Mahabharata · Chapter 1.6

agneratha vacaḥ śrutvā tadrakṣaḥ prajahāra tām /
brahmanvarāharūpeṇa manomārutaraṃhasā //

tataḥ sa garbho nivasankukṣau bhṛgukulodvaha /
roṣānmātuścyutaḥ kukṣeścyavanastena so'bhavat //

taṃ dṛṣṭvā māturudarāccyutamādityavarcasam /
tadrakṣo bhasmasādbhūtaṃ papāta parimucya tām //

sā tamādāya suśroṇī sasāra bhṛgunandanam /
cyavanaṃ bhārgavaṃ putraṃ pulomā duḥkhamūrcchitā //

tāṃ dadarśa svayaṃ brahmā sarvalokapitāmahaḥ /
rudatīṃ bāṣpapūrṇākṣīṃ bhṛgorbhāryāmaninditām //

sāntvayāmāsa bhagavānvadhūṃ brahmā pitāmahaḥ /
aśrubindūdbhavā tasyāḥ prāvartata mahānadī //

āvartantī sṛtiṃ tasyā bhṛgoḥ patnyāstapasvinaḥ /
tasyā mārgaṃ sṛtavatīṃ dṛṣṭvā tu saritaṃ tadā //

nāma tasyāstadā nadyāścakre lokapitāmahaḥ /
vadhūsareti bhagavāṃścyavanasyāśramaṃ prati //

sa evaṃ cyavano jajñe bhṛgoḥ putraḥ pratāpavān / taṃ dadarśa pitā tatra cyavanaṃ tāṃ ca bhāminīm /
sa pulomāṃ tato bhāryāṃ papraccha kupito bhṛguḥ //
bhṛguruvāca /

kenāsi rakṣase tasmai kathitā tvaṃ jihīrṣave /
na hi tvā veda tadrakṣo madbhāryāṃ cāruhāsinīm //

tattvamākhyāhi taṃ hyadya śaptumicchāmyahaṃ ruṣā /
bibheti ko na śāpānme kasya cāyaṃ vyatikramaḥ //
pulomovāca /

agninā bhagavaṃstasmai rakṣase'haṃ niveditā /
tato māmanayadrakṣaḥ krośantīṃ kurarīmiva //

sā'haṃ tava sutasyāsya tejasā parimokṣitā /
bhasmībhūtaṃ ca tadrakṣo māmutsṛjya papāta vai //
sautiruvāca /

iti śrutvā pulomāyā bhṛguḥ paramamanyumān /
śaśāpāgnimatikruddhaḥ sarvabhakṣo bhaviṣyasi //