Mahabharata · Chapter 1.88

putraṃ yayāteḥ prabūhi pūruṃ dharmabhṛtāṃ varam /
ānupūrvyeṇa ye cānye pūrorvaṃśavivardhanāḥ //

vistareṇa punarbrūhi dauṣyanterjanamejayāt /
sambabhūva yathā rājā bharato dvijasattama //
vaiśampāyana uvāca /

pūrurnṛpatiśārdūlo yathaivāsya pitā nṛpa /
dharmanityaḥ sthito rājye śakratulyaparākramaḥ //

pravīreśvararaudrāśvāstrayaḥ putrā mahārathāḥ /
pūroḥ pauṣṭyāmajāyanta pravīro vaṃśakṛttataḥ //

manasyurabhavattasmācchūrasenīsutaḥ prabhuḥ /
pṛthivyāścaturantāyā goptā rājīvalocanaḥ //

śaktaḥ saṃhanano vāgmī sauvīrītanayāstrayaḥ /
manasyorabhavanputrāḥ śūrāḥ sarve mahārathāḥ //

anvagbhānuprabhṛtayo miśrakeśyāṃ manasvinaḥ /
raudrāśvasya maheṣvāsā daśāpsarasi sūnavaḥ //

yajvāno jajñire śūrāḥ prajāvanto bahuśrutāḥ /
sarve sarvāstravidvāsaḥ sarve dharmaparāyaṇāḥ //

ṛceyuratha kakṣeyuḥ kṛkaṇeyuśca vīryavān /
sthaṇḍileyurvaneyuśca jaleyuśca mahāyaśāḥ //

tejeyurbalāvāndhīmānsatyeyuścandravikramaḥ /
dharmeyuḥ sannateyuśca daśamo devavikramaḥ //

anādhṛṣṭirabhūtteṣāṃ vidvānbhuvi tathaikarāṭ /
ṛceyuratha vikrānto devānāmiva vāsavaḥ //

anādhṛṣṭisutastvāsīdrājasūyāśvamedhakṛt /
matināra iti khyāto rājā paramadhārmikaḥ //

matinārasutā rājaṃścatvāro'mitavikramāḥ /
taṃsurmahānatiratho druhyuścāpratimadyutiḥ //

teṣāṃ taṃsurmahāvīryaḥ pauravaṃ vaṃśamudvahan /
ājahāra yaśo dīptaṃ jigāya ca vasundharām //

īlinaṃ tu sutaṃ taṃsurjanayāmāsa vīryavān /
so'pi kṛtsnāmimāṃ bhūmiṃ vijigye jayatāṃ varaḥ //

rathantaryāṃ sutānpañca pañcabhūtopamāṃstataḥ /
īlino janayāmāsa duṣyantaprabhṛtīnnṛpān //

duṣyantaṃ śūrabhīmau ca pravasuṃ vasumeva ca /
teṣāṃ śreṣṭho'bhavadrājā duṣyanto durjayo yudhi //

duṣyantāllakṣaṇāyāṃ tu jajñe vai janamejayaḥ /
śakuntalāyāṃ bharato dauṣyantirabhavatsutaḥ //

tasmādbharatavaṃśasya vipratasthe mahadyaśaḥ //