Mahabharata · Chapter 10.16

tadājñāya hṛṣīkeśo vikṛṣṭaṃ pāpakarmaṇā /
hṛṣyamāṇa idaṃ vākyaṃ drauṇiṃ pratyabravīttadā //

virāṭasya sutāṃ pūrvaṃ snuṣāṃ gāṇḍīvadhanvanaḥ /
upaplāvyagatāṃ dṛṣṭvā ṛtavāgbrahmaṇo'bravīt //

parikṣīṇeṣu kuruṣu putrastava bhaviṣyati /
etadasya parikṣittvaṃ garbhasthasya bhaviṣyati //

tasya tadvacanaṃ sādhoḥ satyamedbhaviṣyati /
parikṣidbhavitā hyeṣāṃ punarvaṃśakaraḥ sutaḥ //

tvāṃ tu kāpuruṣaṃ pāpaṃ vinduḥ sarve manīṣiṇaḥ /
asakṛtpāpakarmāṇaṃ bālajīvitaghātakam //

tasmāttvamasya pāpasya karmaṇaḥ phalamāpnuhi /
trīṇi varṣasahasrāṇi cariṣyasi mahīmimām //

aprāpnuvankvacitkāñcitsaṃvidaṃ jātu kenacit /
nirjanānasahāyastvaṃ deśānpravicariṣyasi //

bhavitrī na hi te kṣudra janamadhyeṣu saṃsthitiḥ / pūyaśoṇigandhī ca durgakāntārasaṃśrayaḥ /

vicariṣyasi pāpātmaṃścirameko vasundharām // vayaḥ prāpya parikṣittuṃ devavratamavāpya ca /

kṛpācchāradvatācchūraḥ sarvāstrāṇyupapatsyate // viditvā paramāstrāṇi kṣatradharmavrate sthitaḥ /

ṣaṣṭiṃ varṣāmi dharmātmā vasudhāṃ pālayiṣyati // itaścordhvaṃ mahābāhuḥ kururājo bhaviṣyati /

parikṣinnāma nṛpatirmiṣataste sudurmate // [ahaṃ taṃ jīvayiṣyāmi dagdhaṃ śastrāgnitejasā] /

paśya me tapaso vīryaṃ satyasya ca narādhama //
vyāsa uvāca /
yasmādanādṛtya kṛtaṃ tvayā'smānkarma dāruṇam /
brāhmaṇasya sataścedaṃ vṛttamanyāyavartinaḥ //

tasmādyaddevakīputra ukvānuttamaṃ vacaḥ /
ālokāttava tadbhāvi kṣudrakarmanvrajeti ha //
aśvatthāmovāca /

sahaiva bhavatā brahmansthāsyāmi puruṣeṣviha /
satyavāgastu bhagavānayaṃ ca puruṣottamaḥ //
vaiśampāyana uvāca /

pradāyātha maṇiṃ drauṇiḥ pāṇḍavānāṃ mahātmanām /
jagāma vimanāsteṣāṃ sarveṣāṃ paśyatāṃ vanam //

pāṇḍavāśca sadāśārhāstānṛṣīnabhivādya ca /
kṛṣṇadvaipāyanaṃ caiva nāradaṃ caiva parvatam //

droṇaputrasya sahajaṃ maṇimādāya satvarāḥ /
draupadīmabhyadhāvanta prāyopetāṃ manasvinīm //
vaiśampayana uvāca /

tataste puruṣavyāghrāḥ sadaśvairanilopamaiḥ /
abhyayuḥ sahadāśārhāḥ śibiraṃ punareva hi //

avatīrya rathebhyastu tvaramāṇā mahārathāḥ /
dadṛśurdraupadīṃ hṛṣṭāmārtāmārtatarāḥ svayam //

tāmupetya nirānandāṃ duḥkhaśokasamanvitām /
parivārya vyatiṣṭhanta pāṇḍavāḥ sahakeśavāḥ //

tato rājñā'bhyanujñāto bhīmaseno mahābalaḥ /
pradadau taṃ maṇiṃ divyaṃ vacanaṃ cedamabravīt //

ayaṃ bhadre tava maṇiḥ putrahantā jitaśca te /
uttiṣṭha śokamutsṛjya kṣātradharmamanusmara //

prayāṇe vāsudevasya śamārthavasitekṣaṇe /
yānyuktāni tvayā bhīru vākyāni madhughātini //

naiva me patayaḥ santi na putrā bhrātaro na ca /
na vai tvamiti govinda śamamicchati rājani //

uktavatyasi tīvrāṇi vākyāni puruṣottamam /
kṣatradharmānurūpāṇi tāni saṃsmartumarhasi //

hato duryodhanaḥ pāpo rājyasya paripanthikaḥ /
duḥśāsanasya rudhiraṃ pītaṃ visphurato mayā //

vairasya gatamānṛṇyaṃ na sma vācyā vivakṣatām /
jitvā mukto droṇaputro brāhmaṇyādgauraveṇa ca //

yaśo'sya patitaṃ devi śarīraṃ tvavaśeṣitam /
viyojitaśca maṇinā bhraṃśitaścāyudhaṃ bhuvi //
draupadyuvāca /

kevalānṛṇyamāptā'smi guruputro gururmama /
śirasyetaṃ maṇiṃ rājā grahītumanagho'rhati //

taṃ gṛhītvā tato rājā śirasyevākarottadā /
guroruccheṣamityeva draupadyā vacanādapi //

tato divyaṃ maṇivaraṃ śirasā dhārayanprabhuḥ /
śuśubhe sa tadā rājā sacandra iva parvataḥ //

uttasthau putraśokārtā tataḥ kṛṣṇā manasvinī /
kṛṣṇaṃ cāpi mahābāhuḥ paripapraccha dharmarāṭ //