Mahabharata · Chapter 1.57

ye sarpāḥ sarpasatre'sminpatitā havyavāhane /
teṣāṃ nāmāni sarveṣāṃ śrotumicchāmi sūtaja //
sautiruvāca /

sahasrāṇi bahūnyasminprayutānyarbudāni ca /
na śakyaṃ parisaṃkhyātuṃ bahutvāddvijasattama //

yathāsmṛti tu nāmāni pannagānāṃ nibodha me /
ucyamānāni mukhyānāṃ hutānāṃ jātavedasi //

vāsukeḥ kulajātāṃstu prādhānyena nibodha me /
nīlaraktānsitānghorānmahākāyānviṣolbaṇān //

avaśānmātṛvāgdaṇḍapīḍitānkṛpaṇānhūtān /
koṭiśo mānasaḥ pūrṇaḥ śalaḥ pālo halīmakaḥ //

picchalaḥ kauṇapaścakraḥ kālavegaḥ prakālanaḥ /
hiraṇyabāhuḥ śaraṇaḥ kakṣakaḥ kāladantakaḥ //

ete vāsukijā nāgāḥ praviṣṭā havyavāhane / anye ca bahavo vipra tathā vai kulasambhavāḥ /
pradīptāgnau hutāḥsarve ghorarūpā mahābalāḥ //

takṣakasya kule jātānpravakṣyāmi nibodha tān /
pucchāṇḍako maṇḍalakaḥ piṇḍasektā rabheṇakaḥ //

ucchikhaḥ śarabho bhaṅgo bilvatejā virohaṇaḥ /
śilī śalakaro mūkaḥ sukumāraḥ pravepanaḥ //

mudgaraḥ śiśuromā ca suromā ca mahāhanuḥ /
ete takṣakajā nāgāḥ praviṣṭā havyavāhanam //

pārāvataḥ pāriyātraḥ pāṇḍaro hariṇaḥ kṛśaḥ /
vihaṅgaḥ śarabho modaḥ pramodaḥ saṃhatāpanaḥ //

airāvatakulādete praviṣṭā havyavāhanam /
kauravyakulajānnāgāñśṛṇu me tvaṃ dvijottama //

erakaḥ kuṇḍalo veṇī veṇīskandhaḥ kumārakaḥ /
bāhukaḥ śṛṅgaberaśca dhūrtakaḥ prātarātakau //

kauravyakulajāstvete praviṣṭā havyavāhanam /
dhṛtarāṣṭrakule jātāñśṛṇu nāgānyathātatham //

kīrtyamānānmayā brahmanvātavegānviṣolbaṇān /
śaṅkukarṇaḥ piṭharakaḥ kuṭhāramukhasecakau //

pūrṇāṅgadaḥ pūrṇamukhaḥ prahāsaḥ śakunirdariḥ /
amāhaṭhaḥ kāmaṭhakaḥ suṣeṇo mānaso'vyayaḥ //

aṣṭāvakraḥ komalakaḥ śvasano maunavepagaḥ / bhairavo muṇḍavedāṅgaḥ piśaṅgaścodapārakaḥ /
ṛṣabho vegavānnāgaḥ piṇḍārakamahāhanū //

raktāṅgaḥ sarvasāraṅgaḥ samṛddhapaṭavāsakau /
varāhako vīraṇakaḥ sucitraścitravegikaḥ //

parāśarastaruṇako maṇiḥ skandhastathā'ruṇiḥ /
iti nāgā mayā brahmankīrtitāḥ kīrtivardhanāḥ //

prādhānyena bahutvāttu na sarve parikīrtitāḥ /
eteṣāṃ prasavo yaśca prasavasya ca santatiḥ //

na śakyaṃ parisaṃkhyātuṃ ye dīptaṃ pāvakaṃ gatāḥ / dviśīrṣāḥ pañcaśīrṣāśca saptaśīrṣāstathā'pare /
daśaśīrṣāḥ śataśīrṣāstathānye bahuśīrṣakāḥ //

kālānalaviṣā ghorā hutāḥ śatasahasraśaḥ /
mahākāyā mahāvegāḥ śailaśṛṅgasamucchrayāḥ //

yojanāyāmavistārā dviyojanasamāyatāḥ /
kāmarūpāḥ kāmabalā dīptānalaviṣolbaṇāḥ //

dagdhāstatra mahāsatre brahmadaṇḍanipāḍitāḥ //