Mahabharata · Chapter 12.172

vidvānsaṃskārayāmāsa pārthivo rājadharmaṇaḥ /
gandhairbahubhiravyagro dāhayāmāsa pūjitam //

tasya devasya vacanādindrasya bakarāḍiha /
tenaivāmṛtasiktāśca punaḥ sañjīvito bakaḥ //

rājadharmā'pi taṃ prāha sahasrākṣamarindamam /
gautamo brāhmaṇaḥ kvā'sau mucyatāṃ matpriyaḥ sakhā //
bhīṣma uvāca /

tasya vākyaṃ samājñāya kauśikaḥ surasattamaḥ /
gautamaṃ hyabhyanujñāpya prīto'tha gamanotsukaḥ //

pratītaḥ sa gataḥ saumyo rājadharmā svamālayam /
nṛśaṃso gautamo mukto mitradhrukpuruṣādhamaḥ //

sabhāṇḍopaskaro yātaḥ sa tadā śabarālayam /
tatrāsau śabarī dehe prasūto nirayopame //

eṣa śāpo mahāṃstatra muktaḥ suragaṇaistadā //

dagdhe rākṣasarājena khagarāje pratāpinā /
citāyāḥ pārśvato dogdhrī surabhirjīvayacca tam //

tasyā vakrāccyutaḥ pheno dugdhamātrastadā'nagha /
samīraṇāhṛto yātaścitāṃ tāṃ rājadharmaṇaḥ //

devarājastataḥ prāpto virūpākṣapuraṃ tadā / virūpākṣo'pi taṃ śakramayācata punaḥ punaḥ /
kāśyapaśya suto deva bhrātā me jīvatāmiti //

virūpākṣamuvācedamīśvaraḥ pākaśāsanaḥ /
brahmaṇā vyāhṛto roṣādrājadharmā kadācana //

yasmāttvaṃ nāgato draṣṭuṃ mama nityamimāṃ sabhām /
tasmādbako bhavānbhāvī dharmaśīlaḥ parātmavit //

āgamiṣyati te vāsaṃ kadācitpāpakarmakṛt /
śabarāvāsago vipraḥ kṛtaghno vṛṣalīpatiḥ //

yadā nihantā mokṣaste tadā bhāvītyuvāca tam /
tasmādeṣa gato lokaṃ brahmaṇaḥ parameṣṭhinaḥ //
bhīṣma uvāca /

sa cāpi nirayaṃ prāpto duṣkṛtiḥ kulapāṃsanaḥ //

etacchrutvā sabhāmadhye tadvākyaṃ nāraderitam /
mayā'pi tava rājendra yathāvadanuvarṇitam //

brahmaghne ca surāpe ca core bhraṣṭavrate tathā /
niṣkṛtirvihitā rājankṛtaghne nāsti niṣkṛtiḥ //

kutaḥ kṛtaghnasya yaśaḥ kutaḥ sthānaṃ kutaḥ sukham /
aśraddheyaḥ kṛtaghno hi kṛtaghne nāsti niṣkṛtiḥ //

mitradroho na kartavyaḥ puruṣeṇa viśeṣataḥ /
mitradhruṅgirayaṃ ghoraṃ narakaṃ pratipadyate //

kṛtajñamanasā bhāvyaṃ mitrabhāvena cānagha /
mitrātprabhavate sarvaṃ mitraṃ dhanyataraṃ smṛtam //

arthādvā mitralābhādvā mitralābho viśiṣyate /
sulabhā mitrato'rthāstu mitreṇa yatituṃ kṣamam //

mitraṃ cābhimataṃ snigdhaṃ phalaṃ cāpi satāṃ phalam /
satkāraiḥ svajanopetaḥ pūjayeta vicakṣaṇaḥ //

parityājyo budhaiḥ pāpaḥ kadaryaḥ kulapāṃsanaḥ /
mitradrohī kulāṅgāraḥ pāpakarmā kulādhamaḥ //

eṣā sajjanasānnidhye prajñā proktā mayā'nagha /
mitraduhi kṛtaghne ca kiṃ bhūyaḥ śrotumicchasi //
vaiśampāyana uvāca /

etacchrutvā tato vākyaṃ bhīṣmeṇoktaṃ mahātmanā /
yudhiṣṭhiraḥ prītamanā babhūva janamejaya //