Mahabharata · Chapter 12.189

dānasya kiṃ phalaṃ proktaṃ dharmasya caritasya ca /
tapasaśca sutaptasya svādhyāyasya hutasya vā //
bhṛguruvāca /

hutena śāmyate pāpaṃ svādhyāyaiḥ śāntiruttamā /
dānena bhoga ityāhustapasā sarvamāpnuyāt //

dānaṃ tu dvividhaṃ prāhuḥ paratrārthamihaiva ca /
sadbhyo yaddīyate kiñcittatparatropatiṣṭhate //

asadbhyo dīyate yattu taddānamiha bhujyate /
yādṛśaṃ dīyate dānaṃ tādṛśaṃ phalamucyate //
bharadvāja uvāca /

kiṃ kasya dharmācaraṇaṃ kiṃ vā dharmasya lakṣaṇam /
dharmaḥ katividho vā'pi tadbhavānvaktumarhati //
bhṛguruvāca /

svadharmācaraṇe yuktā ye bhavanti manīṣiṇaḥ /
teṣāṃ svargaphalāvāptiryo'nyathā sa vimuhyate //
bharadvāja uvāca /

yadetaccāturāśramyaṃ brahmarṣivihitaṃ purā /
tasya svaṃsvaṃ samācāraṃ yathāvadvaktumarhasi //
bhṛguruvāca /

pūrvameva bhagavatā brahmaṇā lokahitamanutiṣṭhatā dharmasaṃrakṣaṇārthamāśramāścatvāro'bhinirdiṣṭāḥ / tatra gurukulavāsameva prathamamāśramamudāharanti / samyagyatra śaucasaṃskāraniyamavrataviniyatātmā ubhesandhye bhāskarāgnidaivatānyupasthāya vihāya nidrālasye gurorabhivādananavedābhyāsaśravaṇapavitrīkṛtāntarātmā [triṣavaṇamupaspṛśya brahmacaryāgniparicaraṇaguruśuśrūṣānityabhikṣyādisarvaniveditāntarātmā] guruvacanirdeśānuṣṭhānāpratikūlo guruprasādalabdhasvādhyāyatatparaḥ syāt //
bhavati cātra ślokaḥ /

guruṃ yastu samārādhya dvijo vedamavāpnuyāt /
tasya svargaphalāvāptiḥ śudhyate cāsya mānasamiti //

gārhasthyaṃ khalu dvitīyamāśramaṃ vadanti / tasya samudācāralakṣaṇaṃ sarvamanuvyākhyāsyāmaḥ / samāvṛttānāṃ sadācārāṇāṃ sahadharmacaryāphalārthināṃ gṛhāśramo vidhīyate / dharmārthakāmāvāptyarthaṃ trivargasādhanamapekṣyāgarhitena karmaṇā dhanānyādāya svādhyāyopalabdhaprakarṣeṇa vā brahmarṣinirmitena vā / havyakavyaniyamābhyāṃ daivatapūjāsamādhiprasādavidhyupalabdhena dhanena gṛhastho gārhasthyaṃ vartayet / taddhi sarvāśramāṇāṃ mūlamudāharanti / gurukulanivāsinaḥ parivrājakā ye cānye sankalpitavrataniyamadharmānuṣṭhāyinastepāmaṣyata eva bhikṣābalisaṃvibhāgāḥ pravartante //

vānaprasthānāṃ ca dravyopaskāra iti prāyaśaḥ khalvete sādhavaḥ sādhupathyāśinaḥ svādhyāyaprasaṅginastīrthābhigamanadeśadarśanārthaṃ pṛthivīṃ paryaṭanti teṣāṃ pratyutthānābhigamanābhivādanānasūyavākpradānasukhaśaktyāsanasukhaśayanābhyavahārasatkriyāceti //
bhavati cātra ślokaḥ /

atithiryasya bhagnāśo gṛhātpratinivartate /
sa tasya duṣkṛtaṃ dattvā puṇyamādāya gacchati //

api cātra yajñakriyābhirdevatāḥ prīyante nivāpena pitaro vedavidyābhyāsaśravaṇadhāraṇena ṛṣaya apatyotpādanena prajāpatiriti //
ślokau cātra bhavataḥ /

vatsalāḥ sarvabhūtānāṃ vācyāḥ śrotrasukhā giraḥ /
parivādāpavādau ca pāruṣyaṃ cātra garhitam //

avajñānamahankāro dambhaścaiva vigarhitaḥ /
ahiṃsā satyamakrodhaḥ sarvāśramagataṃ tapaḥ //

api cātra mālyābharaṇavastrābhyaṅganityopabhoganṛttagītavāditraśrutisukhanayanābhirāmadarśanānāṃ prāptirbhakṣyabhojyalehyapeyacoṣyāṇāmabhyavahāryāṇāṃ vividhānāmupabhogaḥ svavihārasantoṣaḥ kāmasukhāvāptiriti //
ślokau cātra bhavataḥ /

trivargaguṇanirvṛttiryasya nityaṃ gṛhāśrame /
sa sukhānyanubhūyeha śiṣṭānāṃ gatimāpnuyāt //

uñchavṛttirgṛhastho yaḥ svadharmācaraṇe rataḥ /
tyaktakāmasukhārambhaḥ svargastasya na durlabhaḥ //