મહાભારત · અધ્યાય 1.52

તતઃ કર્મ પ્રવવૃતે સર્પસત્રવિધાનતઃ ।
પર્યક્રામંશ્ચ વિદિવત્સ્વે સ્વે કર્મણિ યાજકાઃ ॥

પ્રાવૃત્ય કૃષ્ણવાસાંસિ ધૂમ્રસંરક્તલોચનાઃ ।
જુહુવુર્મન્ત્રવચ્ચૈવ સમિદ્ધં જાતવેદસમ્ ॥

કમ્પયન્તશ્ચ સર્વેષામુરગાણાં મનાંસિ ચ ।
સર્પાનાજુહુવુસ્તત્ર સર્વાનગ્નિમુખે તદા ॥

તતઃ સર્પાઃ સમાપેતુઃ પ્રદીપ્તે હવ્યવાહને ।
વિચેષ્ટમાનાઃ કૃપણમાહ્વયન્તઃ પરસ્પરમ્ ॥

વિસ્ફુરન્તઃ શ્વસન્તશ્ચ વેષ્ટયન્તઃ પરસ્પરમ્ ।
પુચ્છૈઃ શિરોભિશ્ચ ભૃશં ચિત્રભાનું પ્રપેદિરે ॥

શ્વેતાઃ કૃષ્ણાશ્ચ નીલાશ્ચ સ્થવિરાઃ શિશવસ્તથા ।
નદન્તો વિવિધાન્નાદાન્પેતુર્દીપ્તે વિભાવસૌ ॥

ક્રોશયોજનમાત્રા હિ ગોકર્ણસ્ય પ્રમાણતઃ ।
પતન્ત્યજસ્રં વેગેન વહ્નાવગ્નિમતાં વર ॥

એવં શતસહસ્રાણિ પ્રયુતાન્યર્બુદાનિ ચ ।
અવશાનિ વિનષ્ટાનિ પન્નગાનાં તુ તત્ર વૈ ॥

તુરગા ઇવ તત્રાન્યે હસ્તિહસ્તા ઇવાપરે ।
મત્તા ઇવ ચ માતઙ્ગા મહાકાયા મહાબલાઃ ॥

ઉચ્ચાવચાશ્ચ બહવો નાનાવર્ણા વિષોલ્બણાઃ । ઘોરાશ્ચ પરિઘપ્રખ્યા દન્દશૂકા મહાબલાઃ ।
પ્રપેતુરગ્નાવુરગા માતૃવાગ્દણ્ડપીડિતાઃ ॥