મહાભારત · અધ્યાય 1.51

એવમુક્ત્વા તતઃ શ્રીમાન્મન્ત્રિભિશ્ચાનુમીદિતઃ ।
આરુરોહ પ્રતિજ્ઞાં સ સર્પસત્રાય પાર્થિવઃ ॥

બ્રહ્મન્ભરતશાર્દૂલો રાજા પારિક્ષિતસ્તદા ।
પુરોહિતમથાહૂય ઋત્વિજો વસુધાધિપઃ ॥

અબ્રવીદ્વાક્યસમ્પન્નઃ કાર્યસમ્પત્કરં વચઃ ।
યો મે હિંસિતવાંસ્તાતં તક્ષકઃ સ દુરાત્મવાન્ ॥

પ્રતિકુર્યાં યથા તસ્ય તદ્ભવન્તો બ્રુવન્તુ મે ।
અપિ તત્કર્મ વિદિતં ભવતાં યેન પન્નગમ્ ॥

તક્ષકં સમ્પ્રદીપ્તેઽગ્નૌ પ્રક્ષિપેયં સબાન્ધવમ્ ।
યથા તેન પિતા મહ્યં પૂર્વં દગ્ધો વિષાગ્નિના ॥
તથાઽહમપિ તં પાપં દગ્ધુમિચ્છામિ પન્નગમ્ ॥
ઋત્વિજ ઊચુઃ ।

અસ્તિ રાજન્મહાત્સત્રં ત્વદર્થં દેવનિર્મિતમ્ ।
સર્વસત્રમિતિ ખ્યાતં પુરાણે પરિપઠ્યતે ॥

આહર્તા તસ્ય સત્રસ્ય ત્વન્નાન્યોઽસ્તિ નરાધિપ ।
ઇતિ પૌરાણિકાઃ પ્રાહુરસ્માકં ચાસ્તિ સ ક્રતુઃ ॥

એવમુક્તઃ સ રાજર્ષિર્મેને દગ્ધં હિ તક્ષકમ્ ।
હુતાશનમુખે દીપ્તે પ્રવિષ્ટમિતિ સત્તમ ॥

તતોઽબ્રવીન્મન્ત્રવિદસ્તાન્રાજા બ્રાહ્મણાંસ્તદા ।
આહરિષ્યામિ તત્સત્રં સમ્ભારાઃ સમ્ભ્રિયન્તુ મે ॥
સૌતિરુવાચ ।

તતસ્ત ઋત્વિજસ્તસ્ય શાસ્ત્રતો દ્વિજસત્તમ ।
તં દેશં માપયામાસુર્યજ્ઞાયતનકારણાત્ ॥

યથાવદ્વેદવિદ્વાંસઃ સર્વે બુદ્ધેઃ પરન્ગતાઃ ।
ઋદ્ધ્યા પરમયા યુક્તમિષ્ટં દ્વિજગણૈર્યુતમ્ ॥

પ્રભૂતધનધાન્યાઢ્યમૃત્વિગ્ભિઃ સુનિષેવિતમ્ ।
નિર્માય ચાપિ વિધિવદ્યજ્ઞાયતનમીપ્સિતમ્ ॥

રાજાનં દીક્ષયામાસુઃ સર્પસત્રાપ્તયે તદા ।
ઇદં ચાસીત્તત્ર પૂર્વં સર્પસત્રે ભવિષ્યતિ ॥

નિમિત્તં મહદુત્પન્નં યજ્ઞવિઘ્નકરં તદા ।
યજ્ઞસ્યાયતને તસ્મિન્ક્રિયમાણે વચોઽબ્રવીત્ ॥

સ્થપતિર્બુદ્ધિસમ્પન્નો વાસ્તુવિદ્યાવિશારદઃ ।
ઇત્યબ્રવીત્સૂત્રધારઃ સૂતઃ પૌરાણિકસ્તદા ॥

યસ્મિન્દેશે ચ કાલે ચ માપનેયં પ્રવર્તિતા ।
બ્રાહ્મણં કારણં કૃત્વા નાયં સંસ્થાસ્યતે ક્રતુઃ ॥

એતચ્છ્રુત્વા તુ રાજાસૌ પ્રાગ્દીક્ષાકાલમબ્રવીત્ ।
ક્ષત્તારં ન હિ મે કશ્ચિદજ્ઞાતઃ પ્રવિશેદિતિ ॥