મહાભારત · અધ્યાય 12.150

એવમુક્તઃ પ્રત્યુવાચ તં મુનિં જનમેજયઃ ।
ગર્હ્યં ભવાન્ગર્હયતે નિન્દ્યં નિન્દતિ માં પુનઃ ॥

ધિક્કાર્યં માં ધિક્કુરુતે તસ્માત્ત્વાઽહં પ્રસાદયે ।
સર્વં હીદં સ્વકૃતં મે જ્વલામ્યગ્નાવિવાહિતમ્ ॥

સ્વકર્માણ્યભિસન્ધાય નાભિનન્દતિ મે મનઃ ।
પ્રાપ્તં ઘોરં ભયં નૂનં મયા વૈવસ્વતાદપિ ॥

તત્તુ શલ્યમનિર્હૃત્ય કથં શક્ષ્યામિ જીવિતુમ્ ।
સર્વં મન્યું વિનીય ત્વમભિ માં વદ શૌનક ॥

[મહાનાસં બ્રાહ્મણાનાં ભૂયો વક્ષ્યામિ સામ્પ્રતમ્.] ગન્તા ગતિં બ્રાહ્મણાનાં ભવિષ્યામ્યર્થવાન્પુનઃ ।
અસ્તુ શેષં કુલસ્યાસ્ય મા પરાભૂદિદં કુલમ્ ॥

ન હિ નો બ્રહ્મશપ્તાનાં શેષં ભવિતુમર્હતિ ।
સ્તુતીરલભમાનાનાં સંવિદં વેદ નિશ્ચયાત્ ॥

નિન્દમાનઃ સ્વમાત્માનં ભૂયો વક્ષ્યામિ સામ્પ્રતમ્ ।
ભૂયશ્ચૈવાભિમજ્જન્તિ નિર્ધર્મા નિર્જલા ઇવ ॥

ન હ્યયજ્ઞા અમું લોકં પ્રાપ્નુવન્તિ કથઞ્ચન ।
અવાક્ચ પ્રપતિષ્યન્તિ પુલિન્દશવરા ઇવ ॥

અવિજ્ઞાયૈવ મે પ્રજ્ઞાં બાલસ્યેવ સ પણ્ડિતઃ ।
બ્રહ્મન્પિતેવ પુત્રસ્ય પ્રીતિમાન્ભવ શૌનક ॥
શૌનક ઉવાચ ।

કિમાશ્ચર્યં યતઃ પ્રાજ્ઞો બહુકુર્યાદસામ્પ્રતમ્ ।
ઇતિ વૈ પણ્ડિતો ભૂત્વા ભૂતાનાં કો નુ તપ્યતે ॥

પ્રજ્ઞાપ્રાસાદમારુહ્ય અશોચ્યઃ શોચતે જનાન્ ।
જગતીસ્થાનિવાદ્રિસ્થઃ પ્રજ્ઞયા પ્રતિપત્સ્યતિ ॥

ન ચોપલભતે કશ્ચિન્ન ચાશ્ચર્યાણિ પશ્યતિ ।
નિર્વિણ્ણાત્મા પરોક્ષો વા ધિક્કૃતઃ સર્વસાધુષુ ॥

વિદિત્વા ભવતો વીર્યં માહાત્મ્યં ચૈવ ચાગમે ।
કુરુષ્વેહ યથાશાન્તિ બ્રહ્મા શરણમસ્તુ તે ॥

તદ્વૈ વારિત્રકં તાત બ્રાહ્મણાનામકુપ્યતામ્ ।
અથવા તપ્યસે પાપે ધર્મં ચેદનુપશ્યસિ ॥
જનમેજય ઉવાચ ।

અનુતપ્યે ચ પાપેન ન ચાધર્મં ચરામ્યહમ્ ।
બુભૂષેદ્ભજમાનં ચ પ્રીતિમાન્ભવ શૌનક ॥
શૌનક ઉવાચ ।

છિત્ત્વા દમ્ભં ચ માનં ચ પ્રીતિમિચ્છામિ તે નૃપ ।
સર્વભૂતહિતે તિષ્ઠ ધર્મં ચૈવ પ્રતિસ્મરન્ ॥

ન ભયાન્ન ચ કાર્પણ્યાન્ન લોભાત્ત્વામુપાહ્વયે ।
તાં મે દૈવીં ગિરં સત્યાં શૃણુ ત્વં બ્રાહ્મણૈઃ સહ ॥

સોઽહં ન કેનચિચ્ચાર્થી ત્વાં ચ ધર્માદુપાહ્વયે ।
ક્રોશતાં સર્વભૂતાનાં હાહાધિગિતિ જલ્પતામ્ ॥

વક્ષ્યન્તિ મામધર્મજ્ઞં ત્યક્ષ્યન્તિ સુહૃદો જનાઃ ।
તા વાચઃ સુહૃદઃ શ્રુત્વા સઞ્જ્વરિષ્યન્તિ મે ભૃશં ॥

કેચિદેવ મહાપ્રાજ્ઞાઃ પ્રતિજ્ઞાસ્યન્તિ કાર્યતામ્ ।
જાનીહિ મત્કૃતં તાત બ્રાહ્મણાન્પ્રતિ ભારત ॥

યથા તે સત્કૃતાઃ ક્ષેમં લભેરંસ્ત્વં તથા કુરુ ।
પ્રતિજાનીહિ ચાદ્રોહં બ્રાહ્મણાનાં નરાધિપ ॥
જનમેજય ઉવાચ ।

નૈવ વાચા ન મનસા પુનર્જાતુ ન કર્મણા ।
દ્રોગ્ધાઽસ્મિ બ્રાહ્મણાન્વિપ્ર ચરણાવેવ તે સ્પૃશે ॥