Mahabharata · Chapter 1.93

evamuktastayā śakraḥ sandideśa sadāgatim /
prātiṣṭhata tadā kāle menakā vāyunā saha //

athāpaśyadvarārohā tapasā dagdhakilbiṣam /
miśvāmitraṃ tapyamānaṃ menakā bhīrurāśrame //

abhivādya tataḥ sā taṃ prākrīḍadṛṣisannidhau /
apovāha ca vāso'syā mārutaḥ śaśisannibham //

sāgacchattvaritā bhūmiṃ vāsastadabhilipsatī /
kutsayantīva savrīḍaṃ mārutaṃ varavarṇinī //

paśyatastasya rājarṣerapyagnisamatejasaḥ /
viśvāmitrastatastāṃ tu viṣamasthāmaninditām //

gṛddhāṃ vāsasi sambhrāntāṃ menakāṃ munisattamaḥ /
anirdeśyavayorūpāmapaśyadvivṛtāṃ tadā //

tasyā rūpaguṇāndṛṣṭvā sa tu viprarṣabhastadā /
cakāra bhāvaṃ saṃsarge tayā kāmavaśaṃ gataḥ //

nyamantrayata cāpyenāṃ sā cāpyaicchadaninditā /
tau tatra suciraṃ kālamubhau vyavaharatāṃ tadā //

ramamāṇau yathākāmaṃ yataikadivasaṃ tathā /
evaṃ varṣasahasrāṇāmatītaṃ nānvacintayat //

kāmakrodhāvajitavānmunirnityaṃ samāhitaḥ /
cirārjitasya tapasaḥ kṣayaṃ sa kṛtavānmuniḥ //

tapasaḥ sankṣayādeva munirmohaṃ samāviśat /
mohābhibhūtaḥ krodhātmā grasanmūlaphalānmuniḥ //

pādairjalaravaṃ kṛtvā antardvīpe kuṭīṃ gataḥ /
menakā gantukāmā tu śuśrāva jalanisvanam //

tapasā dīptavīryo'sāvākāśādeti yāti ca /
adya sañjñāṃ vijānāmi yayā'dya tapasaḥ kṣayaḥ //

gantuṃ na yuktamityuktvā ṛtusnātātha menakā / kāmarāgābhibhūtasya muneḥ pārsvaṃ jagāma ha //

janayāmāsa sa munirmenakāyāṃ śakuntalām /
prasthe himavato ramye mālinīmabhito nadīm //

devagarbhopamāṃ bālāṃ sarvābharaṇabhūṣitām /
śayānāṃ śayane ramye menakā vākyamabravīt //

maharṣerugratapasastejastvamasi bhāmini / tasmātsvargaṃ gamiṣyāmi devakāryārthamāgatā //

jātamutsṛjya taṃ garbhaṃ menakā mālinīmanu /
kṛtakāryā tatastūrṇamagacchacchakrasaṃsadam //

taṃ vane vijane garbhaṃ siṃhavyāghrasamākule / dṛṣṭvā śayānaṃ śakunāḥ samantātparyavārayan /
nemāṃ hiṃsyurvane bālāṃ kravyādā māṃsagṛddhinaḥ //

paryarakṣanta tāṃ tatra śakuntā menakātmajām /
upaspraṣṭuṃ gataścāhamapaśyaṃ śayitāmimām //

nirjane vipine ramye śakuntaiḥ parivāritām / māṃ dṛṣṭvaivābhyapadyanta pādayoḥ patitā dvijāḥ /
abruñśakunāḥ sarve kalaṃ madhurabhāṣiṇaḥ //

viśvāmitrasutāṃ brahmannyāsabhūtāṃ bharasva vai /
kāmakrodhāvajitavānsakhā te kauśikīṃ gataḥ //

tasmātpoṣaya tatputrīṃ dayāvāniti te'bruvan / sarvabhūtarutajño'haṃ dayāvānsarvajantuṣu //

ānayitvā tataścaināṃ duhitṛtve nyaveśayam //

śarīrakṛtprāṇadātā yasya cānnāni bhuñjate /
krameṇaite trayo'pyuktāḥ pitaro dharmaśāsane //

nirjane tu vane yasmācchakuntaiḥ parivāritā /
śakuntaleti nāmāsyāḥ kṛtaṃ cāpi tato mayā //

evaṃ duhitaraṃ viddhi mama vipra śakuntalām /
śakuntalā ca pitaraṃ manyate māmaninditā //
śakuntalovāca /

etadācaṣṭa pṛṣṭaḥ sanmama janma maharṣaye /
sutāṃ kaṇvasya māmevaṃ viddhi tvaṃ manujādhipa //

kaṇvaṃ hi pitaraṃ manye pitaraṃ svamajānatī /
iti te kathitaṃ rājanyathāvṛttaṃ śrutaṃ mayā //