Mahabharata · Chapter 1.8

sa cāpi cyavano brahmanbhārgavo'janayatsutam /
sukanyāyāṃ mahātmānaṃ pramatiṃ dīptatejasam //

pramatistu ruruṃ nāma ghṛtācyāṃ samajījanat /
ruruḥ pramadvarāyāṃ tu śunakaṃ samajījanam //

śunakastu mahāsatvaḥ sarvabhārgavanandanaḥ /
jātastapasi tīvre ca sthitaḥ sthirayaśāstataḥ //

tasya brahmanruroḥ sarvaṃ caritaṃ bhūritejasaḥ /
vistareṇa pravakṣyāmi tacchṛṇu tvamaśeṣataḥ //

ṛṣirāsīnmahānpūrvaṃ tapovidyāsamanvitaḥ /
sthūlakeśa iti khyātaḥ sarvabhūtahite rataḥ //

etasminneva kāle tu menakāyāṃ prajajñivān /
gandharvarājo viprarṣe viśvāvasuriti smṛtaḥ //

apsarā menakā tasya taṃ garbhaṃ bhṛgunandana /
utsasarja yathākālaṃ sthūlakeśāśramaṃ prati //

utsṛjya caiva taṃ garbhaṃ nadyāstīre jagāma sā /
apsarā menakā brahmannirdayā nirapatrapā //

kanyāmamaragarbhābhāṃ jvalantīmiva ca śriyā /
tāṃ dadarśa samutsṛṣṭāṃ nadītīre mahānṛṣiḥ //

sthūlakeśaḥ sa tejasvī vijane bandhuvarjitām /
sa tāṃ dṛṣṭvā tadā kanyāṃ sthūlakeśo mahādvijaḥ //

jagrāha ca muniśreṣṭhaḥ kṛpāviṣṭaḥ pupoṣa ca /
vavṛdhe sā varārohā tasyāśramapade śubhe //

jātakādyāḥ kriyāścāsyā vidhipūrvaṃ yathākramam /
sthūlakeśo mahābhāgaścakāra sumahānṛṣiḥ //

pramadābhyo varā sā tu sattvarūpaguṇānvitā /
tataḥ pramadvaretyasyā nāma cakre mahānṛṣiḥ //

tāmāśramapade tasya rururdṛṣṭvā pramadvarām /
babhūva kila dharmātmā madanopahatastadā //

pitaraṃ sakhibhiḥ so'tha śrāvayāmāsa bhārgavam /
pramatiścābhyayācattāṃ sthūlakeśaṃ yaśasvinam //

tataḥ prādātpitā kanyāṃ rurave tāṃ pramadvarām /
vivāhaṃ sthāpayitvāgre nakṣatre bhagadaivate //

tataḥ katipayāhasya vivāhe samupasthite /
sakhībhiḥ krīḍatī sārdhaṃ sā kanyāvaravarṇinī //

nāpaśyatsamprasuptaṃ vai bhujangaṃ tiryagāyatam /
padā cainaṃ samākrāmanmumūrṣuḥ kālacoditā //

sa tasyāḥ sampramattāyāścoditaḥ kāladharmaṇā /
viṣopaliptāndaśanānbhṛśamaṅge nyapātayat //

sā daṣṭā tena sarpeṇa papāta sahasā bhuvi /
vivarṇā vigataśrīkā bhraṣṭābharaṇacetanā //

nirānandakarī teṣāṃ bandhūnāṃ muktamūrdhajā /
vyasuraprekṣaṇīyā sā prekṣaṇīyatamā'bhavat //

prasuptevābhavaccāpi bhuvi sarpaviṣārditā /
bhūyo manoharatarā babhūva tanumadhyamā //

dadarśa tāṃ pitā caiva ye caivānye tapasvinaḥ /
viceṣṭamānāṃ patitāṃ bhūtale padmavarcasam //

tataḥ sarve dvijatarāḥ samājagmuḥ kṛpānvitāḥ /
svastyātreyo mahājānuḥ kuśikaḥ śaṅkhamekhalaḥ //

uddālakaḥ kaṭhaścaiva śvetaścaiva mahāyaśāḥ /
bharadvājaḥ kauṇakṛtsya ārṣṭiṣeṇo'tha gautamaḥ //

pramatiḥ saha putreṇa tathānye vanavāsinaḥ /
tāṃ te kanyāṃ vyasuṃ dṛṣṭvā bhujangasya viṣārditām //

ruruduḥ kṛpayā'viṣṭā rurustvārto bahiryayau /
te ca sarve dvijaśreṣṭhāstatraivopāviśaṃstadā //