Mahabharata · Chapter 11.20

adhyardhaguṇamāhuryaṃ bale śaurye ca keśava /
pitrā tvayā ca dāśārha dṛptaṃ siṃhamivotkaṭam //

yo bibheda camūmeko mama putrasya durbhidām /
sa bhūtvā mṛtyuranyeṣāṃ svayaṃ mṛtyuvaśaṃ gataḥ //

tasyopalakṣaye kṛṣṇa kārṣṇeramitatejasaḥ /
abhimanyorhatasyāpi prabhā naivopaśāmyati //

eṣā virāṭaduhitā snuṣā gāṇḍīvadhanvanaḥ /
hataṃ bālā patiṃ vīraṃ dṛṣṭvā śocatyaninditā //

tameṣā hi samāgamya bhāryā bhartāramantike /
virāṭaduhitā kṛṣṇa pāṇinā parimārjati //

tasya vaktramupāghrāya saubhadrasya manasvinī /
vibuddhakamalākāraṃ kambuvṛttaśirodharam //

kāmarūpavatī caiṣā pariṣvajati bhāminī /
lajjamānā purā cainaṃ mādhvīkamadamūrcchitā //

tasya kṣatajasandigdhaṃ jātarūpapariṣkṛtam /
vimucya kavacaṃ kṛṣṇa śīramabhivīkṣate //

avekṣamāṇā taṃ bālā kuṣṇa tvāmabhibhāṣate /
ayaṃ te puṇḍarīkākṣa kasadṛśākṣo nipātitaḥ //

bale vīrye ca sadṛśastejasā caiva te'nagha /
rūpeṇa ca tathā'tyarthaṃ śete bhuvi nipātitaḥ //

atyantaṃ sukumārasya rāṅkavājinaśāyinaḥ /
kaccidadya śarīraṃ te bhūmau na paritapyate //

mātaṅgabhujavarṣṇāṇau jyākṣepakaṭhinatvacau / kāñcanāṅgadinau śete nikṣipya vipulau bhujau /
vyāyamya bahudhā nūnaṃ sukhasuptaḥ śramādiva //

evaṃ vilapatīmārtāṃ kiṃ māṃ na pratibhāṣase /
na smarāmyaparādhaṃ te kiṃ māṃ na pratibhāṣase //

nanu māṃ tvaṃ purā dūrādabhivīkṣyābhibhāṣase /
na smarāmyaparādhaṃ me kiṃ māṃ na pratibhāṣase //

āryāmārya subhadrāṃ tavamimāṃ śca tridaśopamān /
pitṝnmāṃ caiva duḥkhārtāṃ vihāya kva gamiṣyasi //

tasya śoṇitadigdhānvai keśānunnamya pāṇinā /
utsaṅge vaktamādhāya jīvantamiva pṛcchati //

svasrīyaṃ vāsudevasya putraṃ gāṇḍīvadhanvanaḥ /
kathaṃ tvāṃ raṇamadhyasthaṃ jaghrurete mahārathāḥ //

dhigastu krūrakartṝṃstānkṛpakarṇajayadrathān /
droṇadrauṇāyatanī cobhau yairahaṃ vidhavā kṛtā //

ratharṣabhāṇāṃ sarveṣāṃ kathamāsīttadā manaḥ /
bālaṃ tvāṃ piravāryaikamanekeṣāṃ ca jaghnatām //

kathaṃ nu pāṇḍavānāṃ ca pāñcālānāṃ tu paśyatām /
tvaṃ vīra nidhanaṃ prāpto nāthavānsannanāthavat //

dṛṣṭvā bahubhirākrande nihataṃ tvāṃ pitā tava /
vīraḥ puruṣaśārdūlaḥ kathaṃ jīvati pāṇḍavaḥ //

na rājyalābho vipulaḥ śatrūṇāṃ ca parābhavaḥ /
prītiṃ dhāsyati pārthānāṃ tvāmṛte puṣkarekṣaṇa //

tava śastrajitām̐llokāndharmeṇa ca damena ca /
kṣipramanvāgamiṣyāmi tatra māṃ pratipālaya //

durmaraṃ punaraprāpte kāle bhavati kenacit /
yadahaṃ tvāṃ raṇe dṛṣṭvā hataṃ jīvāmi durbhagā //

kāmidānīṃ naravyāghra ślakṣṇayā smitayā girā /
pitṛloke sametyānyāṃ māmivāmantrayiṣyasi //

nūnamapsarasāṃ svarge manāṃsi pramathiṣyasi /
parameṇa ca rūpeṇa girā ca smitapūrvayā //

prāpya puṇyakṛtām̐llokānapsarobhiḥ sameyivān /
saubhadra vihankāle smarethāḥ sukṛtāni me //

etāvāniha saṃvāso vihitaste mayā saha /
ṣaṇmāsānsaptame māsi tvaṃ vīra nidhanaṃ gataḥ //

ityuktavacanāmenāmapakarṣanti duḥkhitām /
uttarāṃ moghasaṅkalpāṃ matsyarājakulastriyaḥ //

uttarāmapakṛṣyaināmārtāmārtatarāḥ svayam /
virāṭaṃ nihataṃ dṛṣṭvā krośanti vilapanti ca //

droṇāstraśarasaṅkṛttaṃ śayānaṃ rudhirokṣitam /
virāṭaṃ vitudantyete gṛdhragomāyuvāyasāḥ //

vitudyamānaṃ vihagairvirāṭamasitekṣaṇāḥ /
na śaknuvanti vihagānnivārayitumāturāḥ //

āsāmātapataptānāmāyāsena ca yoṣitām /
śrameṇa ca vivarṇānāṃ vaktrāṇāṃ viplutaṃ vapuḥ //

uttaraṃ cābhimanyuṃ ca kāmbhojaṃ ca sudakṣiṇam / kārṣṇinā'bhihataṃ paśya lakṣmaṇaṃ priyadarśanam /

āyodhanaśiromadhye śayānaṃ paśya mādhava //