Mahabharata · Chapter 12.192

adhyātmaṃ nāma yadidaṃ puruṣasyeha cintyate /
yadadhyātmaṃ yathā caitattanme brūhi pitāmaha //

kutaḥ sṛṣṭamidaṃ sarvaṃ brahmansthāvarajaṅgamam /
pralaye ca kamabhyeti tanme vaktumihārhasi //
bhīṣma uvāca /

adhyātmamiti māṃ pārtha yadetadanupṛcchasi /
tadvyākhyāsyāmi te tāta śreyaskaratamaṃ śubham //

[sṛṣṭipralayasaṃyuktamācāryaiḥ paridarśitam.] yajjñātvā puruṣo leke prītiṃ saukhyaṃ ca vindati /
phalalābhaśca tasya syātsarvabhūtahitaṃ ca tat //

ātmānamamalaṃ rājannāvṛtyaivaṃ vyavasthitam /
tasminprakāśate nityaṃ tamaḥ somo yathaiva tat //

tadvidvānnaṣṭayāpmaiṣa brahmabhūyāya kalpate / aṇḍāvaraṇabhūtānāṃ paryantaṃ hi yathā tamaḥ //

pṛthivī vāyurākāśamāpo jyotiśca pañcamam /
mahābhūtāni bhūtānāṃ sarveṣāṃ prabhavāpyayau //

yataḥ sṛṣṭāni tatraiva tāni yānti punaḥpunaḥ /
mahābhūtāni bhūtebhyaḥ sāgarasyormayo yathā //

prasārya ca yathāṅgāni kūrmaḥ saṃharate punaḥ /
tadvadbhūtāni bhūtātmā sṛṣṭvā saṃharate punaḥ //

sa teṣāṃ guṇasanghātaḥ śarīre bharatarṣabha /
satataṃ pravilīyante guṇāste prabhavanti ca //

yadvinā naiva śṛṇute na paśyati na dīpyate /
yadadhīnaṃ yatastasmādadhyātmamiti kathyate //

jñānaṃ tadekarūpākhyaṃ nānāprajñānvitaṃ tadā /
na tevācā'nurūpaṃ syādyayā rāsavivarjitam //

ākāśātkhalu yājyeṣu bhavanti sumahāguṇāḥ / iti tanmayamevaitatsarvaṃ sthāvarajaṅgamam /

pralaye ca tamabhyeti tasmādutsṛjyate punaḥ / mahābhūteṣu bhūtātmā sṛṣṭvā saṃharate punaḥ //

mahābhūtāni pañcaiva sarvabhūteṣu bhūtakṛt /
akarotteṣu vaiṣamya tattu jīvo na paśyati //

śabdaḥ śrotraṃ tathā khāni trayamākāśasambhavam /
vāyoḥ sparśastathā ceṣṭā tvakcaiva tritayaṃ smṛtam //

rūpaṃ cakṣustathā pākastrividhaṃ teja ucyate /
rasaḥ kledaśca jihvā ca trayo jalaguṇāḥ smṛtāḥ //

ghreyaṃ ghrāṇaṃ śarīraṃ ca ete bhūmiguṇāstrayaḥ /
mahābhūtāni pañcaiva ṣaṣṭhaṃ ca mana ucyate //

indriyāṇi manaścaiva vijñānānyasya bhārata /
saptamī buddhirityāhuḥ kṣetrajñaḥ punaraṣṭamaḥ //

cakṣurālocanāyaiva saṃśayaṃ kurute manaḥ /
buddhiradhyavasānāya kṣetrajñaḥ sākṣivatsthitaḥ //

cicchaktyādhiṣṭhitā buddhiścetanetyabhiviśrutā /
cetanānantaro jīvastadā vetti ca lakṣyate //

notsṛjanvisṛjaṃścaiva śarīraṃ dṛśyate tamaḥ /
tasmiṃścetopalabdhiḥ syāttamo vā sārayantyuta //

ūrdhvaṃ pādatalābhyāṃ yadarvākcordhvaṃ ca paśyati /
etena sarvamevedaṃ biddhyabhivyāptamantaram //

puruṣairindriyāṇīha vijetavyāni kṛtsnaśaḥ /
tamo rajaśca satvaṃ ca te'pi bhāvāstadāśritāḥ //

etāṃ buddhvā naro buddhyā bhūtānāmāgatiṃ gatim /
samavekṣya śanaiścaiva labhate śamamuttamam //

guṇairnenīyate buddhirbuddhirevendriyāṇyapi /
manaḥṣaṣṭhāni sarvāṇi buddhyabhāve kuto guṇāḥ //

iti tanmayamevaitatsarvaṃ sthāvarajaṅgamam /
pralīyate codbhavati tasmānnirdiśyate tathā //

yena paśyati taccakṣuḥ śṛṇoti śrotramucyate /
jighrati ghrāṇamityāhū rasaṃ jānāti jihvayā //

tvacā sparśayate sparśaṃ buddhirvikriyate'sakṛt /
yena sankalpayatyarthaṃ kiñcidbhavati tanmanaḥ //

adhiṣṭhānāni buddherhi pṛthagarthāni pañcadhā /
pañcendriyāṇi yānyāhustānyadṛśyo'dhitiṣṭhati //

puruṣādhiṣṭhitā buddhistriṣu bhāveṣu vartate /
kadācillabhate prītiṃ kadācidanuśocati //

na sukhena na duḥkhena kadācidapi vartate /
evaṃ narāṇāṃ manasi triṣu bhāveṣvavasthitā //

seyaṃ bhāvātmikā bhāvāṃstrīnetānativartate /
saritāṃ sāgaro bhartā mahāvelāmivormimān //

avibhāgagatā buddhirbhāve manasi vartate /
pravartamānaṃ tu rajastadbhāvamanuvartate //

indriyāṇi hi sarvāṇi pravartayati sā tadā /
tataḥ satvaṃ tamo bhāvaḥ prātiyogātpravartate //

prītiḥ satvaṃ rajaḥ śokastamo mohastu te trayaḥ /
yeye ca bhāvā loke'sminsarveṣveteṣu vai triṣu //

iti buddhigatiḥ sarvā vyākhyātā tava bhārata /
indriyāṇi ca sarvāṇi vijetavyāni dhīmatā //

satvaṃ rajastamaścaiva prāṇināṃ saṃśritāḥ sadā /
trividhā vedanā caiva sarvasatveṣu dṛśyate //

sātvikī rājasī caiva tāmasī ceti bhārata / sukhasparśaḥ sattvaguṇo duḥkhasparśo rajoguṇaḥ /
tamoguṇena saṃyuktau bhavato vyāvahārikau //

tatra yatprītisaṃyuktaṃ kāye manasi vā bhavet /
vartate sātviko bhāva ityupekṣeta tattathā //

atha yadduḥkhasaṃyuktamaprītikaramātmanaḥ /
pravṛttaṃ raja ityeva tanna saṃrabhya cintayet //

atha yanmohasaṃyuktamavyaktaviṣayaṃ bhavet / apratarkyamavijñeyaṃ tamastadupadhārayet /

praharṣaḥ prītirānandaḥ sukhaṃ saṃśāntacittatā /
kathañcidabhivartanta ityete sātvikā guṇā //

atuṣṭiḥ paritāpaśca śoko lobhastathā'kṣamā /
liṅgāni rajasastāni dṛśyante hetvahetubhiḥ //

abhimānastathā mohaḥ pramādaḥ svapnatandritā /
kathañcidabhivartante vividhāstāmasā guṇāḥ //

dūragaṃ bahudhāgāmi prārthanāsaṃśayātmakam /
manaḥ suniyataṃ yasya sa sukhī pretya ceha ca //

satvakṣetrajñayoretadantaraṃ paśya sūkṣmayoḥ /
sṛjate tu guṇāneka eko na sṛjate guṇān //

maśakodumbarau vā'pi samprayuktau yathā sadā /
anyonyametau syātāṃ ca samprayogastathā tayoḥ //

pṛthagbhūtau prakṛtyā tau samprayuktau ca sarvadā /
yathā matsyo jalaṃ caiva samprayuktau tathaiva tau //

na guṇā vidurātmānaṃ sa guṇānveti sarvaśaḥ /
paridraṣṭā guṇānāṃ sa saṃsṛṣṭānmanyate tathā //

indriyaistu pradīpārthaṃ kurute buddhisaptamaiḥ /
nirviceṣṭairajānadbhiḥ paramātmā pradīpavat //

sṛjate hi guṇānsatvaṃ kṣetrajñaḥ paripaśyati /
samprayogastayoreṣa satvakṣetrajñayordhruvaḥ //

āśrayo nāsti satvasya kṣetrajñasya ca kaścana /
satvaṃ manaḥ saṃsṛjate na guṇānvai kadācana //

raśmīsteṣāṃ sa manasā yadā samyaṅgiyacchati /
tadā prakāśate'syātmā ghaṭe dīpo jvalanniva //

tyaktvā yaḥ prākṛtaṃ karma nityamātmaratirmuniḥ /
sarvabhūtātmabhūstasmātsa gaccheduttamāṃ gatim //

yathā vāricaraḥ pakṣī salilena na lipyate /
evameva kṛtaprajño bhūteṣu parivartate //

evaṃ svabhāvamevaitatsvabuddhyā viharennaraḥ /
aśocannaprahṛṣyaṃśca caredvigatamatsaraḥ //

svabhāvasiddhyā yuktastu sa nityaṃ sṛjata guṇān /
ūrṇanābhiryathā sūtraṃ vijñeyāstantuvadguṇāḥ //

pradhvastā na nivarntate nivṛttirnopalabhyate /
pratyakṣeṇa parokṣaṃ tadanumānena sidhyati //

evameke'dhyavasyanti nivṛttiriti cāpare /
ubhayaṃ sampradhāryaitadvyavasyeta yathāmati //

itīmaṃ hṛdayagratthiṃ buddhibhedamayaṃ dṛḍham /
vimucya sukhamāsīta na śocecchinnasaṃśayaḥ //

malināḥ prāpnuyuḥ śuddhiṃ yathā pūrṇāṃ nadīṃ narāḥ /
avagāhya suvidvāṃso viddhi jñānamidaṃ tathā //

mahānadyā hi pārajñastapyate na tadanyathā /
na tu tapyati tattvajñaḥ phale jñāte taratyuta //

evaṃ ye vidurādhyātmaṃ kevalaṃ jñānamuttamam //

etāṃ buddhā naraḥ sarvāṃ bhūtānāmāgatiṃ gatim /
avekṣya ca śanairbuddhyā labhate śamamuttamam //

trivargo yasya viditaḥ prekṣya taṃ sa vimucyate /
anvīkṣya manasā yuktastattvadarśī nirutsukaḥ //

na cātmā śakyate draṣṭumindriyeṣu vibhāgaśaḥ /
tatratatra visṛṣṭeṣu durvāryeṣvakṛtātmabhiḥ //

etadbuddhā bhavedbuddhaḥ kimanyadbuddhilakṣaṇam /
pratigṛhya ca nihnoti hyanyathā ca pradṛśyate //

na sarpati ca yaṃ prāhuḥ sarvatra pratihanyate /
dhūmena cāprasanno'gniryathā'rkaṃ na pravartayet //

dhiṣṇyādhipe prasanne tu sthitimetāṃ nirīkṣate /
atikṣūrācca sūkṣmatvātprasthānaṃ na prakāśate //

prapadya tacchrutāhnāni cinmayaṃ svīkṛtaṃ vinā /
vijñāya taddhi manyante kṛtakṛtyā manīṣiṇaḥ //

na bhavati viduṣāṃ tato bhayaṃ yadaviduṣāṃ sumahadbhayaṃ bhavet /
na hi gatiradhikāsti kasyaci tsati hi guṇe pravadantyatulyatām //

yaḥ karotyanabhisandhipūrvakaṃ tacca nirṇudati yatpurā kṛtam /
nāpriyaṃ tadubhayaṃ kutaḥ priyaṃ tasya tajjanayatīha sarvataḥ //

lokamāturamasūyate jana stasya tajjanayatīha sarvataḥ /
loka āturajanānvirāviṇa stattadeva bahu paśya śocataḥ / tatra paśya kuśalānaśocato
ye vidustadubhayaṃ padaṃ satām //