Mahabharata · Chapter 1.78

jarāṃ prāpya yayātistu svapuraṃ prāpya caiva hi /
putraṃ jyeṣṭhaṃ variṣṭhaṃ ca yadumityabravīdvacaḥ //
yayātiruvāca /

jarāvalī ca māṃ tāta palitāni ca paryaguḥ /
kāvyasyośanasaḥ śāpānna ca tṛpto'smi yauvane //

tvaṃ yado pratipadyasva pāpmānaṃ jarayā saha /
yauvanena tvadīyena careyaṃ viṣayānaham //

pūrṇe varṣasahasre tu punaste yauvanaṃ tvaham /
dattvā svaṃ pratipatsyāmi pāpmānaṃ jarayā saha //
yaduruvāca /

jarāyāṃ bahavo doṣāḥ pānabhojanakāritāḥ /
tasmājjarāṃ na te rājangrahīṣya iti me matiḥ //

sitaśmaśrurnirānando jarayā śithilīkṛtaḥ /
valīsaṅgatagātrastu durdarśo durbalaḥ kṛśaḥ //

aśaktaḥ kāryakaraṇe paribhūtaḥ sa yauvataiḥ /
sahopajīvibhiścaiva tāṃ jarāṃ nābhikāmaye //

santi te bahavaḥ putrā mattaḥ priyatarā nṛpa /
jarāṃ grahītuṃ dharmajña tasmādanyaṃ vṛṇīṣva vai //
yayātiruvāca /

yattvaṃ me hṛdayājjāto vayaḥ svaṃ na prayacchasi /
tasmādarājyabhāktāta prajā tava bhaviṣyati //

pratyākhyātastu rājā sa turvasuṃ pratyuvāca ha / turvaso pratipadyasva pāpmānaṃ jarayā saha /
yauvanena careyaṃ vai viṣayāṃstava putraka //

pūrṇe varṣasahasre tu punardāsyāmi yauvanam /
svaṃ caiva pratipatsyāmi pāpmānaṃ jarayā saha //
turvasuruvāca /

na kāmaye jarāṃ tāta kāmabhogapraṇāśinīm /
balarūpāntakaraṇīṃ buddhiprāṇapraṇāśinīm //
yayātiruvāca /

yattvaṃ me hṛdayājjāto vayaḥ svaṃ na prayacchasi /
tasmātprajā samucchedaṃ turvaso tava yāsyati //

sankīrṇācāradharmeṣu pratilomacareṣu ca /
piśitāśiṣu cāntyeṣu mūḍha rājā bhaviṣyasi //

gurudāraprasakteṣu tiryagyonigateṣu ca /
paśudharmeṣu pāpeṣu mleccheṣu tvaṃ bhaviṣyasi //
vaiśampāyana uvāca /

evaṃ sa turvasuṃ śaptvā yayātiḥ sutamātmanaḥ /
śarmiṣṭhāyāḥ sutaṃ druhyumidaṃ vacanamabravīt //
yayātiruvāca /

druhyo tvaṃ pratipadyasva varṇarūpavināśinīm /
jarāṃ varṣasahasraṃ me yauvanaṃ svaṃ dadasva ca //

pūrṇe varṣasahasre tu punardāsyāmi yauvanam /
svaṃ cādāsyāmi bhūyo'haṃ pāpmānaṃ jarayā saha //
druhyuruvāca /

na gajaṃ na rathaṃ nāśvaṃ jīrṇo bhuṅkte na ca striyam /
vāgbhaṅgaścāsya bhavati tāṃ jarāṃ nābhikāmaye //
yayātiruvāca /

yattvaṃ me hṛdayājjāto vayaḥ svaṃ na prayacchasi /
tasmāddruhyo priyaḥ kāmo na te sampatsyate kvacit //

yatrāśvarathamukhyānāmaśvānāṃ syādgataṃ na ca /
hastināṃ pīṭhakānāṃ ca gardabhānāṃ tathaiva ca //

bastānāṃ ca gavāṃ caiva śibikāyāstathaiva ca / uḍupaplavasantāro yatra nityaṃ bhaviṣyati /
yayātiruvāca /

ano tvaṃ pratipadyasva pāpmānaṃ jarayā saha /
ekaṃ varṣasahasraṃ tu careyaṃ yauvanena te //
anuruvāca /

jīrṇaḥ śiśuvadādatte kāle'nnamaśuciryathā /
na juhoti ca kāle'gniṃ tāṃ jarāṃ nābhikāmaye //
yayātiruvāca /

yattvaṃ me hṛdayājjāto vayaḥ svaṃ na prayacchasi /
jarādoṣastvayā proktastasmāttvaṃ pratilapsyase //

prajāśca yauvanaprāptā vinaśiṣyantyano tava /
agnipraskandanaparastvaṃ cāpyevaṃ bhaviṣyasi //
vaiśampāyana uvāca /

pratyākhyātaścaturbhiśca śaptvā tānyadupūrvakān /
pūroḥ sakāśamagamanmattvā pūrumalaṅghanam //
yayātiruvāca /

pūro tvaṃ me priyaḥ putrastvaṃ varīyānbhaviṣyasi /
jarā valī ca māntāta palitāni ca paryaguḥ //

kāvyasyośanasaḥ śāpānna ca tṛpto'smi yauvane / pūro tvaṃ pratipadyasva pāpmānaṃ jarayā saha /
kañcitkālaṃ careyaṃ vai viṣayānvayasātava //

pūrṇe varṣasahasre tu punardāsyāmi yauvanam /
svaṃ caiva pratipatsyāmi pāpmānaṃ jarayā saha //
vaiśampāyana uvāca /

evamuktaḥ pratyuvāca pūruḥ pitaramajjasā /
yadāttha māṃ mahārāja tatkariṣyāmi te vacaḥ //

gurorvai vacanaṃ puṇyaṃ svargyamāyuṣkaraṃ nṛṇām /
guruprasādāttrailokyamanvaśāsacchatakratuḥ //

guroranumataṃ prāpya sarvānkāmānamāpnuyāt /
yāvadicchasi tāvacca dhārayiṣyāmi te jarām //

pratipatsyāmi te rājanpāpmānaṃ jarayā saha /
gṛhāṇa yauvanaṃ mattaścara kāmānyathepsitān //

jarayāhaṃ praticchanno vayorūpadharastava /
yauvanaṃ bhavate dattvā cariṣyāmi yathātthamām //
yayātiruvāca /

pūro prīto'smi te vatsa prītaścedaṃ dadāmi te /
sarvakāmasamṛddhā te prajā rājye bhaviṣyati //
vaiśampāyana uvāca /

evamuktvā yayātistu smṛtvā kāvyaṃ mahātapāḥ /
sankrāmayāmāsa jarāṃ tadā pūrau mahātmani //