Mahabharata · Chapter 12.116

na santi kulajā yatra sahāyāḥ pārthivasya tu / akulīnāśca kartavyā na vā bharatasattam //
bhīṣma uvāca /

atrāpyudāharantīmamitihāsaṃ purātanam /
nidarśanaṃ paraṃ loke sajjanācaritaṃ sadā //

asyaivārthasya sadṛśaṃ yacchrutaṃ me tapovane /
jāmadagnyasya rāmasya yaduktamṛṣisattamaiḥ //

vane mahati kasmiṃścidamanuṣyaniṣevite /
ṛṣirmūlaphalāhāro niyato niyatendriyaḥ //

dīkṣādamapariśrāntaḥ svādhyāyaparamaḥ śuciḥ /
upavāsaviśuddhātmā satataṃ satpathe sthitaḥ //

tasya sandṛśya sadbhāvamupaviṣṭasya dhīmataḥ /
sarve satvāḥ samīpasthā bhavanti vanacāriṇaḥ //

siṃhā vyāghrāḥ saśarabhā mattāścaiva mahāgajāḥ /
dvīpinaḥ khaṅgabhallūkā ye cānye bhīmadarśanāḥ //

te sukhapraśnadāḥ sarve bhavanti kṣatajāśanāḥ /
tasyarṣeḥ śiṣyavaccaiva cittajñāḥ priyakāriṇaḥ //

uktvā ca te sukhapraśnaṃ sarve yānti yathāsukham /
grāmyastvekaḥ paśustatra nājahātsa mahāmunim //

bhakto'nuraktaḥ satatamupavāsakṛśo'balaḥ /
phalamūlottarāhāraḥ śāntaḥ śiṣṭākṛtiryathā //

tasyarṣerupaviṣṭasya pādamūle mahāmateḥ /
manuṣyavadgato bhāvaṃ snehabaddho'bhavadbhṛśam //

tato'bhyayānmahāraudro dvīpī kṣatajabhojanaḥ /
śvārthamatyarthamuddhuṣṭaḥ krūraḥ kālaivāntakaḥ //

lelihyamānastṛṣitaḥ pucchāsphoṭanatatparaḥ /
vyāditāsyaḥ kṣudhāḥ bhugnaḥ prārthayānastadāmiṣam //

dṛṣṭvā taṃ krūramāyāntaṃ jīvitārthī narādhipa /
provāca śvā muniṃ tatra tacchṛṇuṣva viśāmpate //

śvaśatrurbhagavanneṣa dvīpī māṃ hantumicchati / tvatprasādādbhayaṃ na syādasmānmama mahāmune /
[tathā kuru mahābāho sarvajñastvaṃ na saṃśayaḥ //

sa munistasya vijñāya bhāvajño bhayakāraṇam / rutajñaḥ sarvasatvānāṃ tamaiśvaryasamanvitaḥ // ]
muniruvāca /

na bhayaṃ dvīpinaḥ kāryaṃ mṛtyutaste kathañcana /
eṣa śvarūparahito dvīpī bhavasi putraka //

tataḥ śvā dvīpitāṃ nīto jāmbūnadanibhākṛti /
citrāṅgo visphuraddaṃṣṭro vane vasati nirbhayaḥ //

taṃ dṛṣṭvā sammukhe dvīpī ātmanaḥ sadṛśaṃ paśum /
aviruddhastatastasya kṣaṇena samapadyata //

tato'bhyayānmahāraudro vyāditāsyaḥ kṣudhānviḥ /
dvīpinaṃ lelihanvakraṃ vyāghro rudhiralālasaḥ //

vyāghraṃ dṛṣṭvā kṣudhā bhugnaṃ daṃṣṭriṇaṃ vanacāriṇam /
dvīpi jīvitarakṣārthamṛṣiṃ śaraṇameyivān //

tataḥ saṃvāsajaṃ snehamṛṣiṇā kurvatā tadā /
sa dvīpī vyāghratāṃ nīto ripubhyo balavattaraḥ //

tato'dṛṣṭvā sa śārdūlo nābhyaghnattaṃ viśāmpate /
sa tu ścā vyāghratāṃ prāpya balavānpiśitāśanaḥ //

na mūlaphalabhogeṣu spṛhāmapyakarottadā / yathā mṛgapatirnityaṃ prakāṅkṣati vanaukasaḥ /
tathaiva sa mahārāja vyāghraḥ samabhavattadā //