Mahabharata · Chapter 1.53

sarpasatre tadā rājñaḥ pāṇḍaveyasya dhīmataḥ /
janamejayasya ke tvāsannṛtvijaḥ paramarṣayaḥ //

ke sadasyā babhūvuśca sarpasatre sudāruṇe /
viṣādajanane'tyarthaṃ pannagānāṃ mahābhaya //

sarvaṃ vistaraśastāta bhavāñchaṃsitumarhati /
sarpasatravidhānajñavijñeyāḥ ke ca sūtaja //
sautiruvāca /

hanta te kathayiṣyāmi nāmānīha manīṣiṇām /
ye ṛtvijaḥ sadasyāśca tasyāsannṛpatestadā //

tatra hotā babhūvātha brāhmaṇaścaṇḍabhārgavaḥ /
cyavanasyānvaye khyāto jāto vedavidāṃ varaḥ //

udgātā brāhmaṇo vṛddho vidvānkautsau'tha jaiminiḥ /
brhamā'bhavacchārṅgaravo'thādhvaryuścāpi piṅgalaḥ //

sadasyaścābhavadvyāsaḥ putraśiṣyasahāyavān /
uddālakaḥ pramatakaḥ śvetaketuśca piṅgalaḥ //

asito devalaścaiva nāradaḥ parvatastathā /
ātreyaḥ kumḍajaṭharau dvijaḥ kālaghaṭastathā //

vātsyaḥ śrutaśravā vṛddho japasvādhyāyaśīlavān /
kohalo devaśarmā ca maudgalyaḥ samasaurabhaḥ //

ete cānye ca bahavo brāhmaṇā vedapāragāḥ /
sadasyāścābhavaṃstatra satre pārikṣitasya ha //

juhvatsvṛtvikṣvatha tadā sarpasatre mahākratau /
ahayaḥ prāpataṃstatra ghorāḥ prāṇibhayāvahāḥ //

vasāmedovahāḥ kulyā nāgānāṃ sampravartitāḥ /
vavau gandhaśca tumulo dahyatāmaniśaṃ tadā //

patatāṃ caiva nāgānāṃ dhiṣṭhitānāṃ tathāmbare /
aśrūyatāniśaṃ śabdaḥ pacyatāṃ cāgninā bhṛśam //

takṣakastu sa nāgendraḥ purandaraniveśanam /
gataḥ śrutvaiva rājānaṃ dīkṣitaṃ janamejayam //

tataḥ sarvaṃ yathāvṛttamākhyāya bhujagottamaḥ /
agacchaccharaṇaṃ bhīta āgaskṛtvā purandaram //

tamindraḥ prāha suprīto na tavāstīha takṣaka /
bhayaṃ nāgendra tasmādvai sarpasatrātkadācana //

prasādito mayā pūrvaṃ tavārthāya pitāmahaḥ /
tasmāttava bhayaṃ nāsti vyetu tenaso jvaraḥ //
sautiruvāca /

evamāśvāsitastena tataḥ sa bhujagottamaḥ /
uvāsa bhavane tasmiñśakrasya muditaḥ sukhī //

ajasraṃ nipatatsvagnau nāgeṣu bhṛśaduḥkhitaḥ /
alpaśeṣaparīvāro vāsukiḥ paryatapyata //

kaśmalaṃ cāviśaddhoraṃ vāsukiṃ pannagottamam /
sa ghūrṇamānahṛdayo bhaginīmidamabravīt //

dahyante'ṅgāni me bhadre na diśaḥ pratibhānti mām /
sīdāmīva ca sammohāddhūrṇatīva ca me manaḥ //

dṛṣṭirbhrāmyati me'tīva hṛdayaṃ dīryatīva ca /
patiṣyāmyavaśo'dyāhaṃ tasmindīpte vibhāvasau //

pārikṣitasya yajño'sau vartate'smajjighāṃsayā /
vyaktaṃ mayā'bhigantavyaṃ pretarājaniveśanam //

ayaṃ sa kālaḥ samprāpto yadarthamasi me svasaḥ /
jaratkaraumayādattātrāyasvāsmānsabāndhavān //

āstīkaḥ kila yajñaṃ taṃ vartantaṃ bhujagottame /
pratiṣetsyati māṃ pūrvaṃ svayamāha pitāmahaḥ //

tadvatse brūhi vatsaṃ svaṃ kumāraṃ vṛddhasammatam /
mamādya tvaṃ sabhṛtyasya mokṣārthaṃ vedavittamam //