Mahabharata · Chapter 1.81

svargataḥ sa tu rājendro nivasandevaveśmani /
pūjitastridaśaiḥ sādhyairmarudbhirvasubhistathā //

devalokaṃ brahmalokaṃ sañcaranpuṇyakṛdvaśī /
avasatpṛthivīpālo dīrghakālamiti śrutiḥ //

sa kadācinnṛpaśreṣṭho yayātiḥ śakramāgamat /
kathānte tatra śakreṇa sa pṛṣṭaḥ pṛthivīpatiḥ //
śakra uvāca /

yadā sa pūrustava rūpeṇa rāja- ñjarāṃ gṛhītvā pracacāra bhūmau /
tadā ca rājyaṃ sampradāyaiva tasmai tvayā kimuktaḥ kathayeha satyam //
yayātiruvāca /

gaṅgāyamunayormadhye kṛtsnoyaṃ viṣayastava /
madhye pṛthivyāstvaṃ rājā bhrātaro'ntyādhipāstava //

na ca kuryānnaro dainyaṃ śāṭhyaṃ krodhaṃ tathaiva ca /
jaihayaṃ ca matsaraṃ vairaṃ sarvatredaṃ na kārayet //

mātaraṃ pitaraṃ jyeṣṭhaṃ vidvāṃsaṃ ca tapodhanam /
kṣamāvantaṃ ca rājendra nāvamanyeta buddhimān //

ḷaśaktastu kṣamate nityamaśaktaḥ krudhyate naraḥ /
durjanaḥ sujanaṃ dveṣṭi durbalo balavattaram //

rūpavantamarūpī ca dhanavantaṃ ca nirdhanaḥ /
akarmī karmiṇaṃ dveṣṭi dhārmikaṃ ca nadhārmikaḥ //

nirguṇo guṇavantaṃ ca putraitatkalilakṣaṇam /
viparītaṃ ca rājendra eteṣu kṛtalakṣaṇam //

brāhmaṇo vātha vā rājā vaiśyo vā śūdra eva vā /
praśasteṣu prasaktāścetpraśasyante yaśasvinaḥ //

tasmātpraśaste rājendra naraḥ saktamanā bhavet /
alokajñā hyapraśastā bhrātaraste hyabuddhayaḥ //

antyādhipatayaḥ sarve hyabhavanguruśāsanāt /
indra uvāca /
tvaṃ hi dharmavido rājankatthase dharmasuttamam /
kathayasva punarme'dya lokavṛttāntamuttamam //
yayātiruvāca

akrodhanaḥ krodhanebhyo viśiṣṭa- stathā titikṣuratitikṣorviśiṣṭaḥ /
amānuṣebhyo mānuṣāśca pradhānā vidvāṃstathaivāviduṣaḥ pradhānaḥ //

ākruśyamāno nākośenmanyureva titikṣataḥ /
ākroṣṭāraṃ nirdahati sukṛtaṃ cāsya vindati //

nāruntudaḥ syānna nṛśaṃsavādī na hīnataḥ paramabhyādadīta /
yayā'sya vācā para udvijeta na tāṃ vadedruśatīṃ pāpalokyām //

aruntudaṃ puruṣaṃ tīkṣṇavācaṃ vākkaṇṭakairvitudantaṃ manuṣyan /
vidyādalakṣmīkatamaṃ janānāṃ mukhe nibaddhāṃ nirṛtiṃ vahantam //

sadbhiḥ purastādabhipūjitaḥ syā- tsadbhistathā pṛṣṭhato rakṣitaḥ syāt /
sadā'satāmativādāṃstitikṣe- tsatāṃ vṛttaṃ cādadītāryavṛttaḥ //

vāksāyakā vadanānniṣpatanti yairāhataḥ śocati rātryahāni /
parasya ye marmasu sampatanti tānpaṇḍito nāvasṛjetpareṣu //

nahīdṛśaṃ saṃvananaṃ triṣu lokeṣu vidyate /
dayā maitrī ca bhūteṣu dānaṃ ca madhurā ca vāk //

tasmātsāntvaṃ sadā vācyaṃ na vācyaṃ paruṣaṃ kvacit /
pūjyānsampūjayeddadyānna ca yācetkadācana //