Mahabharata · Chapter 12.129

nāmṛtasyeva paryāptirmamāsti bruvati tvayi / [yathāhi svātmavṛttisthastathā tṛpto'smi bhārata // ]

tasmātkathaya bhūyo'pi tvaṃ mameha pitāmaha / [na hi tṛptimahaṃ yāmi pibandharmāmṛtaṃ hi te // ]
bhīṣma uvāca /

atrāpyudāharantīmamitihāsaṃ purātanam /
gautamasya ca saṃvādaṃ yamasya ca mahātmanaḥ //

pāriyātraṃ giriṃ prāpya gautamasyāśramo mahān /
vasate gautamo yatra tapasā dagdhakilviṣaḥ //

pṛṣṭiṃ varṣasahasrāṇi so'tapyadgautamastapaḥ /
tamugratapasā yuktaṃ bhāvitaṃ sumahāmunim //

upayāto naravyāghra lokapālo yamastadā /
tamapaśyatsutapasamṛṣiṃ vai gautamaṃ tadā //

sa taṃ viditvā brahmarṣiyemamāgatamojasā /
prāñjaliḥ praṇato bhūtvā upasṛptastapodhanaḥ //

taṃ dharmarājo dṛṣṭvaiva namaskṛtya dvijottamam /
nyamantrayata dharmeṇa kriyatāṃ kimiti bruvan //
gautama uvāca /

mātāpitṛbhyāmānṛṇyaṃ kiṃ kṛtvā samavāpnuyāt /
kathaṃ ca lokānāpnoti puruṣo durlabhāñśubhān //
yama uvāca /

tapaḥ śaucavatā nityaṃ satyadharmaratena ca /
mātāpitroraharahaḥ pūjanaṃ kāryamañjasā //

aśvamedhaiśca yaṣṭavyaṃ bahubhiḥ svāptadakṣiṇaiḥ /
tena lokānavāpnoti puruṣo'dbhutadarśanān //