Mahabharata · Chapter 1.51

evamuktvā tataḥ śrīmānmantribhiścānumīditaḥ /
āruroha pratijñāṃ sa sarpasatrāya pārthivaḥ //

brahmanbharataśārdūlo rājā pārikṣitastadā /
purohitamathāhūya ṛtvijo vasudhādhipaḥ //

abravīdvākyasampannaḥ kāryasampatkaraṃ vacaḥ /
yo me hiṃsitavāṃstātaṃ takṣakaḥ sa durātmavān //

pratikuryāṃ yathā tasya tadbhavanto bruvantu me /
api tatkarma viditaṃ bhavatāṃ yena pannagam //

takṣakaṃ sampradīpte'gnau prakṣipeyaṃ sabāndhavam /
yathā tena pitā mahyaṃ pūrvaṃ dagdho viṣāgninā //
tathā'hamapi taṃ pāpaṃ dagdhumicchāmi pannagam //
ṛtvija ūcuḥ /

asti rājanmahātsatraṃ tvadarthaṃ devanirmitam /
sarvasatramiti khyātaṃ purāṇe paripaṭhyate //

āhartā tasya satrasya tvannānyo'sti narādhipa /
iti paurāṇikāḥ prāhurasmākaṃ cāsti sa kratuḥ //

evamuktaḥ sa rājarṣirmene dagdhaṃ hi takṣakam /
hutāśanamukhe dīpte praviṣṭamiti sattama //

tato'bravīnmantravidastānrājā brāhmaṇāṃstadā /
āhariṣyāmi tatsatraṃ sambhārāḥ sambhriyantu me //
sautiruvāca /

tatasta ṛtvijastasya śāstrato dvijasattama /
taṃ deśaṃ māpayāmāsuryajñāyatanakāraṇāt //

yathāvadvedavidvāṃsaḥ sarve buddheḥ parangatāḥ /
ṛddhyā paramayā yuktamiṣṭaṃ dvijagaṇairyutam //

prabhūtadhanadhānyāḍhyamṛtvigbhiḥ suniṣevitam /
nirmāya cāpi vidhivadyajñāyatanamīpsitam //

rājānaṃ dīkṣayāmāsuḥ sarpasatrāptaye tadā /
idaṃ cāsīttatra pūrvaṃ sarpasatre bhaviṣyati //

nimittaṃ mahadutpannaṃ yajñavighnakaraṃ tadā /
yajñasyāyatane tasminkriyamāṇe vaco'bravīt //

sthapatirbuddhisampanno vāstuvidyāviśāradaḥ /
ityabravītsūtradhāraḥ sūtaḥ paurāṇikastadā //

yasmindeśe ca kāle ca māpaneyaṃ pravartitā /
brāhmaṇaṃ kāraṇaṃ kṛtvā nāyaṃ saṃsthāsyate kratuḥ //

etacchrutvā tu rājāsau prāgdīkṣākālamabravīt /
kṣattāraṃ na hi me kaścidajñātaḥ praviśediti //