Mahabharata · Chapter 12.13

na bāhyaṃ dravyamutsṛjya siddhirbhavati bhārata /
śārīraṃ dravyamutsṛjya siddhirbhavati vā na vā //

bāhyadravyavimuktasya śārīreṣvanugṛdhyataḥ /
yo dharmo yatsukhaṃ vā syāddviṣatāṃ tattathā'stu naḥ //

śārīrandravyamutsṛjya pṛthivīmanuśāsataḥ /
yo dharmo yatsukhaṃ vā syātsuhṛdāṃ tattathā'stu naḥ //

dvyakṣarastu bhavenmṛtyuruyakṣaraṃ brahma śāśvatam /
mameti dvyakṣaro mṛtyurna mameti ca śāśvatam //

brahmamṛtyū tato rājannātmanyeva samāśritau /
adṛśyamānau bhūtāni yojayetāmasaṃśayam //

avināśo'sya satvasya niyato yadi bhārata /
hitvā śarīraṃ bhūtānāṃ na hiṃsā pratipatsyate //

athāpi ca sahotpattiḥ satvasya pralayastathā /
naṣṭe śarīre naṣṭaḥ syādvṛthā ca syātkriyāpathaḥ //

tasmādekāntamutsṛjya pūrvaiḥ pūrvataraiśca yaḥ /
panthā niṣevitaḥ sadbhiḥ sa niṣevyo vijānatā //

svāyambhuvena manunā tathā'nyaiśtakravartibhiḥ /
yadyayaṃ hyadhamaḥ panthāḥ kasmāttaistairniṣevitaḥ //

kṛtatretādiyuktāni guṇavanti ca bhārata / yugāni bahuśastaiśca bhukteyamavanī nṛpa //

labdhvā'pi pṛthivīṃ kṛtsnāṃ sahasthāvarajaṅgamām /
na bhuṅkte yo nṛpaḥ samyakkimphalaṃ tasya jīvite //

athavā vasato rājanvane vanyena jīvataḥ /
dravyeṣu yasya mamatā mṛtyorāsye sa vartate //

bāhyāntarāṇāṃ bhūtānāṃ svabhāvaṃ paśya bhārata /
ye tu paśyanti tadbhūtaṃ mucyante te mahābhayāt //

bhavānpitā bhavānmātā bhavānbhrātā bhavānguruḥ /
duḥkhapralāpānārtasya tanme tvaṃ kṣantumarhasi //

tathyaṃ vā yadi vā'tathyaṃ yanmayaitatprabhāṣitam /
tadvidvi pṛthivīpāla bhaktyā bharatasattama //