Mahabharata · Chapter 1.54

tata āhūya putraṃ svaṃ jaratkārurbhujangamā /
vāsukernāgarājasya vacanādidamabravīt //

ahaṃ tava pituḥ putra bhrātrā dattā nimittataḥ /
kālaḥ sa cāyaṃ samprāptastatkuruṣva yathātatham //
āstīka uvāca /

kinnimittaṃ mama piturdattā tvaṃ mātulena me /
tanmamācakṣva tattvena śrutvā kartā'smi tattathā //
sautiruvāca /

tata ācaṣṭa sā tasmai bāndhavānāṃ hitaiṣiṇī /
bhaginī nāgarājasya jaratkāruraviklabā //
jaratkāruruvāca /

pannagānāmaśeṣāṇāṃ mātā kadrūriti śrutā /
tayā śaptā ruṣitayā sutā yasmānnibodha tat //

uccaiḥ śravāḥ so'śvarājo yanmithyā na kṛto mama /
vinatārthāya paṇite dāsabhāvāya putrakāḥ //

janamejayasya vo yajñe dhakṣyatyanilasārathiḥ /
tatra pañcatvamāpannāḥ pretalokaṃ gamiṣyatha //

tāṃ ca śaptavatīṃ devaḥ sākṣāllokapitāmahaḥ /
evamastviti tadvākyaṃ provācānu mumoda ca //

vāsukiścāpi tacchrutvā pitāmahavacastadā /
amṛte mathite tāta devāñcharaṇamīyivān //

siddhārthāśca surāḥ sarve prāpyāmṛtamanuttamam /
bhrātaraṃ me puraskṛtya pitāmahamupāgaman //

te taṃ prasādayāmāsuḥ surāḥ sarve'bjasambhavam /
rājñā vāsukinā sārdhaṃ śāpo'sauna bhavediti //
devā ūcuḥ /

vāsukirnāgarājo'yaṃ duḥkhito jñātikāraṇāt /
abhiśāpaḥ sa mātustu bhagavanna bhavetkatham //
brahmovāca /

jaratkārurjaratkāruṃ yāṃ bhāryāṃ samavāpsyati /
tatra jāto dvijaḥ śāpānmokṣayiṣyati pannagān //

etacchrutvā tu vacanaṃ vāsukiḥ pannagottamaḥ /
prādānmāmamaraprakhya tava pitre mahātmane //

prāgevānāgate kāle tasmāttva mayyajāyathāḥ /
ayaṃ sa kālaḥ samprāpto bhayānnastrātumarhasi //

bhrātaraṃ cāpi me tasmāttrātumarhasi pāvakāt / na moghaṃ tu kṛtaṃ tatsyādyadahaṃ tava dhīmate /
pitre dattā vimokṣārthaṃ kathaṃ vā putra manyase //
sautiruvāca /

evamuktastathetyuktvā sāstīko mātaraṃ tadā /
abravīdduḥkhasantaptaṃ vāsukiṃ jīvayanniva //

ahaṃ tvāṃ mokṣayiṣyāmi vāsuke pannagottama /
tasmācchāpānmahāsattva satyametadbravīmi te //

bhava svasthamanā nāga na hi te vidyate bhayam /
prayatiṣye tathā rājanyathā śreyo bhaviṣyati //

na me vāganṛtaṃ prāha svaireṣvapi kuto'nyathā /
taṃ vai nṛpavaraṃ gatvā dīkṣitaṃ janamejayam //

vāgbhirmaṅgalayuktābhistoṣayiṣye'dya mātula /
yathā sa yajño nṛpaternivatriṣyati sattama //

sa sambhāvaya nāgendra mayi sarvaṃ mahāmate /
na te mayi mano jātu mithyā bhavitumarhati //
vāsukiruvāca /

āstīka parighūrṇāmi hṛdayaṃ me vidīryate /
diśo na pratijānāmi brahmadaṇḍanipīḍitaḥ //
āstīka uvāca /

na santāpastvayā kāryaḥ kathañcitpannagottama /
pradīptāgneḥ samutpannaṃ nāśayiṣyāmi te bhayam //

brahmadaṇḍaṃ mahāghoraṃ kālāgnisamatejasam /
nāśayiṣyāmi mā'tra tvaṃ bhayankārṣīḥ kathañcana //
sautiruvāca /

tataḥ sa vāsukerghoramapanīya manojvaram /
ādhāya cātmano'ṅgeṣu jagāma tvarito bhṛśam //

janamejayasya taṃ yajñaṃ sarvaiḥ samuditaṃ guṇaiḥ /
mokṣāya bhujagendrāṇāmāstīko dvijasattamaḥ //

sa gatvā'paśyadāstīko yajñāyatanamuttamam /
vṛtaṃ sadasyairbahubhiḥ sūryavahnisamaprabhaiḥ //

sa tatra vārito dvāsthaiḥ praviśandvijasattamaḥ /
abhituṣṭāva taṃ yajñaṃ praveśārthī parantapaḥ //

sa prāpya yajñāyatanaṃ variṣṭhaṃ dvijottamaḥ puṇyakṛtāṃ variṣṭhaḥ /
tuṣṭāva rājānamanantakīrti- mṛtviksadasyāṃśca tathaiva cāgnim //