Mahabharata · Chapter 1.97

gatānmunigaṇāndṛṣṭvā putraṃ sangṛhya pāṇinā /
mātāpitṛbhyāṃ rahitā yathā śocanti dārakāḥ //

tathā śokaparītāṅgī dhṛtimālambya duḥkhitā /
gateṣu teṣu vipreṣu rājamārgeṇa bhāminī //

putreṇaiva sahāyena sā jagāma śanaiḥ śanaiḥ /
adṛṣṭapūrvānpaśyanvai rājamārgeṇa pauravaḥ //

harmyaprasādacaityāṃśca sabhā divyā vicitritāḥ /
kautūhalasamāviṣṭo dṛṣṭvā vismayamāgataḥ //

sarve bruvanti tāṃ dṛṣṭvā padmahīnāmiva śriyam /
gatyā ca saṃhīsadṛśīṃ kokilena svare samām //

mukhena candrasadṛśīṃ śriyā padmālayāsamām /
smitena kundasadṛśīṃ padmagarbhasamatvacam //

padmapatraviśālākṣīṃ taptajāmbūnadaprabhām /
karāntamitamadhyaiṣā sukeśī saṃhatastanī //

jaghanaṃ suviśālaṃ vai ūrū karikaropamau /
raktatuṅgatalau pādau dharaṇyāṃ supratiṣṭhitau //

evaṃ rūpasamāyuktā svargalokādivāgatā /
iti sma sarve'manyanta duṣyantanagare janāḥ //

punaḥ punaravocaṃste śākuntalaguṇānapi /
siṃhekṣaṇaḥ siṃhadaṃṣṭraḥ siṃhaskandho mahābhujaḥ //

siṃhoraskaḥ siṃhabalaḥ siṃhavikrāntagāmyayam /
pṛthvaṃsaḥ pṛthuvakṣāśca chatrākāraśirā mahān //

pāṇipādatale rakto raktāsyo dundubhisvanaḥ /
rājalakṣaṇayuktaśca rājaśrīścāsya lakṣyate //

ākāreṇa ca rūpeṇa śarīreṇāpi tejasā /
duṣyantena samo hyeṣa kasya putro bhaviṣyati //

evaṃ bruvantaste sarve praśaśaṃsuḥ sahasraśaḥ /
yuktivādānavocanta sarvāḥ prāṇabhṛtaḥ striyaḥ //

bāndhavā iva sasnehā anujagmuḥ śakuntalām /
paurāṇāṃ tadvacaḥ śrutvā tūṣṇīmbhūtā śakuntalā //

veśmadvāraṃ samāsādya vihvalā sā nṛpātmajā /
cintayāmāsa sahasā kāryagauravakāraṇāt //

lajjayā ca parītāṅgī rājanrājasamakṣataḥ /
aghṛṇā kiṃ nu vakṣyāmi duṣyantaṃ mama kāraṇāt //

evamuktvā tu kṛpaṇā cintayantī śakuntalā / abhisṛtya ca rājānaṃ veditā sā praveśitā //

saha tena kumāreṇa taruṇādityavarcasā /
siṃhāsanasthaṃ rājānaṃ mahendrasadṛśadyutim //

śakuntalā nataśirāḥ paraṃ harṣamavāpya ca / pūjayitvā yathānyāyamabravīttaṃ śakuntalā //

abhivādaya rājānaṃ pitaraṃ te dṛḍhavratam /
evamuktvā sutaṃ tatra lajjānatamukhī sthitā //

stambhamāliṅgya rājānaṃ prasīdasvetyuvāca sā /
śākuntalopi rājānamabhivādya kṛtāñjaliḥ //

harṣeṇotphullanayano rājānaṃ cānvavaikṣata /
duṣyanto dharmabuddhyā tu cintayanneva sobravīt //

kimāgamanakāryaṃ te brūhi tvaṃ varavarṇini /
kariṣyāmi na sandehaḥ saputrāyā viśeṣataḥ //
śakuntalovāca /

prasīdasva mahārāja vakṣyāmi puruṣottama /
eṣa putro hi te rājanmayyutpannaḥ parantapa //

tasmātputrastvayā rājanyauvarājye'bhiṣicyatām /
yathoktamāśrame tasminvartasva puruṣottama //

mayā samāgame pūrvaṃ kṛtaḥ sa samayastvayā /
tattvaṃ smara mahābāho kaṇvāśramapadaṃ prati //
vaiśampāyana uvāca /

tasyopabhogasaktasya strīṣu cānyāsu bhārata /
śakuntalā saputrā ca manasyantaradhīyata //

sa dhārayanmanasyenāṃ saputrāṃ sasmitāṃ tadā /
tadopagṛhya manasā ciraṃ sukhamavāpa saḥ //

so'tha śrutvāpi tadvākyaṃ tasyā rājā smarannapi /
abravīnna smarāmīti tvayā bhadre samāgamam //

maithunaṃ ca vṛthā nāhaṃ gaccheyamiti me matiḥ /
nābhijānāmi kalyāṇi tvayā saha samāgamam //

dharmārthakāmasambandhaṃ na smarāmi tvayā saha /
gaccha vā tiṣṭha vā kāmaṃ yadvāpīcchasi tatkuru //