Scripture Library

Mahabharata · Chapter 1.52

1.52.1

tataḥ karma pravavṛte sarpasatravidhānataḥ /
paryakrāmaṃśca vidivatsve sve karmaṇi yājakāḥ //

1.52.2

prāvṛtya kṛṣṇavāsāṃsi dhūmrasaṃraktalocanāḥ /
juhuvurmantravaccaiva samiddhaṃ jātavedasam //

1.52.3

kampayantaśca sarveṣāmuragāṇāṃ manāṃsi ca /
sarpānājuhuvustatra sarvānagnimukhe tadā //

1.52.4

tataḥ sarpāḥ samāpetuḥ pradīpte havyavāhane /
viceṣṭamānāḥ kṛpaṇamāhvayantaḥ parasparam //

1.52.5

visphurantaḥ śvasantaśca veṣṭayantaḥ parasparam /
pucchaiḥ śirobhiśca bhṛśaṃ citrabhānuṃ prapedire //

1.52.6

śvetāḥ kṛṣṇāśca nīlāśca sthavirāḥ śiśavastathā /
nadanto vividhānnādānpeturdīpte vibhāvasau //

1.52.7

krośayojanamātrā hi gokarṇasya pramāṇataḥ /
patantyajasraṃ vegena vahnāvagnimatāṃ vara //

1.52.8

evaṃ śatasahasrāṇi prayutānyarbudāni ca /
avaśāni vinaṣṭāni pannagānāṃ tu tatra vai //

1.52.9

turagā iva tatrānye hastihastā ivāpare /
mattā iva ca mātaṅgā mahākāyā mahābalāḥ //

1.52.10

uccāvacāśca bahavo nānāvarṇā viṣolbaṇāḥ / ghorāśca parighaprakhyā dandaśūkā mahābalāḥ /
prapeturagnāvuragā mātṛvāgdaṇḍapīḍitāḥ //

Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0