Mahabharata · Chapter 11.18

paśya mādhava putrānme śatasaṅkhyāñjitaklamān /
gadayā bhīmasenena bhūyiṣṭhaṃ nihatānraṇe //

idaṃ duḥkhataraṃ me'dya yadimā muktamūrdhajāḥ /
hataputrā raṇe bālāḥ paridhāvanti me snuṣāḥ //

prāsādatalacāriṇyaścaramairbhūṣaṇānvitaiḥ /
kāyenādya spṛśantīmāṃ rudhirārdrāṃ vasundharām //

kṛcchrādutsārayanti sma gṛdhragomāyuvāyasān /
duḥkhenārtā vighūrṇantyo mattā iva carantyuta //

eṣā'nyā tvanavadyāṅgī karasammitamadhyamā /
ghoramāyodhanaṃ dṛṣṭvā nipatatyatiduḥkhitā //

dṛṣṭvā me pārthivasutāmetāṃ lakṣmaṇamātaram /
rājaputrīṃ mahābāho mano na hyupaśāmyati //

bhrātṝṃścānyāḥ pitṝṃścānyāḥ putrāṃśca nihatānbhuvi /
dṛṣṭvā paripatantyeṣāḥ pragṛhya sumahābhujān //

madhyamānāṃ tu nārīṇāṃ vṛddhānāṃ cāparājita /
ākrandaṃ hatabandhūnā dāruṇe vaiśase śṛṇu //

rathanīḍāni dehāṃśca hatānāṃ gajavājinām /
āśritya śramamohārtāḥ sthitāḥ paśya mahābhuja //

anyā cāpahṛtaṃ kāyāccārukuṇḍalamunnasam /
svasya bandhoḥ śiraḥ kṛṣṇa gṛhītvā paśya tiṣṭhati //

pūrvajātikṛtaṃ pāpaṃ manye nālpamivānagha / etābhirniravadyābhirmayā caivālpapuṇyayā /
yadidaṃ dharmarājena ghātitaṃ no janārdana //

na hi nāśo'sti vārṣṇeya karmaṇoḥ śubhapāpayoḥ //

pratyagravayasaḥ paśya darśanīyakucānanāḥ /
kuleṣu jātā hīmatyaḥ kṛṣṇapakṣmākṣimūrdhajāḥ //

haṃsagadgadabhāṣiṇyo duḥkhaśokapramohitāḥ /
sārasya iva vāśantyaḥ patitāḥ paśya mādhava //

phullupadyaprakāśāni puṇḍarīkākṣa yoṣitām /
anavadyāni vaktrāṇi tāpayatyeṣa raśmivān //

serṣyāṇāṃ mama putrāṇāṃ vāsudevāvarodhanam /
mattamātaṅgadarpāṇāṃ paśyantyadya pṛthagjanāḥ //

śatacandrāṇi carmāṇi dhvajāṃścādityavarcasaḥ /
raukmāṇi caiva varmāṇi niṣkānapi ca kāñcanān //

śirastrāṇāni caitāni putrāṇāṃ me mahītale /
paśya dīptāni govinda pāvakānsuhutāniva //

eṣa duḥśāsanaḥ śete śūreṇāmitraghātinā /
pītaśoṇixx sarvāṅgo yudhi bhīmena pātitaḥ //

gadayā bhīmasenena paśya mādhava me sutam /
dyūtakleśānanusmṛtya draupadīcoditena ca //

uktā hyanena pāñcālī sabhāyāṃ dyūtanirjitā /
priyaṃ cikīrṣatā bhrātuḥ karṇasya ca janārdana //

sahaiva sahadevena nakulenārjunena ca /
dāsībhūtā'si pāñcāli kṣipraṃ praviśa no gṛhān //

tato'hamabruvaṃ kṛṣṇa tadā duryodhanaṃ nṛpam /
mṛtyupāśaparikṣiptāṃ draupadīṃ putra varjaya //

nibodhainaṃ sudurbuddhiṃ mātulaṃ kalahapriyam /
kṣipramenaṃ parityajya putra saṃśāmya pāṇḍavaiḥ //

na buddhyase tvaṃ durbuddhe bhīmasenamamarṣaṇam /
vāṅgarācaistudaṃstīkṣṇairulkābhiriva kuñjaram //

tānevaṃ rahasi kruddho vākśalyānavadhārayan /
utsasarja viṣaṃ teṣu sarpo govṛṣabheṣviva //

eṣa duḥśāsanaḥ śete vikṣipya vipulau bhujau /
nihato bhīmasenena siheneva mahāgajaḥ //

atyarthamakarodraudraṃ bhīmaseno'tyamarṣaṇaḥ /
duḥśāsanasya yatkruddho'pibacchoṇitamāhave //