Mahabharata · Chapter 10.15

dṛṣṭaiva muniśārdūlau tāvagnisamatejasau / gāṇḍīvadhanvā sañcintya prāptakālaṃ mahārathaḥ /
sañjahāra śaraṃ divyaṃ tvaramāṇo dhanañjayaḥ //

uvāca vacanaṃ śreṣṭhastāvṛṣī prāñjalistadā /
pramuktamastramastreṇa śāmyatāmiti vai mayā //

saṃhṛte paramāstre'sminsarvānasmānaśeṣataḥ /
pāpakarmā dhruvaṃ drauṇiḥ pradhakṣyatyastratejasā //

yadatra hitamasmākaṃ lokānāṃ caiva sarvathā /
bhavantau devasaṅkāśau tathā sammantumarhataḥ //

ityuktvā sañjahārāstraṃ punareva dhanañjayaḥ /
saṃhāro duṣkarassya devairapi hi saṃyuge //

visṛṣṭasya raṇe tasya paramāstrasya saṅgrahe /
aśaktaḥ pāṇḍavādanyaḥ sākṣādapi śatakratuḥ //

brahmatejodbhavaṃ taddhi visṛṣṭamakṛtātmanā /
na śakyamāvartayituṃ brahmacaryavratādṛte //

acīrṇabrahmacaryo yaḥ sṛṣṭvā'varyate punaḥ /
tadastraṃ sānubandhasya mūrdhānaṃ tasya kṛntati //

brahmacārī vratī cāpi duravāpamavāpya tat /
paramavyasanārto'pi nārjuno'straṃ vyamuñcata //

satyavratadharaḥ śūro brahmacārī ca pāṇ़ḍavaḥ /
guruvartī ca tenāstraṃ sañjahārārjunaḥ punaḥ //

drauṇirapyatha samprebhya so'ntarā tāvṛṣī sthitau /
na śaśāka punarghoramastraṃ saṃhartumojasā //

aśaktaḥ pratisaṃhāre paramāstrasya saṃyuge /
drauṇirdīnamanā rājandvaipāyanamabhāṣata //

uttamavyasanārtena prāṇatrāṇamabhīpsunā /
mayaitadastramutsṛṣṭaṃ bhīmasenabhayānmune //

adharmaśca kṛto'nena dhārtarāṣṭraṃ jighāṃsatā /
mithyācāreṇa bhagavanbhīmasenena saṃyuge //

ataḥ sṛṣṭamidaṃ brahmanmayā'stramakṛtātmanā /
tasya bhūyo'pi saṃhāraṃ kartuṃ nāhamihotsahe //

nisṛṣṭaṃ hi mayā divyametadastraṃ durāsadam /
apāṇḍavāyeti mune vahnitejo'numantrya vai //

tadidaṃ pāṇḍaveyānāmantāyaivābhisaṃhitam /
adya pāṇḍusutānsarvāñjīvitādvaṃśayiṣyati //

kṛtaṃ pāpamidaṃ brahmanroṣāviṣṭena cetasā /
vadhamāśāsya pārthānāṃ mayāstraṃ sṛjatā raṇe //

vyāsa uvāca /

astraṃ brahmaśirastāta vidvānpārtho dhanañjayaḥ /
utsṛṣṭavānahiṃsārthaṃ na roṣeṇa tavāhave //

astramastreṇa tu rame tava saṃśamayiṣyatā /
visṛṣṭamarjunenedaṃ punaśca pratisaṃhṛtam //

brahmāstramapyavāpyaitadupadeśātpitustava /
kṣatradharmānmahābāhurnākampata dhanañjayaḥ //

evaṃ dhṛtimataḥ sādhoḥ sarvāstraviduṣaḥ sataḥ /
sabhrātṛbandhoḥ kasmāttvaṃ vadhamasya cikīrṣasi //

astraṃ brahmaśiro yatra paramāstreṇa vadhyate /
samā dvādaśa parjanyastadrāṣṭraṃ nābhivarṣati //

etadarthaṃ mahābāhuḥ śaktimānapi pāṇḍavaḥ /
na vihanyāttadastraṃ tu prajāhitacikīrṣayā //

pāṇḍavāstvaṃ ca rāṣṭraṃ ca sadā saṃrakṣyameva naḥ /
tasmātsaṃhara divyaṃ tvamastramenmahābhuja //

aroṣastava caivāstu pārthāḥ santu nirāmayāḥ / na hyadharmeṇa rājarṣiḥ pāṇḍavo jetumicchati /

maṇiṃ caiva prayacchādya yaste śirasi tiṣṭhati /
etadādāya te prāmānpratidāsyanti pāṇḍavāḥ //
drauṇiruvāca /

pāṇḍavairyāni ratnāni yaccānyatkauravairdhanam /
avāptamiha tebhyo'yaṃ maṇirmama viśiṣyate //

yamābadhya bhayaṃ nāsti śastravyādhikṣudhāśrayam /
devebhyo dānavebhyo vā nāgebhyo vā kathañcana //

na ca rakṣogaṇabhayaṃ na taskarabhayaṃ tathā /
evaṃvīryo maṇirayaṃ na me tyājyaḥ kathañcana //

yattu me bhagavānāha tanme kāryamanantaram / ayaṃ maṇirayaṃ cāhamiṣīkā tu patiṣyati /
garbheṣu pāṇḍuputrāṇāmutrāyāstathodare //
vaiśampāyana uvāca /

prāha droṇasutaṃ tatra vyāsaḥ paramadurmanāḥ //

evaṃ kuru na cānyatra buddhiḥ kāryā kathañcana /
garbheṣu pāṇḍaveyānāṃ visṛjyaitadupārama //

tamuvāca hṛṣīkeśaḥ pāṇḍavānāṃ hite mataḥ /
bhaviṣyamekamutsṛjya garbheṣvastraṃ nipātyatām //

ahamenaṃ dadāmyeṣāṃ piṇḍadaṃ kīrtivardhanam /
rājarṣiṃ puṇyakarmāṇamanekakratuyājinam //

evaṃ kuru na cānyā te buddhiḥ kāryā kathañcana /
āgarbhātpāṇḍaveyānāṃ kṛtvā pātaṃ vinaṅkṣyati //

evaṃ bruvāṇaṃ govindaṃ vṛṣabhaṃ sarvasātvatām /
drauṇiḥ paramasaṅkruddhaḥ pratyuvācedamuttaram //

naitadevaṃ yadāttha tvaṃ pakṣapātena keśava /
vacanātpuṇḍarīkākṣa tava madvākyamanyathā //

patiṣyatyetadastraṃ vai garbhe tasyā mayodyatam /
virāṭaduhituḥ kṛṣṇa yaṃ tvaṃ rakṣitumarhasi //
vāsudeva uvāca /

amoghaḥ paramāstrasya pātastvadya bhaviṣyati /
abhimanyoḥ sṛjaiṣīkāṃ garbhasthaḥ śāmyatāṃ śiśuḥ //

ahamenaṃ mṛtaṃ jātaṃ jīvayiṣyāmi bālakam /
sa tu garbho mṛto jāto dīrghamāyuravāpsyati //

ityuktaḥ pratyuvācainaṃ droṇaputraḥ smayanniva /
yadyastradagdhaṃ govinda jīvayasyevamastviti //

tataḥ paramamastraṃ tu drauṇirudyatamāhave /
dvaipāyanamanādṛtya garbheṣu pramumoca ha //