Mahabharata · Chapter 12.191

ācārasya vidhiṃ tāta procyamānaṃ tvayā'nagha /
śrotumicchāmi dharmajña sarvajño hyasi me mataḥ //
bhīṣma uvāca /

durācārā durviceṣṭā duṣprajñāḥ priyasāhasāḥ /
asantastvabhivikhyātāḥ santaścācāralakṣaṇāḥ //

purīṣaṃ yadi vā mūtraṃ ye na kuvanti mānavāḥ / rājamārge gavāṃ madhye dhānyamadhye śivālaye /
agnyagāre tathā tīre ye na kurvanti te śubhāḥ //

śaucamāvaśyakaṃ kṛtvā devatānāṃ ca tarpaṇam /
dharmamāhurmanuṣyāṇāmupaspṛśya nadīṃ taret //

sūryaṃ sadopatiṣṭhena na svapedbhāskarodaye /
sāyamprātarjapetsandhyāṃ tiṣṭhanpūrvāṃ tathetarām //

pañcārdro bhojanaṃ bhuñjyātprādbhukho maunamāsthitaḥ /
na nindyādannabhakṣyāṃśca svādusvādu ca bhakṣayet //

nārdrapāṇiḥ samuttiṣṭhennārdrapādaḥ svapenniśi /
devarṣirnāradaḥ prāha etadācāralakṣaṇam //

śociṣkeśamanaḍvāhaṃ devagoṣṭhaṃ catuṣpatham /
brāhmaṇaṃ dhārmikaṃ caiva nityaṃ kuryātpradakṣiṇam //

atithīnāṃ ca sarveṣāṃ preṣyāṇāṃ svajanasya ca /
sāmātyaṃ bhojanaṃ bhṛtyaiḥ puruṣasya praśasyate //

sāyamprātarmanuṣyāṇāmaśanaṃ vedanirmitam /
nāntarā bhojanaṃ dṛṣṭamupavāsī tathā bhavet //

homakāle tathnā juhvannṛtukāle tathā vrajan /
ananyastrījanaḥ prājño brahmacārī tathā bhavet //

amṛtaṃ brāhmaṇocchiṣṭaṃ jananyā hṛdayaṃ kṛtam /
tajjanāḥ paryupāsante satyaṃ santaḥ samāsate //

loṣṭamadīṃ tṛṇacchedī nakhakhādī tu yo naraḥ /
nityocchiṣṭaḥ sankasuko nehāyurvindate mahat //

yajuṣā saṃskṛtaṃ māṃsaṃ nivṛtto māṃsabhakṣaṇāt /
bhakṣayenna vṛthāmāṃsaṃ pṛṣṭhamāṃsaṃ ca varjayet //

svadeśe paradeśe vā atirthi nopavāsayet /
kāmyakarmaphalaṃ labdhvā gurūṇāmupapādayet //

gurūṇāmāsanaṃ deyaṃ kartavyaṃ cābhivādanam /
gurūnabhyarcya yujyeta āyuṣā yaśasā śriyā //

nekṣetādityamudyantaṃ na ca nagnāṃ parastriyam /
maithunaṃ satataṃ dharmyaṃ guhye caiva samācaret //

tīrthānāṃ hṛdayaṃ tīrthaṃ śucīnāṃ hṛdayaṃ śuciḥ /
sarvamāryakṛtaṃ dharmyaṃ vālasaṃsparśanāni ca //

darśanedarśane nityaṃ sukhapraśnamudāharet /
sāyaṃ prātaśca viprāṇāṃ pradiṣṭamabhivādanam //

devagoṣṭhe gavāṃ madhye brāhmaṇānāṃ kriyāpathe /
svādhyāye bhojane caiva dakṣiṇaṃ pāṇimuddharet //

sāyaṃ prātaśca viprāṇāṃ pūjanaṃ ca yathāvidhi / paṇyānāṃ śobhate paṇyaṃ kṛṣīṇāmṛddhyatāṃ kṛṣiḥ /
bahukāraṃ ca sasyānāṃ vāhye vāho gavāṃ tathā //

sampannaṃ bhojane nityaṃ pānīye tarpaṇaṃ tathā /
suśṛtaṃ pāyase brūyādyavāgvāṃ kṛsare tathā //

śmaśrukarmaṇi samprāpte kṣute snāne'tha bhojane /
vyādhitānāṃ ca sarveṣāmāyuṣmamabhinandanam //

pratyādityaṃ na meheta na paśyedātmanaḥ śakṛt /
sutaiḥ striyā ca śayanaṃ saha bhojyaṃ ca varjayet //

tvankāraṃ nāmadheyaṃ ca jyeṣṭhānāṃ parivarjayet /
avarāṇāṃ samānānāmubhayaṃ naiva duṣyati //

hṛdayaṃ pāpavṛttānāṃ pāpamākhyāti vaikṛtam /
jñānapūrvaṃ vinaśyanti gūhamānā mahājane //

jñānapūrvakṛtaṃ pāpaṃ chādayantyabahuśrutāḥ /
nainaṃ manuṣyāḥ paśyanti paśyantyeva divaukasaḥ //

pāpenāpihitaṃ pāpaṃ pāpamevānuvartate / dharmeṇāpihito dharmo dharmamevānuvartate /
dhārmikeṇa kṛto dharmo dharmamevānuvartate //

pāpaṃ kṛtaṃ na smaratīha mūḍho vivartamānasya tadeti kartuḥ /
rāhuryathā candramupaiti cāpi tathā'budhaṃ pāpamupaiti karma //

āśayā sañcitaṃ dravyaṃ duḥkhenaivopabhujyate /
tadbudhā na praśaṃsanti maraṇaṃ na pratīkṣate //

mānasaṃ sarvabhūtānāṃ dharmamāhurmanīṣiṇaḥ /
tasmātsarveṣu bhūteṣu manasā śivamācaret //

eka eva careddharmaṃ nāsti dharme sahāyatā /
kevalaṃ vidhimāsādya sahāyaḥ kiṃ kariṣyati //

dharmo yonirmanuṣyāṇāṃ devānāmamṛtaṃ divi /
pretyabhāve sukhaṃ dharmācnchaśvattairupabhujyate //