મહાભારત · અધ્યાય 1.88

પુત્રં યયાતેઃ પ્રબૂહિ પૂરું ધર્મભૃતાં વરમ્ ।
આનુપૂર્વ્યેણ યે ચાન્યે પૂરોર્વંશવિવર્ધનાઃ ॥

વિસ્તરેણ પુનર્બ્રૂહિ દૌષ્યન્તેર્જનમેજયાત્ ।
સમ્બભૂવ યથા રાજા ભરતો દ્વિજસત્તમ ॥
વૈશમ્પાયન ઉવાચ ।

પૂરુર્નૃપતિશાર્દૂલો યથૈવાસ્ય પિતા નૃપ ।
ધર્મનિત્યઃ સ્થિતો રાજ્યે શક્રતુલ્યપરાક્રમઃ ॥

પ્રવીરેશ્વરરૌદ્રાશ્વાસ્ત્રયઃ પુત્રા મહારથાઃ ।
પૂરોઃ પૌષ્ટ્યામજાયન્ત પ્રવીરો વંશકૃત્તતઃ ॥

મનસ્યુરભવત્તસ્માચ્છૂરસેનીસુતઃ પ્રભુઃ ।
પૃથિવ્યાશ્ચતુરન્તાયા ગોપ્તા રાજીવલોચનઃ ॥

શક્તઃ સંહનનો વાગ્મી સૌવીરીતનયાસ્ત્રયઃ ।
મનસ્યોરભવન્પુત્રાઃ શૂરાઃ સર્વે મહારથાઃ ॥

અન્વગ્ભાનુપ્રભૃતયો મિશ્રકેશ્યાં મનસ્વિનઃ ।
રૌદ્રાશ્વસ્ય મહેષ્વાસા દશાપ્સરસિ સૂનવઃ ॥

યજ્વાનો જજ્ઞિરે શૂરાઃ પ્રજાવન્તો બહુશ્રુતાઃ ।
સર્વે સર્વાસ્ત્રવિદ્વાસઃ સર્વે ધર્મપરાયણાઃ ॥

ઋચેયુરથ કક્ષેયુઃ કૃકણેયુશ્ચ વીર્યવાન્ ।
સ્થણ્ડિલેયુર્વનેયુશ્ચ જલેયુશ્ચ મહાયશાઃ ॥

તેજેયુર્બલાવાન્ધીમાન્સત્યેયુશ્ચન્દ્રવિક્રમઃ ।
ધર્મેયુઃ સન્નતેયુશ્ચ દશમો દેવવિક્રમઃ ॥

અનાધૃષ્ટિરભૂત્તેષાં વિદ્વાન્ભુવિ તથૈકરાટ્ ।
ઋચેયુરથ વિક્રાન્તો દેવાનામિવ વાસવઃ ॥

અનાધૃષ્ટિસુતસ્ત્વાસીદ્રાજસૂયાશ્વમેધકૃત્ ।
મતિનાર ઇતિ ખ્યાતો રાજા પરમધાર્મિકઃ ॥

મતિનારસુતા રાજંશ્ચત્વારોઽમિતવિક્રમાઃ ।
તંસુર્મહાનતિરથો દ્રુહ્યુશ્ચાપ્રતિમદ્યુતિઃ ॥

તેષાં તંસુર્મહાવીર્યઃ પૌરવં વંશમુદ્વહન્ ।
આજહાર યશો દીપ્તં જિગાય ચ વસુન્ધરામ્ ॥

ઈલિનં તુ સુતં તંસુર્જનયામાસ વીર્યવાન્ ।
સોઽપિ કૃત્સ્નામિમાં ભૂમિં વિજિગ્યે જયતાં વરઃ ॥

રથન્તર્યાં સુતાન્પઞ્ચ પઞ્ચભૂતોપમાંસ્તતઃ ।
ઈલિનો જનયામાસ દુષ્યન્તપ્રભૃતીન્નૃપાન્ ॥

દુષ્યન્તં શૂરભીમૌ ચ પ્રવસું વસુમેવ ચ ।
તેષાં શ્રેષ્ઠોઽભવદ્રાજા દુષ્યન્તો દુર્જયો યુધિ ॥

દુષ્યન્તાલ્લક્ષણાયાં તુ જજ્ઞે વૈ જનમેજયઃ ।
શકુન્તલાયાં ભરતો દૌષ્યન્તિરભવત્સુતઃ ॥

તસ્માદ્ભરતવંશસ્ય વિપ્રતસ્થે મહદ્યશઃ ॥