Mahabharata · Chapter 12.188

satyaṃ brahma tapaḥ satyaṃ satyaṃ sṛjati ca prajāḥ /
satyena dhāryate lokaḥ svargaṃ satyena gacchati //

anṛtaṃ tamaso rūpaṃ tamasā nīyate hyadhaḥ /
tamograstā na paśyanti prakāśaṃ tamasā'vṛtam //

svargaḥ prakāśa ityāhurnarakaṃ tama eva ca /
satyānṛtāttadubhayaṃ prāpyate jagatīcaraiḥ //

tatra tvevaṃvidhā loke vṛttiḥ satyānṛte bhavet /
dharmādharmau prakāśaśca tamo duḥkhaṃ sukhaṃ tathā //

tatra yatsatyaṃ sa dharmo yo dharmaḥ sa prakāśo yaḥ prakāśastatsukhamiti / tatra yadanṛtaṃ so'dharmo yo'dharmastattamo yattamastadduḥkhamiti //
atrocyate /

śārīrairmānasairduḥkhaiḥ sukhaiścāpyasukhodayaiḥ /
lokasṛṣṭiṃ prapaśyanto na muhyanti vicakṣaṇāḥ //

tatra duḥkhavimokṣārthaṃ prayateta vicakṣaṇaḥ /
sukhaṃ hyanityaṃ bhūtānāmiha loke paratra ca //

rāhugrastasya somasya yathā jyotsnā na bhāsate /
tathā tamobhibhūtānāṃ bhūtānāṃ bhraśyate sukham //

tatkhalu dvividhaṃ sukhamucyate śārīraṃ mānasaṃ ca / iha khalvamuṣmiṃśca loke sarvārambhapravṛttayaḥ sukhārthamabhidhīyante na hyataḥ paraṃ trivargaphalaṃ viśiṣṭataramasti sa eṣa kāmyo guṇaviśeṣo dharmārthaguṇārambhastaddheturasyotpattiḥ sukhaprayojanārtha ārambhaḥ //
bharadvāja uvāca /

yadetadbhavatā'bhihitaṃ sukhānāṃ paramārthasthitiriti tanna gṛhṇīmo na hyeṣāmṛṣīṇāṃ tapasi sthitānāmaprāpya eva kāmyo guṇaviśeṣo na cainamabhilaṣanti ca tapasi śrūyate trilokekṛdbrahmā prabhurekākī tiṣṭhati / brahmacārī na kāmasukheṣvātmānamavadadhāti / apica bhagavānviśveśvara [umāpatiḥ] kāmamabhivartamānamanaṅgatvena nāśamanayat / tasmādbrūmo na tu mahātmabhiḥ pratigṛhīto'yamartho tatveṣa tāvadviśiṣṭo guṇagaṇa iti / naitadbhagavānpratyeti bhagavatoktaṃ sukhānāṃ paramārthasthitiriti lokapravādo hi dvividhaḥ phalodayaḥ sukṛtātsukhamavāpyate duṣkṛtādduḥkhamiti //
bhṛguruvāca /

atrocyate / anṛtātkhalu tamaḥ prādurbhūtaṃ tatastamograstā adharmamevānuvartante na dharmam / krodhalobhamohamadādibhiravacchannā na khalvasmim̐lloke nāmutra sukhamāpnuvanti / vividhavyādhivraṇarujopatāpairavakīryante / vadhabandhananirodhaparikleśādibhiśca kṣutpipāsāśramakṛtairupatāpairupatapyante / caṇḍavātātyuṣṇātiśītakṛtaiśca pratibhayaiḥ śārīrairduḥkhairupatapyante / bandhudhanavinanāśaviprayogakṛtaiśca mānasaiḥ śokairabhibhūyante jarāmṛtyukṛtaiścānyairiti //

yadaitaiḥ śārīrairmānasairduḥkhairna spṛśyate tatsukhaṃ vidyāt /
na caite doṣāḥ svarge prādurbhavanti tatra khalu bhavanti //

susukhaḥ pavanaḥ svarge gandhaśca surabhistathā /
kṣutpipāsāśramo nāsti na jarā na ca pātakam //

nityameva sukhaṃ svarge sukhaṃ duḥkhamihobhayam /
narake duḥkhamevāhuḥ sukhaṃ tu paramaṃ padam //

pṛthivī sarvabhūtānāṃ janitrī tadvidhāḥ striyaḥ /
pumānprajāpatistatra śukraṃ tejomayaṃ viduḥ //

ityetallokanirmāṇaṃ brahmaṇā vihitaṃ purā /
prajā viparivarntate svaiḥ svaiḥ karmabhirāvṛtāḥ //