Mahabharata · Chapter 12.145

sapatnyā vacanaṃ śrutvā dharmayuktisamanvitam /
harṣeṇa mahatā yukto vākyaṃ vyākulalocanaḥ //

taṃ vai śākunikaṃ dṛṣṭvā vidhidṛṣṭena karmaṇā /
sa pakṣī pūjayāmāsa yatnāttaṃ pakṣijīvinam //

uvāca svāgataṃ te'dya brūhi kiṃ karavāṇi te /
satāmpaśca na kartavyaḥ svagṛhe vartate bhavān //

tadbravītu bhavānkṣipraṃ kiṃ karomi kimicchasi /
praṇayena bravīmi tvāṃ tvaṃ hi naḥ śaraṇāgataḥ //

arāvapyucitaṃ kāryamātithyaṃ gṛhamāgate /
chettumapyāgate chāyāṃ nopasaṃharate drumaḥ //

śaraṇāgatasya kartavyamātithyaṃ hi prayatnataḥ /
pañcayajñapravṛttena gṛhasthena viśeṣataḥ //

pañcayajñāṃstu yo mohānna karoti gṛhāśramī /
tasya nāyaṃ na ca paro loko bhavati dharmataḥ //

tadbrūhi māṃ suvisrabdho yattvaṃ vācā vadiṣyasi /
tatkariṣyāmyahaṃ sarvaṃ mā tvaṃ śoke manaḥ kṛthāḥ //

tasya tadvacanaṃ śrutvā śakunerlubdhako'bravīt /
bādhate khalu māṃ śītaṃ santrāṇaṃ hi vidhīyatām //

evamuktastanaḥ pakṣī parṇānyāstīrya bhūtale /
yathā śuṣkāṇi yatnena jvalanārthaṃ drutaṃ yayau //

sa---vā'ṅgārakarmāntaṃ gṛhītvā'gnimathāgamat /
tathā śuṣkeṣu parṇeṣu pāvakaṃ so'pyadīpayat //

sa--ptaṃ mahatkṛtvā tamāha śaraṇāgatam /
----- suvisrabdhaḥ svagātrāṇyakutobhayaḥ //

-- tathoktastathetyuktvā lubdho gātrāṇyatāpayat /
agnipratyāgataprāṇastataḥ prāha vihangamam //

harṣeṇa mahatā'viṣṭo vākyaṃ vyākulalocanaḥ /
tathemaṃ śakuniṃ dṛṣṭvā vidhidṛṣṭena karmaṇā //

dattamāhāramicchāmi tvayā kṣudbādhate hi mām /
sa tadvacaḥ pratiśrutya vākyamāha vihangamaḥ //

na me'sti vibhavo yena nāśayeyaṃ kṣudhāṃ tava /
utpannena hi jīvāmo vayaṃ nityaṃ vanaukasaḥ //

sañcayo nāsti cāsmākaṃ munīnāmiva kānane /
ityuktvā taṃ tadā tatra vivarṇavadano'bhavat //

kathaṃ nu khalu kartavyamiti cintāparastadā /
babhūva bharataśreṣṭha garhayanvṛttimātmanaḥ //

muhūrtāllabdhasañjñastu sa pakṣī pakṣighātinam /
uvāca tarpayiṣye tvāṃ muhūrtaṃ pratipālaya //

ityuktvā śuṣkaparṇaistu samujjvālya hutāśanam /
harṣeṇa mahatā'viṣṭaḥ kapotaḥ punarabrabīt //

ṛṣīṇāṃ devatānāṃ ca pitṛṇāṃ ca mahātmanām /
yutaḥ pūrvaṃ mayā dharmo mahānatithipūjane //

kuruṣvānugrahaṃ saumya satyametadbrabīmi te /
niścitā khalu me buddhiratithipratipūjane //

tataḥ kṛtapratijño vai sa pakṣī prahasanniva /
tamagniṃ triḥ parikramya praviveśa mahāmatiḥ //

agnimadhye praviṣṭaṃ tu lubdho dṛṣṭvā ca pakṣiṇam /
cintayāmāsa manasā kimidaṃ vai mayā kṛtam //

aho mama nṛśaṃsasya garhitasya svakarmaṇā /
adharmaḥ sumahāndhoro bhaviṣyati na saṃśayaḥ //

evaṃ bahuvidhaṃ bhūri vilalāpa sa lubdhakaḥ /
garhayansvāni karmāṇi dvijaṃ dṛṣṭvā tathā'gatam //