મહાભારત · અધ્યાય 11.10

ક્રોશમાત્રં તતો ગત્વા દદૃશુસ્તાન્મહારથાન્ ।
શારદ્વતં કૃપં દ્રૌણિં કૃતવર્માણમેવ ચ ॥

તે તુ દૃષ્ટ્વૈવ રાજાનં પ્રજ્ઞાચક્ષુષમીશ્વરમ્ ।
અશ્રુકણ્ઠા વિનિઃશ્વસ્ય રુદન્તમિદમબ્રુવન્ ॥

પુત્રસ્તવ મહારાજ કૃત્વા કર્મ સુદુષ્કરમ્ ।
ગતઃ સાનુચરો રાજઞ્શક્રલોકં મહીપતે ॥

દુર્યોધનબલાન્મુક્તા વયમેવ ત્રયો રથાઃ ।
સર્વમન્યત્પરિક્ષીણં સૈન્યં તે ભરતર્ષભ ॥

ઇત્યેવમુક્ત્વા રાજાનં કૃપઃ શારદ્વતસ્તતઃ ।
ગાન્ધારીં પુત્રશોકાર્તામિદં વચનમબ્રવીત્ ॥

અભીતા યુધ્યમાનાસ્તે ઘ્નન્તઃ શત્રુગણાન્બહૂન્ ।
વીરકર્માણિ કુર્વાણાઃ પુત્રાસ્તે નિધનં ગતાઃ ॥

ધ્રવં સમ્પ્રાપ્ય લોકાંસ્તે નિર્મલાઞ્શસ્ત્રનિર્જિતાન્ ।
ભાસ્વરં દેહમાસ્થાય વિહરન્ત્યમરા ઇવ ॥

સર્વે હ્યભિમુખા રાજ્ઞિ યુધ્યમાના હતા યુધિ । ન હિ કશ્ચિદ્ધિ શૂરાણાં યુધ્યમાનઃ પરાઙ્મુખઃ ।
શસ્ત્રેણ નિધનં પ્રાપ્તો ન ચ કશ્ચિત્કૃતાઞ્જલિઃ ॥

એતાં તાં ક્ષત્રિયસ્યાહુઃ પુરાણાઃ પરમાં ગતિમ્ ।
શસ્ત્રેણ નિધનં સઙ્ખ્યે તાન્ન શોચિતુમર્હસિ ॥

ન ચાપિ શત્રવસ્તેષાં મુચ્યન્તે રાજ્ઞિ પાણ્ડવાઃ ।
શૃણુ યત્કૃતમસ્માભિરશ્વત્થામપુરોગમૈઃ ॥

અધર્મેણ હતં શ્રુત્વા ભીમસેનેન તે સુતમ્ ।
સુપ્તં શિબિરમાસાદ્ય પાણ્ડૂનાં કદનં કૃતમ્ ॥

પાઞ્ચાલા નિહતાઃ સર્વે ધૃષ્ટદ્યુમ્નપુરોગમાઃ ।
દ્રુપદસ્યાત્મજાશ્ચૈવ દ્રૌપદેયાશ્ચ પાતિતાઃ ॥

તથા વિશસનં કૃત્વા પુત્રશત્રુગણસ્ય તે ।
પ્રાદ્રવામ રણે સ્થાતું ન હિ શક્ષ્યામહે ત્રયઃ ॥

તે હિ શૂરા મહેષ્વાસાઃ ક્ષિપ્રમેષ્યન્તિ પાણ્ડવાઃ ।
અમર્ષવશમાપન્ના વૈરં પ્રતિજિહીર્ષવઃ ॥

તે હતાનાત્મજાઞ્શ્રુત્વા પ્રમત્તાઃ પુરુષર્ષભાઃ ।
અન્વિષ્યન્તઃ પદં શૂરાઃ ક્ષિપ્રમેષ્યન્તિ પાણ્ડવાઃ ॥

તેષાં તુ કિલ્બિષં કૃત્વા સંસ્થાતું નોત્સહામહે ।
અનુજાનીહિ નો રાજ્ઞિ મા ચ શોકે મનઃ કૃથાઃ ॥

રાજંસ્ત્વમનુજાનીહિ ધૈર્યમાતિષ્ઠ ચોત્તમમ્ ।
દિષ્ટાન્તં પશ્ય ચાપિ ત્વં ક્ષાત્રં ધર્મં ચ કેવલમ્ ॥

ઇત્યેવમુક્ત્વા રાજાનં કૃત્વા ચાભિપ્રદક્ષિણમ્ ।
કૃપશ્ચ કૃતવર્મા ચ દ્રોમપુત્રશ્ચ ભારત ॥

અવેક્ષમાણા રાજાનં ધૃતરાષ્ટ્રં મનીષિણમ્ ।
ગઙ્ગામનુ મહારાજ તૂર્ણમશ્વાનચોદયન્ ॥

અપક્રમ્ય તુ તે રાજન્સર્વ એવ મહારથાઃ ।
આમન્ત્ર્યાન્યોન્યમુદ્વિગ્નાસ્ત્રિધા તે પ્રયયુસ્તદા ॥

જગામ હાસ્તિનપુરં કૃપઃ શારદ્વતસ્તદા ।
સ્વમેવ રાષ્ટ્રં હાર્દિક્યો દ્રૌણિર્વ્યાસાશ્રમં યયૌ ॥

એવં તે પ્રયયુર્વીરા વીક્ષમાણાઃ પરસ્પરમ્ ।
ભયાર્તાઃ પાણ્ડુપુત્રાણામાગસ્કૃત્વા મહાત્મનામ્ ॥

સમેત્ય વીરા રાજાનં તદા ત્વનુદિતે રષૌ ।
વિપ્રજગ્મુર્મહાત્માનો યથેષ્ટકમરિન્દમાઃ ॥

[સમાસાદ્યાથ વૈ દ્રૌણિં પાણ્ડુપુત્રા મહારથાઃ । વ્યજયંસ્તે રણે રાજન્વિક્રમ્ય તદનન્તરમ્ ॥ ] ॥