Mahabharata · Chapter 11.25

kāmbhojaṃ paśya durdharṣaṃ kāmbhojāstaraṇocitam /
śayānamṛṣabhaskandhaṃ hataṃ pāṃsuṣu mādhava //

asya kṣatajasandigdhau bāhū candanarūṣitau /
avekṣya kṛpaṇaṃ bhāryā vilapatyatiduḥkhitā //

imau tau parighaprakhyau bāhū candanarūṣitau /
yayorvivaramāpannāṃ na ratirmāṃ purā'jahāt //

kāṃ gatiṃ tu gamiṣyāmi tvayā hīnā janeśvara /
dūrabandhuranāthā ca vepantī madhurasvarā //

ātape klāmyamānānāṃ vividhānāmiva srujām /
klāntānāmapi nārīṇāṃ jahāti śrīrna vai tanūḥ //

śayānamabhitaḥ śūraṃ kāliṅgaṃ madhusūdana /
paśya dīptāṅgadayutaṃ pratimānaṃ dhanuṣmatām //

māgadhānāmadhipatiṃ jayatsenaṃ janārdana /
parivārya praruditā māgadhyaḥ paśya yoṣitaḥ //

hariṇāyatanetrāṇāṃ susvarāṇāṃ janārdana /
manaḥ śrutiharo nādo mano mohayatīva me //

prakīrṇavastrābharaṇā rudatyaḥ śokakarśitāḥ /
svāstīrṇaśayanopetā māgadhyaḥ śerate bhuvi //

kosalānāmadhipatiṃ rājaputraṃ bṛhadbalam /
bhartāraṃ parivāryaitāḥ pṛthakpraruditāḥ striyaḥ //

asya gātragatānbāṇānkārṣṇibāhubaleritān /
uddharantyasukhāviṣṭā mūrcchamānāḥ punaḥ punaḥ //

āsāṃ sarvānavadyānāmātapena pariśramāt /
pramlānanalinābhāni bhānti vaktrāṇi mādhava //

droṇena nihatāḥ śūrā śerate rucirāṅgadāḥ /
dhṛṣṭadyumnasutāḥ sarve śiśavo hemamālinaḥ //

rathāgnyagāraṃ cāpārciṃ śaraśaktigadendhanam /
droṇamāsādya nirdagdhāḥ śalabhā iva pāvakam //

tathaiva nihatāḥ śūrāḥ śerate rucirāṅgadāḥ /
droṇenābhimukhāḥ saṅkhye bhrātaraḥ pañca kekayāḥ //

taptakāñcanavarmāṇastāladhvajasthavrajāḥ /
bhāsayanti mahīṃ bhāsā jvalitā iva pāvakāḥ //

droṇena drupadaṃ saṅkhye paśya mādhava pātitam /
mahādvipamivāraṇye siṃhena mahatā hatam //

pāñcālarājño vimalaṃ puṇḍarīkākṣa pāṇḍuram /
ātapatraṃ samābhāti śaradīva niśākaraḥ //

etāstu drupadaṃ vṛddhaṃ snuṣā bhāryāśca duḥkhitāḥ /
dagdhvā gacchanti pāñcālarājānamapasavyataḥ //

dhṛṣṭaketuṃ mahātmānaṃ cedipuṅgavamaṅganāḥ /
droṇena nihataṃ śūraṃ haranti hṛtacetasaḥ //

droṇāstramabhihatyaiṣa vimarde madhusūdana /
maheṣvāso hataḥ śete vajrāhata iva drumaḥ //

eṣa cedipatiḥ śūro dhṛṣṭaketurmahārathaḥ /
śete vinihataḥ saṅkhye hatvā śatrūnsahasraśaḥ //

vitudyamānaṃ vihagaistaṃ bhāryāḥ paryupāśritāḥ /
cedirājaṃ hṛṣīkeśa hataṃ sabalabāndhavam //

dāśārhaputrajaṃ vīraṃ śayānaṃ satyavikramam /
āropyāṅke rudantyetāścedirāja varāṅganāḥ //

asya putraṃ hṛṣīkeśa suvaktraṃ cārukuṇḍalam /
droṇena samare paśya nikṛttaṃ bahudhā śaraiḥ //

pitaraṃ nūnamājisthaṃ yudhyamānaṃ paraiḥ saha /
nājahātpitaraṃ vīramadyāpi madhusūdana //

evaṃ mamāpi putrasya putraḥ pitaramanvagāt /
duryodhanaṃ mahābāho lakṣmaṇaḥ paravīrahā //

vindānuvindāvāvantyau patitau paśya mādhava /
himānte puṣpitau śālau marutā galitāviva //

kāñcanāṅgadavarmāṇau bāṇakhaṅgadhanurdharau /
ṛṣabhapratirūpākṣau śayānau vimalasrajau //

avadhyāḥ pāṇḍavāḥ kṛṣṇa sarva eva tvayā saha /
ye muktā droṇabhīṣmābhyāṃ karṇādvaikartanātkṛpāt //

duryodhanāddroṇasutātsaindhavācca jayadrathāt /
somadattādvikarṇācca śūrācca kṛtavarmaṇaḥ //

ye hanyuḥ śastravegena devānapi nararṣabhāḥ /
ta ime nihatāḥ saṅkhye paśya kālasya paryayam //

nātibhāro'sti daivasya dhruvaṃ mādhava kaścana / yadime nihatāḥ śūrāḥ kṣatriyaiḥ kṣatriyarṣabhāḥ /
śūrāśca kṛtavidyāśca mama putrā manasvinaḥ //

tadaiva nihatāḥ kṛṣṇa mama putrāstarasvinaḥ /
yadaivākṛtakāmastvamupaplāvyaṃ gataḥ punaḥ //

śantanoścaiva putreṇa prājñena vidureṇa ca /
tadaivoktāsmi mā snehaṃ kuruṣvātmasuteṣviti //

tayorhi darśanaṃ naitanmithyā bhavitumarhati /
acireṇaiva me putrā bhasmībhūtā janārdana //
vaiśampāyana uvāca /

ityuktvā nyapatadbhūmau gāndhārī śokamūrcchitā /
duḥkhopahatavijñānā dhairyamutsṛjya bhārata //

tataḥ kopaparītāṅgī putraśokapariplutā /
jagāda śauriṃ doṣeṇa gāndhārī vyathitendriyā //
gāndhāryuvāca /

pāṇḍavāḥ dhārtarāṣṭrāśca kruddhāḥ kṛṣṇa parasparam /
upekṣitā vinaśyantastvayā kasmājjanārdana //

śaktena bahubhṛtyena vipule tiṣṭhatā bale /
ubhayatra samarthena śrutavākyena caiva ha //

icchatopekṣito nāśaḥ kurūṇāṃ madhusūdana /
yasmāttvayā mahābāho phalaṃ tasmādavāpnuhi //

patiśuśrūṣayā yanme tapaḥ kiñcidupārjitam /
tena tvāṃ duravāpena śape cakragadādharam //

yasmātparasparaṃ ghnanto jñātayaḥ kurupāṇḍavāḥ /
upekṣitāste govinda tasmājjñātīnvadhiṣyasi //

tvamapyupasthite varṣe ṣaṭ्triṃśe madhusūdana /
hatajñātirhatāmātyo hataputro vanecaraḥ //

anāthavadavijñāto lokeṣvanabhilakṣitaḥ /
kutsitenābhyupāyena nidhanaṃ samavāpsyasi //

tavāpyevaṃ hatasutā nihatajñātibāndhavāḥ /
striyaḥ paripatiṣyanti yathaitā bharatastriyaḥ //
vaiśampayana uvāca /

tacchrutvā vacanaṃ ghoraṃ vāsudevo mahāmanāḥ /
uvāca devīṃ gāndhārīmīṣadabhyutsmayanniva //

jāne'hametadapyevaṃ cīrṇaṃ carasi kṣatriye /
daivādeva vinaśyanti vṛṣṇayo nātra saṃśayaḥ //

saṃhartā vṛṣṇicakrasya nānyo madvidyate śubhe /
avadhyāste narairanyairapi vā devadānavaiḥ //

parasparakṛtaṃ nāśaṃ yataḥ prāpsyanti yādavāḥ / ityuktavati dāśārhe pāṇḍavāstrastacetasaḥ /
babhūvurbhṛśasaṃvignā nirāśāścāpi jīvite //