Mahabharata · Chapter 11.19

eṣa mādhava putro me vikarṇaḥ pājñasammataḥ /
bhūmau vinihataḥ śete bhīmena śatadhā kṛtaḥ //

gajamadhye hataḥ śete vikarṇo madhusūdana /
nīlameghaparikṣiptaḥ śaradīva niśākaraḥ //

asya cāpagraheṇaiva pāṇiḥ kṛtakiṇo mahān /
kathañcicchidyate gṛdhrairattukāmaistalatravān //

asya bhāryā'miṣaprepsūngṛdhrakākāṃstapasvinī /
vārayatyaniśaṃ bālā na ca śaknoti mādhava //

yuvā vṛndārakasamo vikarṇaḥ puruṣarṣabha /
sukhoṣitaḥ sukhārhaśca śete pāṃsuṣu mādhava //

karṇinālīkanārācairbhinnamarmāṇamāhave /
adyāpi na jahātyenaṃ lakṣmīrbharatasattamam //

eṣa saṅgrāmaśūraṇe pratijñāṃ pālayiṣyatā /
durmukho'bhimukhaḥ śete hato'rigaṇahā raṇe //

tasyaitadvadanaṃ kṛṣṇa śvāpadairardhabhakṣitam /
vibhātyabhyadhikaṃ tāta saptamyāmiva candramāḥ //

śūrasya hi raṇe kṛṣṇa paśyānanamathedṛśam /
sa kathaṃ nihato'mitraiḥ pāṃsūngrasati me sutaḥ //

yasyāhavamukhe saumya sthātā naivopapadyate /
sa kathaṃ durmukho'mitrairhato vibudhalokajit //

citrasenaṃ hataṃ bhūmau śayānaṃ madhusūdana /
dhārtarāṣṭramimaṃ paśya pratimānaṃ dhanuṣmatām //

taṃ citramālyābharaṇaṃ yuvatyaḥ śokakarśitāḥ /
kravyādasaṅghaiḥ sahitā rudantyaḥ paryupāsate //

strīṇāṃ ruditanirghoṣaḥ śvāpadānāṃ ca garjitam /
citrarūpamidaṃ kṛṣṇa vimṛśya pratibhāti me //

yuvā vṛndārako nityaṃ pravarastrīniṣevitaḥ /
viviṃśatirasau śete dhvastaḥ pāṃsuṣu mādhava //

śarasaṅkṛttavarmāṇaṃ vīraṃ viśasane hatam /
parivāryāsate gṛdhrāḥ pariviṃśaṃ viviṃśatim //

praviśya samare śūraḥ pāṇḍavānāmanīkinīm /
sa vīraśayane śete paraḥ satpuruṣocite //

smitopapannaṃ sunasaṃ subhru tārādhipopamam /
atīva saumyavadanaṃ kṛṣṇa paśya viviṃśateḥ //

yaṃ sma taṃ paryupāsante bahudhā varayoṣitaḥ /
krīḍantamiva gandharvaṃ devakanyāḥ sahasraśaḥ //

hantāraṃ parasainyānāṃ śūraṃ samitiśobhanam /
nibarhaṇamamitrāṇāṃ duḥsahaṃ viṣaheta kaḥ //

duḥsahasyaitadābhāti śarīraṃ saṃvṛtaṃ śaraiḥ /
girirātmaruhaiḥ phullaiḥ karṇikārairivācitaḥ //

śātakaumbhyā srajā bhāti kavacena ca bhāsvatā /
agnineva giriḥ śveto gatāsurapi duḥsahaḥ //