Mahabharata · Chapter 1.7

śaptastu bhṛguṇā vahniḥ kruddho vākyamathābravīt /
kimidaṃ sāhasaṃ brahmankṛtavānasi māṃ prati //

dharme prayatamānasya satyaṃ ca vadataḥ samam /
pṛṣṭo yadabravaṃ satyaṃ vyabhicāro'tra ko mama //

pṛṣṭo hisākṣīyaḥ sākṣyaṃ jānāno'pyanyathā vadet /
sa pūrvānātmanaḥ sapta kule hanyāttathā'parān //

yaśca kāryārthatattvajño jānāno'pi na bhāṣate /
so'pi tenaiva pāpena lipyate nātra saṃśayaḥ //

śakto'hamapi śaptuṃ tvāṃ mānyāstu brāhmaṇā mama /
jānato'pi ca te brahmankathayiṣye nibodha tat //

yogena bahudhā'tmānaṃ kṛtvā tiṣṭhāmi mūrtiṣu /
agnihotreṣu satreṣu kriyāsu ca makheṣu ca //

vedoktena vidhānena mayi yaddhūyate haviḥ /
devatāḥ pitaraścaiva tena tṛptā bhavanti vai //

āpo devagaṇāḥ sarve āpaḥ pitṛgaṇāstathā /
darśaśca paurṇamāsaśca devānāṃ pitṛbhiḥ saha //

devatāḥ pitarastasmātpitaraścāpi devatāḥ /
ekībhūtāśca dṛśyante pṛthaktvena ca parvasu //

devatāḥ pitaraścaiva bhuñjate mayi yadbhutam /
devatānāṃ pitṝṇāṃ ca mukhametadahaṃ smṛtam //

amāvāsyāṃ hi pitaraḥ paurṇamāsyāṃ hi devatāḥ /
manmukhenaiva hūyante bhuñjate ca hutaṃ haviḥ //

sarvabhakṣaḥ kathaṃ tveṣāṃ bhaviṣyāmi mukhaṃ tvaham /
sautiruvāca /
cintayitvā tato vahniścake saṃhāramātmanaḥ //

dvijānāmagnihotreṣu yajñasatrakriyāsu ca /
nironkāravaṣaṭkārāḥ svadhāsvāhāvivarjitāḥ //

vinā'gninā prajāḥ sarvāstata āsansuduḥkhitāḥ /
atharṣayaḥ samudvignā devān gatvābruvanvacaḥ //

agnināśātkriyābhrāṃśādbhrāntā lokāstrayo'naghāḥ /
vidhadhvamatra yatkāryaṃ na syātkālātyayo yathā //

atharṣayaśca devāśca brahmāṇamupagamya tu /
agnerāvedayañśāpaṃ kriyāsaṃhārameva ca //

bhṛguṇā vai mahābhāga śapto'gniḥ kāraṇāntare /
kathaṃ devamukho bhūtvā yajñabhāgāgrabhuk tathā //

hutabhuksarvalokeṣu sarvabhakṣatvameṣyati /
sautiruvāca /
śrutvā tu tadvacasteṣāmagnimāhūya viśvakṛt //

uvāca vacanaṃ ślakṣṇaṃ bhūtabhāvanamavyayam /
lokānāmiha sarveṣāṃ tvaṃ kartā cānta eva ca //

tvaṃ dhārayasi lokāṃstrīnkriyāṇāṃ ca pravartakaḥ /
sa tathā kuru lokeśa nocchidyeranyathā kriyāḥ //

kasmādevaṃ vimūḍhastvamīśvaraḥ san hutāśena /
tvaṃ pavitraṃ sadā loke sarvabhūtagatiśca ha //

na tvaṃ sarvaśarīreṇa sarvabhakṣatvameṣyasi /
apāne hyarciṣo yāste sarvaṃ bhakṣyanti tāḥ śikhin //

kravyādā ca tanuryā te sā sarvaṃ bhakṣayiṣyati /
yathā sūryāṃśubhiḥ spṛṣṭaṃ sarvaṃ śuci vibhāvyate //

tathā tvadarcirnirdagdhaṃ sarvaṃ śuci bhaviṣyati /
tvamagne paramaṃ tejaḥ svaprabhāvādvinirgatam //

svatejasaiva taṃ śāpaṃ kuru satyamṛṣervibho /
devānāṃ cātmano bhāgaṃ gṛhāṇa tvaṃ mukhe hutam //
sautiruvāca /

evamastviti taṃ vahniḥ pratyuvāca pitāmaham /
jagāma śāsanaṃ kartuṃ devasya parameṣṭhinaḥ //

devarṣayaśca muditāstato jagmuryathāgatam /
ṛṣayaśca yathā pūrvaṃ kriyāḥ sarvāḥ pracakrire //

divi devā mumudire bhūtasaṅghāśca laukikāḥ /
agniśca paramāṃ prītimavāpa hatakalmaṣaḥ //

evaṃ sa bhagavāñchāpaṃ lebhe'gnirbhṛgutaḥ purā / evameṣa purā vṛtta hatihāso'gniśāpajaḥ /
pulomnaśca vināśo'yaṃ cyavanasya ca sambhavaḥ //