Mahabharata · Chapter 10.13

evamuktvā kuruśreṣṭhaṃ sarvayādavanandanaḥ /
sarvāyudhavaropetamāruroha rathottamam //

yuktaṃ paramakāmbhojaisturagairhemamālibhiḥ /
uditādityasaṅkāśaṃ sarvaratnavibhūṣitam //

dakṣiṇe hyāvahacchaibyaḥ sugrīvaḥ savyato dhuram /
ṇarṣṇivāhau tu tasyāstāṃ meghapuṣpabalāhakau //

viśvakarmakṛtā divyā ratnadhātuvibhūṣitā /
ucchritā ca rathe tasmindhvajayaṣṭiradṛśyata //

vainateyaḥ sthitastasyāṃ prabhāmaṇḍalaraśmivān //
tasya satyavataḥ keturbhujagāriradṛśyata //

athārohaddhṛṣīkeśaḥ ketuḥ sarvadhanuṣmatām /
arjunaḥ sa ca dharmātmā kururājo yudhiṣṭhiraḥ //

aśobhetāṃ mahātmānau dāśārhamabhitaḥ sthitau /
rathasthaṃ śārṅgadhanvānamaśvināviva vāsavam //

ubhāvāropya dāśārhaḥ syandanaṃ lokapūjitam /
pratodena javopetānparamāśvānacodayat //

te hayāḥ sahasotpeturgṛhītvā syandanottamam /
āsthitaṃ pāṇḍaveyābhyāṃ yadūnāmṛṣabheṇa ca //

vahatāṃ śārṅgadhanvānamaśvānāṃ śīghragāminām /
prādurāsīnmahāñśabdaḥ pakṣiṇāṃ patatāmiva //

te samarthā mahābāhuṃ kṣaṇena bharatarṣabha /
bhīmasenaṃ maheṣvāsamanusasruḥ suvegitāḥ //

krodhadīptaṃ tu kaunteyaṃ dviṣadarthe samudyatam /
nāśaknuvanvārayituṃ sametyāpi mahārathāḥ //

sa teṣāmagrataḥ śūraḥ śrīmatāṃ dṛḍhadhanvinām / yayau bhāgīrathītīraṃ haribhirbhṛśavegitaiḥ /
yatra sa śrūyate drauṇiḥ putrahantā durātmavān //

sa dadarśa mahātmānamudakānte yaśasvinam /
kṛṣṇadvaipāyanaṃ vyāsamāsīnamṛṣibhiḥ saha //

taṃ caiva krūrakarmāṇaṃ ghṛtāktaṃ kuśacīriṇam /
rajasā dhvastamāsīnaṃ dadarśa drauṇimantike //

tamabhyadhāvatkaunteyaḥ pragṛhya saśaraṃ dhanuḥ /
bhīmaseno mahābāhustiṣṭhatiṣṭheti cābravīt //

taṃ dṛṣṭvā bhīmakarmāṇaṃ pragṛhītaśarāsanam / bhrātarau pṛṣṭhataścāsya janārdanarathe sthitau /
vyathitātmā'bhavaddrauṇiḥ prāptaṃ cedamamanyata //

sa taddivyamadīnātmā paramās्ramacintayat /
jagrāha ca śaraiṣīkāṃ drauṇiḥ savyena pāṇinā //

sa tāmāpadamāsādya divyamastramudairayat / amṛṣyamāṇastāñchūrāndivyāyudhadharānsthitān /
apāṇḍavāyeti ruṣā vācamutsṛjya dāruṇam //

ityuktvā rājaśārdūla droṇaputraḥ pratāpavān /
sarvalokapramohārthaṃ tadas्raṃ pramumoca ha //

tatastasyāmiṣīkāyāṃ pāvakaḥ samajāyata /
pradhakṣyanniva lokāṃstrīnkālānkayamopamaḥ //