Mahabharata · Chapter 12.154

bandhutvādathavā sakhyācchālmale nātra saṃśayaḥ /
kasmāttvāṃ rakṣate nityaṃ bhīmaḥ sarvatrago'nilaḥ //

tadbhāvaṃ paramaṃ vāyoḥ śālmake tvamupāgataḥ /
tavāhamasmīti sadā yena rakṣati mārutaḥ //

na taṃ paśyāmyahaṃ vṛkṣaṃ parvataṃ veśma cedṛśam /
yaṃ na vāyubalādbhagnaṃ pṛthivyāmiti me matiḥ //

tvaṃ punaḥ kāraṇairnūnaṃ rakṣyase śālmale yathā /
vāyunā saparīvārastena tiṣṭhasyasaṃśayam //
śālmaliruvāca /

na me vāyuḥ sakhā brahmanna bandhurmama nārada /
ciraṃ me prīyate naiva yena māṃ rakṣate'nilaḥ //

mama tejobalaṃ bhīmaṃ vāyorapi hi nārada /
kalāmaṣṭādaśīṃ prāṇairna me prāpnoti mārutaḥ //

āgacchanparuṣo vāyurmayā viṣṭambhito balāt /
bhañjandrumānparvatāṃśca yaccānyatsthāṇujaṅgamam //

sa mayā bahuśo bhagnaḥ prabhañjanvai prabhañjanaḥ /
tasmānna vibhye devarṣe kruddhādapi samīraṇāt //
nārada uvāca /

śālmale viparītaṃ te darśanaṃ nātra saṃśayaḥ /
na hi vāyorbale nāsti bhūtaṃ tulyabalaṃ kvacit //

indro yamo vaiśravaṇo varuṇaśca jaleśvaraḥ /
naite'pi tulyā marutaḥ kiṃ punastvaṃ vanaspate //

yaśca kaścidapi prāṇī ceṣṭate śālmale bhuvi /
sarvatra bhagavānvāyuśceṣṭāprāṇakaraḥ prabhuḥ //

eṣa ceṣṭayate samyakprāṇinaḥ samyagāyataḥ /
asamyagāyato bhūyaśceṣṭate vikṛtaṃ nṛṣu //

sa tvamevaṃvidhaṃ vāyuṃ sarvasatvabhṛtāṃ varam /
na pūjayasi pūjyantaṃ kimanyadvuddhilāghavāt //

asāraścāpi durmedhāḥ kevalaṃ bahu bhāṣase /
krodhādibhiravacchanno mithyā vadasi śālmale //

mama roṣaḥ samutpannastvayyevaṃ samprabhāṣati /
bravīmyeṣa svayaṃ vāyostava durbhāṣitaṃ bahu //

candanaiḥ syandanaiḥ śālaiḥ saralairdevadārubhiḥ / vetasairdhanvanaiścāpi ye cānye balavattarāḥ /
taiścāpi naivaṃ durbuddhe kṣipto vāyuḥ kṛtātmabhiḥ //

te'pi jānanti vāyośca balamātmana eva ca /
tasmātte nāvamanyante śvasanaṃ tarusattamāḥ //

tvaṃ tu mohānna jānīpe vāyorbalamanantakam /
evaṃ tasmādgamiṣyāmi sakāśaṃ mātariśvanaḥ //