Mahabharata · Chapter 12.160

satyaṃ dharmaṃ praśaṃsanti viprarṣipitṛdevatāḥ /
satyamicchāmyahaṃ jñātuṃ tanme brūhi pitāmaha //

satyaṃ kiṃlakṣaṇaṃ rājankathaṃ vā tadavāpyate /
satyaṃ prāpya bhavetkiñca kathaṃ caiva taducyatām //
bhīṣma uvāca /

cāturvarṇyasya dharmāṇāṃ sankaro na praśasyate /
dharmaḥ sādhāraṇaḥ satyaṃ sarvavarṇeṣu bhārata //

satyaṃ satsu sadā dharmaḥ satyaṃ dharmaḥ sanātanaḥ /
satyameva namasyeta satyaṃ hi paramā gatiḥ //

satyaṃ dharmastapoyogaḥ satyaṃ brahma sanātanam /
satyaṃ yajñaḥ paraḥ proktaḥ sarvaṃ satye pratiṣṭhitam //

rūpaṃ yadiha satyasya yathāvadanupūrvaśaḥ /
lakṣaṇaṃ ca pravakṣyāmi satyasyeha parākramam //

prāpyate ca yathā satyaṃ tacca vettumihārhasi /
satyaṃ trayodaśāvadhaṃ sarvalokeṣu bhārata //

satyaṃ ca samatā caiva damaścaiva na saṃśayaḥ /
amātsaryaṃ kṣamā caiva hrīstitikṣā'nasūyatā //

tyāgo dhyānamathāryatvaṃ dhṛtiśca satataṃ dayā /
ahiṃsā caiva rājendra satyākārāstrayodaśa //

satyaṃ nāmāvyayaṃ nityamavikāri tathaiva ca /
sarvadharmāviruddhaṃ ca yogenaitadavāpyate //

ātmanīṣṭe tathā'niṣṭe ripau ca samatā tathā /
icchādveṣaṃ kṣayaṃ prāpya kāmakrodhakṣayaṃ tathā //

damī nānyaspṛhā nityaṃ gāmbhīryaṃ dhairyameva ca /
aśāṭhyaṃ krodhadamanaṃ jñānenaitadavāpyate //

amātsaryaṃ budhāḥ prāhurdāne dharme ca saṃyamaḥ /
avasthitena nityaṃ ca satyenāmatsarī bhavet //

akṣamāyāḥ kṣamāyāśca priyāṇīhāpriyāṇi ca /
kṣamate sa taḥ sādhustataḥ prāpnoti satyatām //

kalyāṇaṃ rute bāḍhaṃ dhīmānna glāyate kvacit /
praśāntavāṅbhanā nityaṃ hrīstu dharmādavāpyate //

dharmārthahetoḥ kṣamate titikṣā dharma uttamaḥ /
lokasangrahaṇārthaṃ vai sā tu dhairyeṇa labhyate //

anasūyā tu gāmbhīryaṃ dānenaitadavāpyate / tyaktasnehasya yastyāgo viṣayāṇāṃ tathaiva ca /
rāgadveṣaprahīṇasya tyāgo bhavati nānyathā //

dhyānaṃ ca śāṭhyamityuktaṃ maunenaitadavāpyate / āryatā nāma bhūtānāṃ yaḥ karoti prayatnataḥ /
śubhaṃ karma nirākāro vītarāgastathaiva ca //

dhṛtirnāma sukhe duḥkhe yayā nāpnoti vikriyām //
tāṃ bhajeta sadā prājño ya icchedbhūtimātmanaḥ //

sarvathā kṣamiṇā bhāvyaṃ tathā satyapareṇa ca /
vītaharṣabhayakrodho dhṛtimāpnoti paṇḍitaḥ //

adrohaḥ sarvabhūteṣu karmaṇā manasā girā /
anugrahaśca dānaṃ ca satāṃ dharmaḥ sanātanaḥ //

ete trayodaśākārāḥ pṛthaksatyaikalakṣaṇāḥ /
bhajante satyameveha bṛṃhayante ca bhārata //

nāntaḥ śakyo guṇānāṃ ca vaktuṃ satyasya pārthiva /
ataḥ satyaṃ praśaṃsanti viprāḥ sapitṛdevatāḥ //

nāsti satyātparo dharmo nānṛtātpātakaṃ param /
sthitirhi satyaṃ dharmasya tasmātsatyaṃ na lopayet //

upaiti satyāddānaṃ hi tathā yajñāḥ sadakṣiṇāḥ /
tretāgnihotraṃ vedāśca ye cānye dharmaniścayāḥ //

aśvamedhasahastraṃ ca satyaṃ ca tulayā dhṛtam /
aśvamedhasahasrāddhi satyameva viśiṣyate //