Mahabharata · Chapter 12.109

kathaṃ dharme sthātumicchannaro varteta bhārata /
tattvaṃ jijñāsamānāya prabrūhi bharatarṣabha //

satyaṃ caivānṛtaṃ cobhe lokānāvṛtya tiṣṭhataḥ /
tayoḥ kimācaredrājanpuruṣo dharmaniścitaḥ //

kiṃsvitsatyaṃ kimanṛtaṃ kiṃsviddharmyaṃ sanātanam /
kasminkāle vadetsatyaṃ kasminvā'pyanṛtaṃ vadet //
bhīṣma uvāca /

satyasya vacanaṃ sādhu na satyādvidyate param /
yattu loke sudurjñeyaṃ tatte vakṣyāmi bhārata //

bhavetsatyaṃ na vaktavyaṃ vaktavyamanṛtaṃ bhavet /
yatrānṛtaṃ bhavetsatyaṃ satyaṃ vā'pyanṛtaṃ bhavet //

tādṛśo vardhate pāpo yatra satyamaniścitam /
satyānṛte viniścitya tato bhavati dharmavi //

apyanāryo'kṛtaprajñaḥ puruṣo'pyatidāruṇaḥ /
sumahatprāpnuyātpuṇyaṃ balāko'ndhavadhādiva //

kimāścaryaṃ ca yanmūḍho dharmakāmo'pyadharmavit /
sumahatprāpnuyātpuṇyaṃ gaṅgāyāmiva kauśikaḥ //

tādṛśo'yamanupraśno yatra dharmaḥ sudurvidaḥ /
duṣkāraṃ cāpi saṃkhyātuṃ tarkeṇātra vyavasyati //

prabhavārthāya bhūtānāṃ dharmapravacanaṃ kṛtam /
yaḥ syātprabhavasaṃyuktaḥ sa dharma iti niścayaḥ //

ahiṃsā satyamakrodhastapo dānaṃ damo matiḥ /
anasūyā'pyasāmarthyamanīrṣyā śīlameva ca //

eṣa dharmaḥ kuruśreṣṭha kathitaṃ parameṣṭhinā /
brahmaṇā devadevena ayaṃ caiva sanātanaḥ //

asmindharme sthito rājannaro bhadrāṇi paśyati / śrauto vadhātmako dharma ahiṃsāparamārthikaḥ //

dhāraṇāddharmamityāhurdharmeṇa vidhṛtāḥ prajāḥ /
yaḥ syāddhāraṇasaṃyuktaḥ sa dharma iti niścaḥ //

ahiṃsārthāya bhūtānāṃ dharmapravacanaṃ kṛtam /
yaḥ syādahiṃsāsaṃyuktaḥ sa dharma iti niścayaḥ //

śrutiṃ dharmaṃ vadantyanye mānānyāhuḥ pare janāḥ /
na ca taṃ svabhyasūyāmo na hi sarvaṃ vidhīyate //

ye'nyāyena jihīrṣanto dhanamicchanti karhicit /
tebhyastu na tadākhyeyaṃ sa dharma iti niścayaḥ //

akūjanena cenmokṣo nāvakūjetkathañcana /
avaśyaṃ kūjitavyaṃ vā śaṅkeranvā'pyakūjanāt //

ye'nye vā'pyanṛtaṃ kuryuḥ kuryādeva vicāraṇam /
śreyastatrānṛtaṃ vaktuṃ satyāditi vicāritam //

akṣayādyo vadhaṃ rājankuryādevāvicārayan /
abudhvā'nuśaye doṣaṃ śreyastaccānṛtaṃ bhavet //

na stenaḥ saha sambandhānmucyate śapathādapi / śreyastatrānṛtaṃ vaktuṃ satyāditi hi dhāraṇā //

yaḥ pāpaiḥ saha sambandhānmucyate śapathādapi / na ca tebhyo dhanaṃ dadyācchakye sati kathañcana /
pāpebhyo hi dhanaṃ dattaṃ dātāramapi pīḍayet //

svaśarīroparodhena dhanamādātumicchataḥ / satyasampratipattyarthaṃ yadbrūyuḥ sākṣiṇaḥ kvacit /
anuktvā tatra tadvācyaṃ sarve te'nṛtavādinaḥ //

prāṇātyaye vivāhe ca vaktavyamanṛtaṃ bhavet /
arthasya rakṣaṇārthāya pareṣāṃ dharmakāraṇāt //

pareṣāṃ siddhimākāṅkṣanna ca syāddharmabhikṣukaḥ /
pratiśrutya na dātavyaṃ śvaḥ kāryastu balātkṛtaḥ //

yaḥ kaściddharmasamayātpracyuto dharmajīvanaḥ /
daṇḍenaiva sa hantavyastaṃ panthānaṃ samāśritaḥ //

cyutaḥ sadaiva dharmebhyo dhanavāndharmamāśritaḥ /
kathaṃ svadharmamutsṛjya tamicchedupajīvitum //

sarvopāyairniyantavyaḥ pāpo nikṛtijīvanaḥ /
dhanamityeva pāpānāṃ sarveṣāmiha niścayaḥ //

avivāhyā hyasambhojyā nikṛtyā nirayaṃ gatāḥ / cyutā devamanuṣyebhyo yathā pretāstathaiva te /
[niryajñāstapasā hīnā mā sma taiḥ saha sangamaḥ // ]

dhanādānādduḥkhataraṃ jīvitā dhikprayojanam /
idaṃ te rocatāṃ dharma iti vācyaṃ prayatnataḥ //

na kaścidasti pāpānāṃ dharma ityeṣa niścayaḥ /
tathāvidhaṃ ca yo hanyānna sa pāpena lipyate //

svakarmaṇā hataṃ hanti hata eva sa hanyate /
teṣu yaḥ samayaṃ kaścitkurvīta hatabuddhiṣu //

yathā kākāstathaiva śvā tathaivopadhijīvanaḥ /
ūrdhvaṃ dehavimokṣānte bhavantyetāsu yoniṣu //

yasminyathā vartati yo manuṣya stasmiṃstathā vartitavyaṃ sa dharmaḥ /
māyācāro māyayā bādhitavyaḥ sādhvācāraḥ sādhunaivābhyupeyaḥ //