણયોર્મનઃ ॥

ઉપસ્થિતકૃતૌ તૌ ચ નાસિકાગ્રમધો ભ્રુવોઃ ।
ભ્રુકુટ્યાક્ષ્ણોશ્ચ મનસા શનૈર્ધારયતસ્તદા ॥

નિશ્ચેષ્ટાભ્યાં શરીરાભ્યાં સ્થિરદૃષ્ટી સમાહિતૌ ।
જિતાસનૌ સમાધાય ર્મૂર્ધન્યાત્માનમેવ ચ ॥

તાલુદેશમથોદ્દાલ્ય બ્રાહ્મણસ્ય મહાત્મનઃ ।
જ્યોતિર્જ્વાલા સુમહતી જગામ ત્રિદિવં તદા ॥

હાહાકારસ્તથા દિક્ષુ સર્વાસુ સુમહાનભૂત્ ।
તજ્જ્યોતિઃ સ્તૂયમાનં સ્મ બ્રહ્માણં પ્રાવિશત્તદા ॥

તતઃ સ્વાગતમિત્યાહ તત્તેજઃ પ્રપિતામહઃ ।
પ્રાદેશમાત્રં પુરુષં પ્રત્યુદ્ગમ્ય વિશામ્પતે ॥

ભૂયશ્ચૈવાપરં પ્રાહ વચનં મધુરં સ્મયન્ ।
જાપકૈસ્તુલ્યફલતા યોગાનાં નાત્ર સંશયઃ ॥

યોગસ્ય તાવદેતેભ્યઃ પ્રત્યક્ષં ફલદર્શનમ્ ।
જાપકાનાં વિશિષ્ટં તુ પ્રત્યુત્થાનં સમાહિતમ્ ॥

ઉષ્યતાં મયિ ચેત્યુક્ત્વા વ્યાદદે સ તતો મુખમ્ ।
અથાસ્યં પ્રવિવેશાસ્ય બ્રાહ્મણો વિગતજ્વરઃ ॥

રાજાઽપ્યેતેન વિધિના ભગવન્તં પિતામહમ્ ।
યથૈવ દ્વિજશાર્દૂલસ્તથૈવ પ્રાવિશત્તદા ॥

સ્વયમ્ભુવમથો દેવા અભિવાદ્ય તતોઽબ્રુવન્ ॥

જાપકાર્થમયં યત્નો યદર્થં વયમાગતાઃ ।
કૃતપૂજાવિમૌ તુલ્યૌ ત્વયા તુલ્યફલાન્વિતૌ ॥

યોગજાપકયોસ્તુલ્યં ફલં સુમહદદ્ય વૈ ।
સર્વાંલ્લોકાનતિક્રમ્ય ગચ્છેતાં યત્ર વાઞ્છિતમ્ ॥
બ્રહ્મોવાચ ।

મહાસ્મૃતિં પઠેદ્યસ્તુ તથૈવાનુસ્મૃતિં શુભામ્ ।
તાવપ્યેતેન વિધિના ગચ્છેતાં મત્સલોકતામ્ ॥

યશ્ચ યોગે ભવેદ્ભક્તઃ સોઽપિ નાસ્ત્યત્ર સંશયઃ । વિધિનાનેન દેહાન્તે મમ લોકાનવાપ્નુયાત્ ।
સાધયે ગમ્યતાં ચૈવ યથા સ્થાનાનિ સિદ્ધયે ॥
ભીષ્મ ઉવાચ ।

ઇત્યુક્ત્વા સ તદા દેવસ્તત્રૈવાન્તરધીયત ।
આમન્ત્ર્ય ચ તતો દેવા યયુઃ સ્વંસ્વં નિવેશનમ્ ॥

તે ચ સર્વે મહાત્માનો ધર્મં સત્કૃત્ય તત્ર વૈ ।
પૃષ્ઠતોઽનુયયૂ રાજન્સર્વે સુપ્રીતચેતસઃ ॥

એતત્ફલં જાપકાનાં ગતિશ્ચૈષા પ્રકીર્તિતા ।
યથાશ્રુતં મહારાજ કિં ભૂયઃ શ્રોતુમિચ્છસિ ॥