Mahabharata · Chapter 11.11

hateṣu sarvesainyeṣu dharmarājo yudhiṣṭhiraḥ /
śuśruve pitaraṃ vṛddhaṃ niryāntaṃ gajasāhvayāt //

so'bhyayātputraśokārtaṃ putraśokapariplutaḥ /
śocamāno mahārāja bhrātṛbhiḥ sahitastadā //

anvīyamāno vīreṇa dāśārheṇa mahātmanā /
yuyudhānena ca tathā tathaiva ca yuyutsunā //

tamanvagātsuduḥkhārtā draupadīśokakarśitā /
saha pāñcālayoṣidbhiryāstatrāsansamāgatāḥ //

saṅgrāmamanu bṛndāni strīṇāṃ bharatasattam /
kurarīṇāmivārtānāṃ krośantīnāṃ dadarśa ha //

tābhiḥ parivṛto rājā krośantībhiḥ sahasraśaḥ /
ūrdhvabāhubhirārtābhī rudatībhiḥ priyāpriyaiḥ //

ka nu dharmajñatā rājñaḥ kva nu sādyānṛśaṃsatā /
yaccāvadhītpitṝnbhrātṝnguruputrānsakhīnapi //

ghātayitvā kathaṃ droṇaṃ bhīṣmaṃ cāpi pitāmaham /
manaste'bhūnmahābāho hatvā cāpi jayadratham //

kiṃ nu rājyena te kāryaṃ pitṝnbhrātṝnapaśyataḥ /
abhimanyuṃ ca durdharṣaṃ draupadeyāṃśca bhārata //
vaiśampāyana uvāca /

atītya tā mahābāhuḥ krośantīḥ kurarīriva /
vavande pitaraṃ jyeṣṭhaṃ dharmarājo yudhiṣṭhiraḥ //

tato'bhivādya pitaraṃ krameṇāmitrakarśanāḥ /
nyavedayanta nāmāni pāṇḍavāste'pi sarvaśaḥ //

tamātmajāntakaraṇaṃ pitā putravadhārditaḥ /
aprīyamāṇaḥ śokārtaḥ pāṇḍavaṃ pariṣasvaje //

dharmarājaṃ pariṣvajya sāntvayitvā ca bhārata /
duṣṭātmā bhīmamanvaicchaddidhakṣuriva pāvakaḥ //

sa kopapāvakastasya śokavāyusamīritaḥ /
bhīmasenamayaṃ dāvaṃ didhakṣuriva dṛśyate //

tasya sankalpamājñāya bhīmaṃ pratyaśubhaṃ hariḥ /
bhīmamākṣipya pāṇibhyāṃ pradadau bhīmamāyasam //

prāgeva tu mahābuddhirbuddhvā tasyeṅgitaṃ hariḥ /
saṃvidhānaṃ mahāprājñastatra cakre janārdanaḥ //

upaguhyaiva pāṇibhyāṃ bhīmasenamayasmayam /
babhañja balavānrājā manyamāno vṛkodaram //

nāgāyutasamaprāṇaḥ sa rājā bhīmamāyasam /
bhaṅktatvā vimathitoraskaḥ susrāva rudhiraṃ mukhāt //

tataḥ papāta medinyāṃ tathaiva rudhirokṣitaḥ /
prapuṣpitāgraśikharaḥ pārijāta iva drumaḥ //

pratyagṛhṇācca taṃ vidvānsūto gāvalgaṇistadā /
maivamityabravīccainaṃ śamayansāntvayanniva //

hato bhīma iti jñātvā gatamanyurmahāmanāḥ /
hāhābhīmeti cukrośa nṛpaḥ śokasamanvitaḥ //

taṃ viditvā gatakrodhaṃ bhīmasenavadhārditam /
vāsudevo varaḥ puṃsāmidaṃ vacanamabravīt //

mā śuco dhṛtarāṣṭra tvaṃ naiva bhīmastvayā hataḥ /
āyasī pratimā hyeṣā tvayā niṣpātitā vibho //

tvāṃ krodhavaśamāpannaṃ viditvā bharatarṣabha /
mayā'pakṛṣṭaḥ kaunteyo mṛtyordaṃṣṭrāntaraṃ gataḥ //

na hi te rājaśārdūla bale tulyo'sti kaścana /
kaḥ saheta mahābāho bāhvorvigrahaṇaṃ naraḥ //

yathāntakamanuprāpya jīvankaścinna mucyate /
evaṃ bāhvantaraṃ prāpya tava jīvenna kaścana //

tasmātputreṇa yā te'sau pratimā kāritā'yasī /
bhīmasya seyaṃ kauravya tavaivopahṛtā mayā //

putraśokābhisantaptaṃ dharmādapakṛtaṃ manaḥ /
tava rājendra tena tvaṃ bhīmasenaṃ jighāṃsasi //

na tvetatte kṣamaṃ rājanhanyāstvaṃ yadvṛkodaram /
na hi putrā mahārāja jīveyuste kathañcana //

tasmādyatkṛtamasmābhirmanyamānaiḥ śamaṃ prati /
anumanyasva tatsarvaṃ mā ca śoke manaḥ kṛthāḥ //