Mahabharata · Chapter 12.153

balinaḥ pratyamitrasya nityamāsannavartinaḥ /
uṇkārāpakārābhyāṃ samarthasyodyatasya ca //

mohādvikatthanāmātrairasāro'lpabalo laghuḥ /
vāgbhirapratirūpābhirabhidruhya pitāmaha //

ātmano balamāsthāya kathaṃ varteta mānavaḥ /
āgacchato'tikruddhasya tasyoddharaṇakāmyayā //
bhīṣma uvāca /

atrāpyudāhantīmamitihāsaṃ purātanam /
saṃvādaṃ bharataśreṣṭha śālmaleḥ pavanasya ca //

himavantaṃ samāsādya mahānāsīdvanaspatiḥ /
varṣapūgābhisaṃvṛddhaḥ śākhāmūlapalāśavān //

tatra sma mattamātaṅgā gharmārtāḥ śramakarśitāḥ /
viśrāmyanti mahābāho tathā'nyā mṛgajātayaḥ //

nalvamāntraparīṇāho ghanacchāyo vanaspatiḥ /
śukaśārikasanghuṣṭaḥ puṣpavānphalavānapi //

sārthakā vaṇijaścāpi tāpasāśca vanaukasaḥ /
vasanti tatra mārgasthāḥ suramye nagasattame //

tasya tā vipulāḥ śākhā dṛṣṭvā skandhaṃ ca sarvaśaḥ /
abhigamyābravīdenaṃ nārado bharatarṣabha //

aho nu ramaṇīyastvamaho cāsi manoharaḥ /
prīyāmahe tvayā nityaṃ tarupravara śālmake //

sadaiva śakunāstāta mṛgāścātha tathā gajāḥ /
vasanti tava saṃhṛṣṭā manoharatarāstathā //

tava śākhā mahāśākha skandhāṃśca vipulāṃstathā /
na vai prabhagnānpaśyāmi mārutena kathañcana //

kinnu te pavanastāta prītimānathavā suhṛt /
tvāṃ rakṣati sadā yena vane'tra pavano dhruvam //

bhagavānpavanaḥ sthānādvṛkṣānuccāvacānapi /
parvatānāṃ ca śikharāṇyācālayati vegavān //

śoṣayatyeva pātālaṃ vahangandhavahaḥ śuciḥ /
sarāṃsi saritaścaiva sāgarāṃśca tathaiva ca //

saṃrakṣati tvāṃ pavanaḥ sakhitvena na saṃśayaḥ /
tasmāttvaṃ bahuśākho'pi parṇavānpuṣpavānapi //

idaṃ ca ramaṇīyaṃ te pratibhāti vanaspate /
ya ime vihagāstāta ramante muditāstvayi //

eṣāṃ pṛthaksamastānāṃ śrūyate madhurasvaraḥ /
puṣpasammodane kāle vāśante hariyūthapāḥ //

tatheme garjitā nāgāḥ svayūthagaṇaśobhitāḥ / gharmārtāstvāṃ samāsādya sukhaṃ vindati śālmake /

tathaiva mṛgajātībhiranyābhirabhiśobhase /
tathā sārthādhivāsaiśca śobhase meruvaddrum //

brāhmaṇaiśca tapaḥ siddhaistāpasaiḥ śramaṇaistathā /
triviṣṭapasamaṃ manye tavāyatanameva hi //